କଟକ: ଅମୀମାଂସିତ ରହିଲା ଓଡିଶା ବନାମ ନାଗଲାଣ୍ଡର ରଣଜୀ ଟ୍ରଫି ମ୍ୟାଚ । କଟକ ଡ୍ରିମ୍ସ ଗ୍ରାଉଣ୍ଡରେ ଖେଳାଯାଇଥିବା ଏହି ରଣଜୀ ଟ୍ରଫି ମ୍ୟାଚରେ ଓଡିଶାର ଜବରଦସ୍ତ ପ୍ରଦର୍ଶନ ରହିଥିଲା । ପ୍ରଥମେ ଦମଦାର ବୋଲିଂ କରିବା ପରେ ବିସ୍ଫୋରକ ବ୍ୟାଟିଂ କରିଥିଲେ ଓଡିଶା ବ୍ୟାଟର । ଓଡିଶା ପ୍ରଥମ ଇନିଂସରେ ୮ ୱିକେଟ ହରାଇ ୫୩୫ ରନ କରି ପାଳି ଘୋଷଣା କରିଥିଲା । ମ୍ୟାଚ ଅମୀମାଂସିତ ରହିବା ସତ୍ତ୍ବେ ପ୍ରଥମ ଇନିଂସରେ ଓଡିଶା ୧୦୨ ରନ ଆଗୁଆ ରହିଥିବାରୁ ଦଳକୁ ୩ ପଏଣ୍ଟ ମିଳିଛି । ଏହି ମ୍ୟାଚରେ ଦ୍ବିଶକୀୟ ଇନିଂସ ଖେଳିଥିବା ଶାନ୍ତନୁ ମିଶ୍ର ପ୍ଲେୟର ଅଫ ଦି ମ୍ୟାଚ ବିବେଚିତ ହୋଇଛନ୍ତି ।
ଓଡିଶା ଟସ ଜିତି ଅଧିନାୟକ ଶୁଭ୍ରାଂଶୁ ସେନାପତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ । ବ୍ୟାଟିଂ ଆମନ୍ତ୍ରଣ ପାଇ ମଇଦାନକୁ ଓହ୍ଲାଇଥିଲା ନାଗାଲାଣ୍ଡ । ପ୍ରଥମ ଇନିଂସରେ ୪୩୩ ରନ କରି ଅଲ ଆଉଟ ହୋଇଥିଲା ନାଗାଲାଣ୍ଡ । ବୋଲରଙ୍କ ଘାତକ ବୋଲିଂରେ ଆତ୍ମସର୍ମପଣ କରିଥିଲେ ନାଗାଲାଣ୍ଡ ବ୍ୟାଟର । ଆରମ୍ଭରୁ ଓପନିଂ ଯୋଡି ଫେଲ ମାରିଥିଲା । ଦୁଇ ଓପନର ୟୁଗନ୍ଧର ସିଂହ ଏବଂ ଜୋଶୁଆ ଓଜୁକୁମ କ୍ରମଶଃ ୨୦ ରନ ଓ ୭ ରନ କରି ସଅଳ ପାଭଲିୟନ ଫେରିଥିଲେ । ଏହା ପରେ ଏସ ମୁନ୍ଧେ ଓ ଚେତନ ବିସ୍ତଙ୍କ ଇନିଂସ ବଳରେ ଦଳୀୟ ସ୍କୋର ଆଗକୁ ବଢିଥିଲା । ଚେତନ ବିସ୍ତ ସର୍ବାଧିକ ୧୨୯ ରନର ଇନିଂସ ଖେଳିଥିଲେ । ଏସ ମୁନ୍ଧେ ୬୬ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ । ସେହିପରି ଏଚ ଝିମୋମି 5୯ ରନ ଏସ ରୁପେରୋ ୭୧ ରନ, ନାଘୋ ଚିସ୍ତି ୩୨ ରନ, ସି ହୋପଙ୍ଗକ୍ୟୁ ୧୭ ରନ କରିଥିଲେ । ସୂର୍ଯ୍ୟକାନ୍ତ ପ୍ରଧାନ ଓ ତାରିଣୀ ସା ସର୍ବାଧିକ ୩ ଟି ୱିକେଟ ନେଇଥିଲେ । ସେହିପରି ଜୟନ୍ତ ବେହେରା ୨ ୱିକେଟ ନେଇଥିବା ବେଳେ ଶାନ୍ତନୁ ମିଶ୍ର ଗୋଟିଏ ୱିକେଟ ହାତେଇଥିଲେ ।