ମୁମ୍ବାଇ: ଭାରତର ପ୍ରଥମ ଫିଲ୍ଡ ମାର୍ଶଲ ସାମ ମାନେକ୍ସାଙ୍କ ଉପରେ ନିର୍ମିତ ମୁଭି 'ସାମ ବାହାଦୂର' କ୍ରମାଗତ ଭାବେ ଚର୍ଚ୍ଚାରେ ରହିଛି । ଏହି ମୁଭିକୁ ବହୁତ ପସନ୍ଦ ମଧ୍ୟ କରୁଛନ୍ତି ଦର୍ଶକ । ଦେଶର ପ୍ରଥମ ଫିଲ୍ଡ ମାର୍ଶଲ ସାମ ମାନେକ୍ସାଙ୍କ ଉପରେ ଆଧାରିତ ଏହି ଫିଲ୍ମରେ ଅଭିନେତା ଭିକି କୌଶଲ ସାମ୍ଙ୍କ ଚରିତ୍ରରେ ଅଭିନୟ କରିଛନ୍ତି । ଏହାରି ଭିତରେ ଭାରତୀୟ ମହାନ କ୍ରିକେଟର ସଚିନ ତେନ୍ଦୁଲକର ଫିଲ୍ମ ସାମ ବାହାଦୂର ଏବଂ ଲିଡ୍ ଅଭିନେତା ଭିକି କୌଶଲଙ୍କୁ ପ୍ରଶଂସା କରିଛନ୍ତି । ଯାହା ଏହି ଫିଲ୍ମକୁ ଆହୁରି ଚର୍ଚ୍ଚା ପରିସରକୁ ଆଣିଛି ।
ସାମ ବାହାଦୂର ଦେଖିବା ପରେ 'ଏକ୍ସ'ରେ ଦୁଇଟି ଫଟୋ ପୋଷ୍ଟ କରିଛନ୍ତି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର । ଏହି ପୋଷ୍ଟରେ ସଚିନଙ୍କ ସହିତ ଅଭିନେତା ଭିକି କୌଶଲ ନଜର ଆସିଛନ୍ତି । ଏହି ଫଟୋରେ ମାଷ୍ଟର ବ୍ଲାଷ୍ଟରଙ୍କ ପତ୍ନୀ ଅଞ୍ଜଳି ତେନ୍ଦୁଲକରଙ୍କୁ ମଧ୍ୟ ଦେଖିବାକୁ ମିଳିଛି । ସଚିନ ଏହି ପୋଷ୍ଟରେ ଫଟୋ ସହିତ କ୍ୟାପ୍ସନ୍ରେ ଲେଖିଛନ୍ତି, "ସାମ ବାହାଦୂର ଭଲ ଲାଗିଲା । ସମସ୍ତେ ଏହି ଫିଲ୍ମ ଦେଖିବା ଉଚିତ । ସମସ୍ତ ପିଢ଼ିର ଦର୍ଶକ ସାମ ବାହାଦୂର ଦେଖିବା ପରେ ନିଜ ଦେଶର ଇତିହାସକୁ ଭଲ ଭାବରେ ବୁଝିପାରିବେ । ଆପଣ ମଧ୍ୟ ଜାଣିବେ ଯେ ସାମ ମାନେକ୍ସା କିପରି ନିଜ ଜୀବନକୁ ବଳିଦାନ ଦେଇଛନ୍ତି ।" ଏହା ବ୍ୟତୀତ ଫିଲ୍ମରେ ସାମ ମାନେକ୍ସାଙ୍କ ଚରିତ୍ରରେ ଅଭିନୟ କରିଥିବା ଅଭିନେତା ଭିକି କୌଶଲଙ୍କୁ ମଧ୍ୟ ଖୁବ ପ୍ରଶଂସା କରିଛନ୍ତି ସଚିନ୍ ତେନ୍ଦୁଲକର । ଭିକିଙ୍କୁ ନେଇ ସଚିନ ତାଙ୍କ ଟ୍ବିଟ୍ରେ ଲେଖିଛନ୍ତି, "ଭିକି କୌଶଲ ବହୁତ ଭଲ ଅଭିନୟ କରିଛନ୍ତି । ଏହି ଅଭିନୟ ପରେ ଲାଗୁଥିଲା ଯେପରି ସାମ୍ ମାନେକ୍ସା ପ୍ରକୃତରେ ଆମ ସାମ୍ନାରେ ଅଛନ୍ତି ।"