ହାଇଦ୍ରାବାଦ: ଭାରତୀୟ କ୍ରିକେଟ୍ ଜଗତରେ ଆଜି ହେଉଛି ଏକ ବିଶେଷ ଦିନ । ଟିମ୍ ଇଣ୍ଡିଆ ପାଇଁ ଯେତିକି ଖାସ୍, ପ୍ରଶଂସକଙ୍କ ପାଇଁ ମଧ୍ୟ ସେତିକି ସ୍ବତନ୍ତ୍ର । କାରଣ ଆଜି ଗୋଟିଏ ଦିନରେ ଦିନ ଟିମ୍ ଇଣ୍ଡିଆର ୫ ଜଣ ଷ୍ଟାର କ୍ରିକେଟରଙ୍କ ଜନ୍ମଦିନ । ଏମାନେ ନିଜ ଉଚ୍ଚକୋଟୀର ପ୍ରଦର୍ଶନ ବଳରେ ଭାରତୀୟ କ୍ରିକେଟ୍କୁ ଏକ ସ୍ବତନ୍ତ୍ର ସ୍ଥାନରେ ପହଞ୍ଚାଇଛନ୍ତି । ସେଥିପାଇଁ ବିସିସିଆଇ ସମେତ ସାଥି ଖେଳାଳି ଓ ପ୍ରଶଂସକମାନେ ମଧ୍ୟ ଏମାନଙ୍କୁ ନିଜ ସୋସିଆଲ୍ ମିଡିଆ ହ୍ୟାଣ୍ଡେଲ୍ରେ ଶୁଭେଚ୍ଛା ଜଣାଇଛନ୍ତି । ଜାଣନ୍ତୁ କିଏ ଏହି ୫ ଷ୍ଟାର କ୍ରିକେଟର ଓ ଭାରତୀୟ କ୍ରିକେଟ୍ ପାଇଁ କଣ ରହିଛି ଏମାନଙ୍କ ଅବଦାନ ।
ରବୀନ୍ଦ୍ର ଜାଡେଜା: ଆଜି ଟିମ୍ ଇଣ୍ଡିଆର ଷ୍ଟାର ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ୩୫ତମ ଜନ୍ମଦିନ । ୬ ଡିସେମ୍ବର ୧୯୮୮ରେ ଗୁଜରାଟର ସୌରାଷ୍ଟ୍ରରେ ଜନ୍ମ ଗ୍ରହଣ କରିଥିଲେ ଜାଡେଜା । କ୍ରିକେଟ୍ରେ ବୋଲିଂରେ ହେଉ ବା ବ୍ୟାଟିଂରେ, ନିଜ ଷ୍ଟାଇଲ୍ରେ ମଧ୍ୟ ପ୍ରଶଂସକଙ୍କ ହୃଦୟ ଜିତିଛନ୍ତି ଜାଡେଜା । କ୍ରିକେଟ୍ର ସମସ୍ତ ୩ଟି ଫର୍ମାଟରେ ଦେଶ ପାଇଁ ସେ ଚମତ୍କାର କରିଛନ୍ତି । ଜାତୀୟ ଦଳରେ ୬୭ ଟେଷ୍ଟ ମ୍ୟାଚ୍ ଖେଳି ସେ ୨୮୦୪ ରନ୍ ସଂଗ୍ରହ କରିଥିବାବେଳେ ବୋଲିଂରେ ୨୭୫ ୱିକେଟ୍ ଅକ୍ତିଆର କରିଛନ୍ତି । ୧୯୭ ଏକଦିବସୀୟ ମ୍ୟାଚ୍ ଖେଳିଛନ୍ତି ଜାଡୁ । ଏହି ଫର୍ମାଟ୍ରେ ସେ ବ୍ୟାଟ୍ରୁ ୨୭୫୬ ରନ ସଂଗ୍ରହ କରିଥିବାବେଳେ ୨୨୦ ୱିକେଟ୍ ଦଖଲ କରି ବୋଲିଂରେ ମଧ୍ୟ ଚମତ୍କାରିତା ଦେଖାଇଛନ୍ତି । ସେହିଭଳି ଟି୨୦ କ୍ରିକେଟ୍ରେ ଜାଡେଜା ୬୪ ମ୍ୟାଚ୍ରୁ ୪୫୭ ରନ ଓ ୫୧ ୱିକେଟ୍ ସଂଗ୍ରହ କରିଛନ୍ତି ।
ଯଶପ୍ରୀତ ବୁମ୍ରା: ସଂପ୍ରତି ଭାରତୀୟ ଦଳର ପ୍ରମୁଖ ବୋଲର ଯଶପ୍ରୀତ ବୁମ୍ରା ଆଜି ତାଙ୍କର ୩୦ତମ ଜନ୍ମଦିନ ପାଳନ କରୁଛନ୍ତି । ୬ ଡିସେମ୍ବର ୧୯୯୩ରେ ଗୁଜରାଟର ଅହମ୍ମଦାବାଦରେ ଜନ୍ମ ଗ୍ରହଣ କରିଥିଲେ ବୁମ୍ରା । ନିଜ ଯାଦୁଗରୀ ବୋଲିଂ ଦ୍ବାରା ସେ ସମସ୍ତଙ୍କୁ ପ୍ରଭାବିତ କରିପାରିଛନ୍ତି । ତାଙ୍କ ଅନ୍ତର୍ଜାତୀୟ କ୍ରିକେଟ୍ କ୍ୟାରିୟର ଦେଖିଲେ ସେ ୩୦ ଟେଷ୍ଟ ମ୍ୟାଚ୍ ଖେଳି ୧୨୮ ୱିକେଟ୍ ଅକ୍ତିଆର କରିଛନ୍ତି । ସେହିଭଳି ୮୯ ଏକଦିବସୀୟ ମ୍ୟାଚ୍ରୁ ୧୪୯ ୱିକେଟ୍ ସଂଗ୍ରହ କରିଛନ୍ତି ବୁମ୍ରା । ଟି୨୦ କ୍ରିକେଟ୍ରେ ୬୨ ମ୍ୟାଚ୍ ଖେଳି ନିଜ ନାମରେ ୭୪ ୱିକେଟ୍ କରିପାରିଛନ୍ତି ଏହି ଷ୍ଟାର ପେସର ।
ଶ୍ରେୟସ୍ ଆୟର: ବର୍ତ୍ତମାନ ଟିମ୍ ଇଣ୍ଡିଆର ନିର୍ଭରଯୋଗ୍ୟ ମିଡିଲ ଅର୍ଡର ବ୍ୟାଟର ହେଉଛନ୍ତି ଶ୍ରେୟସ୍ ଆୟର । ନିକଟରେ ଶେଷ ହୋଇଥିବା ଦିନିକିଆ ବିଶ୍ବକପ୍ରେ ମଧ୍ୟ ସେ ପ୍ରଭାବୀ ବ୍ୟାଟିଂ କରିଥିଲେ । ଖୁବ୍ କମ୍ ସମୟରେ କ୍ରିକେଟ୍ ଦୁନିଆରେ ଅନେକ ସୁନାମ ଅର୍ଜନ କରିଥିବା ଏହି ଷ୍ଟାର ବ୍ୟାଟର ଆଜି ୨୯ତମ ଜନ୍ମଦିନ ପାଳନ କରୁଛନ୍ତି । ଭାରତ ପାଇଁ ସମସ୍ତ ୩ଟି ଫର୍ମାଟ୍ରେ ସେ ଭଲ ପ୍ରଦର୍ଶନ କରିଛନ୍ତି । ଏପର୍ଯ୍ୟନ୍ତ ୧୦ଟି ଟେଷ୍ଟ ମ୍ୟାଚ୍ ଖେଳି ୬୬୬ ରନ କରିଥିବାବେଳେ ୫୮ଟି ଦିନିକିଆ ମ୍ୟାଚ୍ରୁ ୨୩୩୧ ରନ ସଂଗ୍ରହ କରିଛନ୍ତି ଆୟର । ସେହିଭଳି ୫୧ ଟି୨୦ ମ୍ୟାଚ୍ ଖେଳି ସେ କ୍ରିକେଟ୍ର ସବୁଠାରୁ ଛୋଟ ଫର୍ମାଟ୍ରେ ୧୧୦୪ ରନ କରିଛନ୍ତି ।