ନୂଆଦିଲ୍ଲୀ: ଭାରତ ଓ ଆଫଗାନିସ୍ତାନ ମଧ୍ୟରେ ଜାରି ରହିଛି ଟି୨୦ ସିରିଜ୍ । ପ୍ରଥମ ମ୍ୟାଚ୍ରେ ୬ ୱିକେଟ୍ରେ ଆଫଗାନିସ୍ତାନକୁ ମାତ ଦେଇ ସିରିଜ୍ରେ ୧-୦ରେ ଆଗୁଆ ରହିଛି ଭାରତ । ଏବେ ଶୃଙ୍ଖଳା କବ୍ଜା ଲକ୍ଷ୍ୟରେ ରବିବାର ମୈଦାନକୁ ଓହ୍ଲାଇବ ଟିମ୍ ଇଣ୍ଡିଆ । ମଧ୍ୟପ୍ରଦେଶର ଇନ୍ଦୋରରେ ଖେଳାଯିବାକୁ ଥିବା ଏହି ମ୍ୟାଚ୍ରେ ଯଦି ଭାରତୀୟ ଦଳ ଜିତିବାରେ ସକ୍ଷମ ହୁଏ, ତେବେ ଅଧିନାୟକ ରୋହିତ ଶର୍ମା ଏକ ବଡ଼ ରେକର୍ଡ କରିବେ । ଭାରତୀୟ ଅଧିନାୟକ ଭାବେ ସର୍ବାଧିକ ଅନ୍ତର୍ଜାତୀୟ ଟି୨୦ ମ୍ୟାଚ୍ ଜିତିବାରେ ଏମ୍ଏସ୍ ଧୋନୀଙ୍କ ରେକର୍ଡର ସମକକ୍ଷ ହେବେ ରୋହିତ ।
ଧୋନୀଙ୍କ ଏହି ରେକର୍ଡର ସମକକ୍ଷ ହେବେ ରୋହିତ: ହେବେ ରୋହିତ ଶର୍ମା ଏବେ ପର୍ଯ୍ୟନ୍ତ ୫୨ ଟି୨୦ ମ୍ୟାଚ୍ରେ ଭାରତୀୟ କ୍ରିକେଟ୍ ଦଳର ଅଧିନାୟକତ୍ବ କରିଛନ୍ତି । ସେଥି ମଧ୍ୟରୁ ଭାରତ ୪୦ଟି ମ୍ୟାଚ୍ରେ ବିଜୟ ହାସଲ କରିଛି । ସେହିପରି ପୂର୍ବତନ ଅଧିନାୟକ ଏମ୍ଏସ୍ ଧୋନୀ ୭୨ ଟି୨୦ ମ୍ୟାଚ୍ରେ ଭାରତର ଅଧିନାୟକତ୍ବ କରିଥିଲେ । ଏଥିରୁ ଭାରତ ୪୧ ମ୍ୟାଚ୍ ଜିତିଛି । ଏହି କ୍ରମରେ ଇନ୍ଦୋରରେ ରବିବାର ଖେଳାଯିବାକୁ ଥିବା ଆଫଗାନିସ୍ତାନ ବିପକ୍ଷ ମ୍ୟାଚ୍ ଜିତିଗଲେ ଅଧିନାୟକ ଭାବେ ଧୋନୀଙ୍କ ସର୍ବାଧିକ ଟି୨୦ ବିଜୟ ରେକର୍ଡର ସମକକ୍ଷ ହୋଇଯିବେ ରୋହିତ । ସର୍ବାଧିକ ଟି୨୦ ମ୍ୟାଚ୍ ଜିତିଥିବା ଭାରତୀୟ ଅଧିନାୟକଙ୍କ ତାଲିକା ଉପରେ ନଜର ପକାଇଲେ ୩ୟରେ ଥିବା ବିରାଟ କୋହଲି ୫୦ ଟି୨୦ ମ୍ୟାଚ୍ର ନେତୃତ୍ବ ନେଇ ଦଳକୁ ୩୦ ମ୍ୟାଚ୍ରେ ବିଜୟୀ କରାଇଛନ୍ତି ।