ନୂଆଦିଲ୍ଲୀ:ଆଇପିଏଲ ଟିମ ଚେନ୍ନାଇ ସୁପର କିଙ୍ଗ୍ସ(CSK) ନିବାସ- 'Th8 Palm' ପାଲଟିବ ଟିମ ଇଣ୍ଡିଆର ନୂଆ ଠିକଣା । ଇଣ୍ଡିଆନ ପ୍ରିମିୟର ଲିଗର ୧୪ତମ ସଂସ୍କରଣ ଫାଇନାଲ ମ୍ୟାଚ୍ର ଦୁଇ ଦିନ ପରେ UAE ଓ ଓମାନରେ ଆରମ୍ଭ ହେବ ଫଟାଫଟ କ୍ରିକେଟର ମହାକୁମ୍ଭ ଟି-୨୦ ବିଶ୍ବକପ । ଚଳିତ ଆଇପିଏଲ ଟୁର୍ଣ୍ଣାମେଣ୍ଟ ସମୟରେ ଚେନ୍ନାଇ ସୁପର କିଙ୍ଗ୍ସ ରହୁଥିବା ଟିମ ହୋଟେଲ୍ରେ ଭାରତୀୟ ଟିମର ଖେଳାଳିମାନେ ରହିବା ନେଇ ଜଣାପଡିଛି । ମେଗା ବିଶ୍ବକପ ଇଭେଣ୍ଟ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI) CSK ଖେଳାଳି ରହୁଥିବା ଟିମ ହୋଟେଲକୁ ଚୟନ କରିଛି ।
ଭାରତୀୟ ଟିମ ଅକ୍ଟୋବର ୨୪ରେ ବିଶ୍ବକପ ଟୁର୍ଣ୍ଣାମେଣ୍ଟର ପ୍ରଥମ ମୁକାବିଲା ଚିରପ୍ରତିଦ୍ବନ୍ଦ୍ବୀ ପାକିସ୍ତାନ ସହ ଖେଳିବ । ସମସ୍ତ ପୂର୍ବରୁ ଘୋଷିତ ଭାରତୀୟ ବିଶ୍ବକପ ଟିମର ଖେଳାଳି UAE ରେ ଆଇପିଏଲ ଖେଳୁଛନ୍ତି । ତେବେ ସପୋର୍ଟ ଷ୍ଟାଫ ଅକ୍ଟୋବର ୨ରେ ଟିମ ସହ ସାମିଲ ହେବେ । ମାତ୍ର ୬ ଦିନ ବାଧ୍ୟତାମୂଳକ କ୍ବାରେଣ୍ଟିନରେ ରହିବା ପରେ ଟି-୨୦ ବିଶ୍ବକପ ବାୟୋବବଲରେ ପ୍ରବେଶ କରିବେ । Th8 Palm ହୋଟେଲରେ ଭାରତୀୟ ଟିମର ଖେଳାଳିମାନେ ରହିବେ । ଏନେଇ ଚୁକ୍ତି ଖୁବଶୀଘ୍ର ଚୂଡାନ୍ତ ହେବାନେଇ ସୂଚନା ରହିଛି ।
ଟୁର୍ଣ୍ଣାମେଣ୍ଟର ଆରମ୍ଭ ରାଉଣ୍ଡ ୧, ଗ୍ରୁପ ବି ମୁକାବିଲା ଅକ୍ଟୋବର ୧୭ରେ ଆୟୋଜକ ଓମାନ ଓ ପପୁଆ ଗିନିଆ ମଧ୍ୟରେ ଖେଳାଯିବ ଓ ଗ୍ରୁପ ବି'ରେ ସ୍କଟଲାଣ୍ଡ ଓ ବାଂଲାଦେଶ ମଧ୍ୟରେ ଖେଳାଯିବ । ପରଦିନ ଅର୍ଥାତ ଅକ୍ଟୋବର ୧୮ରୁ ୨୨ ପର୍ଯ୍ୟନ୍ତ ଆୟରଲାଣ୍ଡ, ନେଦରଲାଣ୍ଡସ, ଶ୍ରୀଲଙ୍କା ଓ ନାମ୍ବିଆ ମଧ୍ୟରେ ଗ୍ରୁପ ଏ ରାଉଣ୍ଡ ୧ ମ୍ୟାଚ ଖେଳାଯିବ ।