ମୁମ୍ବାଇ: ଆରମ୍ଭ ହୋଇଗଲାଣି କାଉଣ୍ଟଡାଉନ୍ । ଏସିଆ କପ୍ ପରେ ଆରମ୍ଭ ହୋଇଯିବ ଦିନିକିଆ ବିଶ୍ବକପ୍ ୨୦୨୩ । ଏହା ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଚେତାବନୀ ଦେଇଛି ପାକିସ୍ତାନ କ୍ରିକେଟ୍ ଟିମ୍ । ଆଉ ମାତ୍ର ଦିନ କେଇଟା ପରେ ଏସିଆ କପ୍ରେ ମୁହାଁମୁହିଁ ହେବେ ଏହି ଦୁଇ ପାରମ୍ପାରିକ ପ୍ରତିଦ୍ବନ୍ଦ୍ବୀ । ଏହାପୂର୍ବରୁ ଶନିବାର ଖେଳାଯାଇଥିବା ତୃତୀୟ ଦିନିକିଆରେ ଆଫଗାନିସ୍ତାନକୁ ୫୯ ରନରେ ପରାସ୍ତ କରି ୩ ମ୍ୟାଚ୍ ବିଶିଷ୍ଟ ଶୃଙ୍ଖଳାକୁ କ୍ଲିନ୍ ସ୍ବିପ୍ କରିନେଇଛି ପାକିସ୍ତାନ । ଏହା ସହିତ ପାକ୍ ଦଳ ଆଇସିସି ଦିନିକିଆ ମାନ୍ୟତାରେ ବିଶ୍ବର ଏକ ନମ୍ବର ଦଳ ପାଲଟିଛି । ଯାହା ୧୦ ବର୍ଷରୁ ଆଇସିସି ଟ୍ରଫି ସନ୍ଧାନରେ ଥିବା ଭାରତୀୟ ଦଳ ପାଇଁ ଏକ ବଡ଼ ଚେତାବନୀ ବୋଲି କୁହାଯାଇପାରେ ।
ଏସିଆ କପ୍ ପୂର୍ବରୁ ଆଫଗାନିସ୍ତାନ ଓ ପାକିସ୍ତାନ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଦ୍ବିପାକ୍ଷିକ ଦିନିକିଆ ଶୃଙ୍ଖଳା ଖେଳାଯାଇଥିଲା । ଏହି ଶୃଙ୍ଖଳାର ସମସ୍ତ ମ୍ୟାଚ୍ ଜିତି ଶୃଙ୍ଖଳାକୁ ୩-୦ରେ ଜିତିବା ପରେ ପାକିସ୍ତାନ ଏବେ ଆଇସିସି ଦିନିକିଆ ମାନ୍ୟତାରେ ୨୭୨୫ ପଏଣ୍ଟ ଓ ୧୧୮ ରେଟିଂ ହାସଲ କରିଛି । ଏହା ସହିତ ଆଇସିସି ଦିନିକିଆ ମାନ୍ୟତାର ଶୀର୍ଷରେ ପହଞ୍ଚିଛି ବାବର ଆଜମଙ୍କ ଦଳ । ଏହାପରେ ୨୭୧୪ ପଏଣ୍ଟ ଓ ୧୧୮ ରେଟିଂ ସହ ଅଷ୍ଟ୍ରେଲିଆ ଦ୍ବିତୀୟ ସ୍ଥାନରେ ରହିଛି । ସେହିପରି ଭାରତ ୪୦୮୧ ପଏଣ୍ଟ୍ ଓ ୧୧୩ ରେଟିଂ ରହିଛି । ଆଇସିସି ଦିନିକିଆ ମାନ୍ୟତାରେ ଟିମ୍ ଇଣ୍ଡିଆ ତୃତୀୟ ସ୍ଥାନରେ ରହିଛି । ସେହିପରି ନ୍ୟୁଜିଲାଣ୍ଡ ଚତୁର୍ଥ ଓ ଇଂଲଣ୍ଡ ପଞ୍ଚମ ସ୍ଥାନରେ ରହିଛନ୍ତି ।