ଗମ୍ଭୀରଙ୍କୁ ମିଷ୍ଟର ଫାଇଟର କହିଲେ ଶ୍ରୀସାନ୍ତ, ଏମିତି ଜବାବ ଦେଲେ କ୍ରିକେଟର

କ୍ରିକେଟ ଲିଜେଣ୍ଡ୍‌ସ ଲିଗ୍‌ରେ ମୁହାଁମୁହିଁ ଗମ୍ଭୀର ଓ ଶ୍ରୀସାନ୍ତ । ଏହି ବିବାଦକୁ ନେଇ ପୁଣି ଚର୍ଚ୍ଚାରେ ଗୌତମ ଗମ୍ଭୀର । ଅଧିକ ପଢନ୍ତୁ

ହାଇଦ୍ରାବାଦ: କ୍ରିକେଟ ଲିଜେଣ୍ଡ୍‌ସ ଲିଗ୍‌ରେ ମୁହାଁମୁହିଁ ୨ ପୂର୍ବତନ ଭାରତୀୟ କ୍ରିକେଟର ଗୌତମ ଗମ୍ଭୀର ଓ ଏସ ଶ୍ରୀସାନ୍ତ । ଅଧିକାଂଶ ସମୟ ବିବାଦରେ ରହୁଥିବା ଭାରତୀୟ ବାମହାତୀ ବ୍ୟାଟର ଗୌତମ ଗମ୍ଭୀର ଏବେ ପୂର୍ବତନ ଦ୍ରୁତ ବୋଲର ଏସ ଶ୍ରୀସାନ୍ତଙ୍କ ସହିତ ବିବାଦକୁ ନେଇ ଚର୍ଚ୍ଚାକୁ ଆସିଛନ୍ତି । ଲିଜେଣ୍ଡ୍ସ ଲିଗ କ୍ରିକେଟ ୨୦୨୩ର ଏଲିମିନେଟର ମ୍ୟାଚରେ ଦୁହିଁଙ୍କ ମଧ୍ୟରେ ଏହି ବିବାଦ ଉପୁଜିଛି । ଘଟଣାରେ ଉଭୟ ପରସ୍ପର ବିରୋଧରେ ପ୍ରତିକ୍ରିୟା ମଧ୍ୟ ରଖିଛନ୍ତି ।

ଲିଜେଣ୍ଡ୍ସ ଲିଗ କ୍ରିକେଟ ୨୦୨୩ର ଏଲିମିନେଟର ମ୍ୟାଚ ଇଣ୍ଡିଆ କ୍ୟାପିଟାଲ ଓ ଗୁଜୁରାଟ ଜାଏଣ୍ଟ୍ସ ମଧ୍ୟରେ ଖେଳାଯାଇଥିଲା । ଏହି ମ୍ୟାଚରେ ଯେତେବେଳେ ଦିଲ୍ଲୀ କ୍ୟାପିଟାଲ ବ୍ୟାଟିଂ କରୁଥିଲା, ସେତେବେଳେ ବ୍ୟାଟ୍ସମ୍ୟାନ୍ ଗୌତମ ଗମ୍ଭୀର ୫ ଓଭର ପରେ ନିଜ ସାଇଡ୍‌ ବଦଳାଉଥିଲେ । ଏହି ସମୟରେ ଦୁହିଁଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା । ଦୁହେଁ ପରସ୍ପରର ନିକଟତର ହୋଇ ପରସ୍ପରକୁ କିଛି କହିବା ଆରମ୍ଭ କରିଥିଲେ । ଏହି ଦୁଇ ଭାରତୀୟ କ୍ରିକେଟର ମୁହାଁମୁହିଁ ହେବା ପରେ ଶେଷରେ ସାଥୀ ଖେଳାଳି ଓ ଅମ୍ପାୟାର ଦୁହିଁଙ୍କୁ ଅଲଗା କରିଥିଲେ । ଯାହର ଦୃଶ୍ୟ ଏବେ ସୋସିଆଲ ମିଡିଆରେ ଘୁରି ବୁଲୁଛି ।

ଏହି ମ୍ୟାଚରେ ଗୌତମ ଗମ୍ଭୀର ୩୦ଟି ବଲରେ ୭ଟି ଚୌକା ଓ ଗୋଟିଏ ଛକା ମାରି ମୋଟ ୫୧ ରନ ସଂଗ୍ରହ କରିଥିଲେ । ଏହାପରେ X ସାଇଟ୍‌ରେ ଶ୍ରୀସାନ୍ତ ଏକ ଭିଡିଓ ସାମ୍ନାକୁ ଆସିଛି । ଯେଉଁଥିରେ ଶ୍ରୀସାନ୍ତ କହିଛନ୍ତି, " ମୁଁ ମିଷ୍ଟର ଫାଇଟର (ଗୌତମ ଗମ୍ଭୀର) ଗୋଟିଏ କଥା ସ୍ପଷ୍ଟ କରିବାକୁ ଚାହୁଁଛି ଯେ ସେ ସମସ୍ତଙ୍କ ସହିତ ଝଗଡ଼ା କରନ୍ତି । ସେ ମୋତେ ବିନା କୌଣସି କାରଣରେ କିଛି କହିଥିଲେ । ଯାହାକି ଆପତ୍ତିଜନକ ଥିଲା । " ଅନ୍ୟପଟେ ଏହି ପୁରା ଘଟଣାରେ ଗୌତମ ଗମ୍ଭୀର ମଧ୍ୟ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, " ଯେତେବେଳେ ପୁରା ବିଶ୍ବ ତୁମ ଠାରୁ କୌଣସି ପ୍ରତିକ୍ରିୟା ଚାହୁଁଛି, ସେତେବେଳେ ସମ୍ପୂର୍ଣ୍ଣ ନୀରବ ରୁହ ।"

ଗୌତମ ଗମ୍ଭୀର ପୂର୍ବରୁ ଅନ୍ୟତମ ଭାରତୀୟ କ୍ରିକେଟର ବିରାଟ କୋହଲିଙ୍କ ସହିତ ବିବାଦକୁ ନେଇ ଚର୍ଚ୍ଚାରେ ରହିଥାନ୍ତି । ଅନେକ ସମୟରେ ଦୁହିଁଙ୍କ ବିବାଦକୁ ନେଇ ଫ୍ୟାନ୍ସ ଆଲୋଚନା କରିଥାନ୍ତି । ଏହାସହ କୋହଲିଙ୍କ ପାଇଁ ଗୌତମ କମେଣ୍ଟ୍ରି କରୁଥିବା ସମୟରେ ମଧ୍ୟ ଫ୍ୟାନ୍ସ ଏହାକୁ ନେଇ ଚର୍ଚ୍ଚା କରୁଥିବା ବେଳେ ସୋସିଆଲ ମିଡିଆରେ ମିମ୍ସ ସାମ୍ନାକୁ ଆସେ ।

ବ୍ୟୁରୋ ରିପୋର୍ଟ, ଇଟିଭି ଭାରତ