ମୁମ୍ବାଇ: ମହିଳା ପ୍ରିମିୟର ଲିଗର ପ୍ରଥମ ସଂସ୍କରଣ ଜାରି ରହିିଛି । ଆଜି ଏହି ଫଟାଫଟ କ୍ରିକେଟ ଟୁର୍ଣ୍ଣାମେଣ୍ଟର 14 ତମ ମ୍ୟାଚ ଖେଳାଯିବ । ଏଥିରେମେଗ ଲାନିଙ୍ଗଙ୍କ ଦିଲ୍ଲୀ କ୍ୟାପିଟାଲ୍ସ ଓ ସ୍ନେହ ରଣାଙ୍କ ଗୁଜରାଟ ଜାଏଣ୍ଟ୍ସ ମଧ୍ୟରେ ମୁକାବିଲା ହେବ । ରାତି 7ଟା 30ରେ ମୁମ୍ବାଇର ବ୍ରାବୋର୍ଣ୍ଣ ଷ୍ଟାଡିୟମରେ ଖେଳାଯିବ ମ୍ୟାଚ । ଦିଲ୍ଲୀ ଗୁଜରାଟ ବିପକ୍ଷରେ ବିଜୟଧାରା ବଜାୟ ରଖିଥିବା ବେଳେ ଗୁଜରାଟ ଦଳର ଏହି ଧାରାକୁ ଭାଙ୍ଗି ପଏଣ୍ଟ ଟେବୁଲ ଉପରକୁ ଉଠିବାକୁ ଚେଷ୍ଟା କରିବ ।
ଦିଲ୍ଲୀ ଏଯାବତ 5ଟି ମ୍ୟାଚ ଖେଳି ସାରିଛି । ସେଥିରୁ ଗୋଟିଏରେ ପରାସ୍ତ ହୋଇଛି । କେବଳ ମୁମ୍ବାଇ ବିପକ୍ଷ ମ୍ୟାଚରେ ଦିଲ୍ଲୀ ପରାସ୍ତ ହୋଇଛି । ବାକି 4ଟି ମ୍ୟାଚରେ ବିଜୟୀ ହୋଇ 8 ପଏଣ୍ଟ ସହ ଟେବୁଲର ଦ୍ବିତୀୟ ସ୍ଥାନରେ ରହିଛି । ମାର୍ଚ୍ଚ 11 ତାରିଖରେ ଗୁଜରାଟ ବିପକ୍ଷ ମୁକାବିଲାରେ 10 ୱିକେଟରେ ବିଜୟୀ ହୋଇଥିଲା ଦିଲ୍ଲୀ । ଆଜିର ମ୍ୟାଚରେ ଏହି ବିଜୟଧାରା ବଜାୟ ରଖିବାକୁ ଚେଷ୍ଟା କରିବ ମେଗ ଲାନିଙ୍ଗଙ୍କ ଦିଲ୍ଲୀ କ୍ୟାପିଟାଲ୍ସ । ଶେଷ ମ୍ୟାଚରେ ଆରସିବି ବିପକ୍ଷରେ ବିଜୟ ହାସଲ କରିଥିଲା ଦିଲ୍ଲୀ ।
ଅନ୍ୟପଟେ ମହିଳା ଆଇପିଏଲରେ ନିରାଶ କରିଥିବା ଗୁଜରାଟ ଆଜି ଦିଲ୍ଲୀକୁ ହରାଇବାକୁ ସମସ୍ତ ପ୍ରୟାସ କରିବ । ଦଳ ଏଯାବତ 5ଟି ମ୍ୟାଚ ଖେଳିଥିବା ବେଳେ ମାତ୍ର ଗୋଟିଏରେ ବିଜୟ ହାସଲ କରିଛି । ଆଗାମୀ ରାଉଣ୍ଡରୁ ଉତ୍ତୀର୍ଣ୍ଣ ହେବାକୁ ହେଲେ ଦଳକୁ ବିଜୟୀ ହେବାକୁ ପଡିବ । ଗୁଜରାଟ କେବଳ ଆରସିବି ବିପକ୍ଷ ମୁକାବିଲାରେ ବିଜୟ ହାସଲ କରିଥିଲା ।