ନୂଆଦିଲ୍ଲୀ: ୭୩ତମ ଗଣତନ୍ତ୍ର ଦିବସ ଅବସରରେ ଦୁଇ ଅନ୍ତର୍ଜାତୀୟ କ୍ରିକେଟରଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାପରେ ଦୁଇ କ୍ରିକେଟର ଭାରତକୁ ସାଧାରଣତନ୍ତ୍ର ଦିବସର ଅଭିନନ୍ଦନ ଜଣାଇବା ସହ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଦେଇଛନ୍ତି । ପୂର୍ବତନ ଦକ୍ଷିଣ ଆଫ୍ରିକା କ୍ରିକେଟର ଜଣ୍ଟି ରୋଡ୍ସ୍ ଓ ୱେଷ୍ଟଇଣ୍ଡିଜ୍ କ୍ରିକେଟର କ୍ରିସ ଗେଲ୍ଙ୍କୁ ଶୁଭେଚ୍ଛା ଜଣାଇଥିଲେ ମୋଦି ।
ଆଇପିଏଲ୍ରେ ମୁମ୍ବାଇ ଇଣ୍ଡିଆନ୍ସ୍ ଦଳର ଫିଲ୍ଡିଂ କୋଚ୍ ଦାୟିତ୍ବ ତୁଲାଇ ସାରିଛନ୍ତି ଜଣ୍ଟି ରୋଡ୍ସ୍ । ଅଧିକାଂଶ ସମୟ ସେ ଭାରତରେ ବିତାଇ ଆସିଛନ୍ତି । ଏହିଭଳି ଭାବରେ ଭାରତ ସହ ତାଙ୍କ ସମ୍ପର୍କ ନିବିଡ଼ ରହିଛି । ଖାଲି ସେତିକି ନୁହେଁ ଜଣ୍ଟି ରୋଡ୍ସ୍ ତାଙ୍କ ଝିଅର ନାମ 'ଇଣ୍ଡିଆ' ରଖିଛନ୍ତି । ଭାରତ ପାଇଁ ସେ ଜଣେ ସ୍ପେଶାଲ ଆମ୍ବାସାଡର ହୋଇ ପାରିଛନ୍ତି । ଯାହାଦ୍ବାରା ଦୁଇ ଦେଶ ମଧ୍ୟରେ ସୁସମ୍ପର୍କ ସ୍ଥାପନରେ ପ୍ରଭାବଶାଳୀ ହୋଇ ପାରିଛି । ଜଣ୍ଟି ରୋଡ୍ସ୍ଙ୍କ ନିକଟକୁ ପ୍ରେରଣ କରାଯାଇଥିବା ଚିଠିରେ ଏଭଳି କିଛି ଲେଖିଛନ୍ତି ପ୍ରଧାନମନ୍ତ୍ରୀ ମୋଦି ।