ହାଇଦ୍ରାବାଦ:ସଂଘର୍ଷ ଆଉ ସଫଳତା ଗୋଟିଏ ମୁଦ୍ରାର ଦୁଇଟି ପାର୍ଶ୍ବ ପରି । ଯିଏ ସଂର୍ଘଷ କରିଛି ସଫଳତା ତାର ପାଦ ଛୁଇଁବାକୁ ବାଧ୍ୟ ହୋଇଯାଏ । କ୍ରୀଡା ସହ ସଂଘର୍ଷ ନିବିଡ ସମ୍ପର୍କ ରହିଛି । ଅନେକ କ୍ରୀଡାବିତ ସଫଳ ହେବାକୁ ସଂଘର୍ଷ କରିଛନ୍ତି । ସେଇଥିରେ ଯୋଡି ହୋଇଛି ଆଉ ଏକ ଚେହେରା । ସେ ହେଉଛନ୍ତି ଯଶ୍ବସୀ ଜୈସୱାଲ । ରାତାରାତି ଷ୍ଟାର୍ ପାଲଟିଥିବା ଜୈସୱାଲଙ୍କର ଏବେ ଜୟ ଜୟକାର ହେଉଛି । କ୍ରିକେଟ ସ୍ବପ୍ନ ପୂରଣ କରିବାକୁ ଟେଣ୍ଟ୍ରେ ରହୁଥିଲେ ରାସ୍ତାକଡାରେ ଗୁପଚୁପ ମଧ୍ୟ ବିକ୍ରି କରିଛନ୍ତି ଯଶ୍ବସୀ । କିନ୍ତୁ ତାଙ୍କ ସ୍ବପ୍ନକୁ ପ୍ରତିକୂଳ ପରିସ୍ଥିତି ହରାଇ ପାରି ନାହିଁ । ଚଳିତ ଆଇପିଏଲ ସଂସ୍କରଣରେ ଶତକ ହାସଲ କରିଥିବା 21 ବର୍ଷୀୟ ଯଶ୍ବସୀ ଜୈସୱାଲ ଏବେ ଚର୍ଚ୍ଚାରେ ।
ଗୁପୁଚୁପ ବିକାଳୀରୁ ଷ୍ଟାର କ୍ରିକେଟର:ଇଣ୍ଡିଆନ ପ୍ରିମିୟର ଲିଗରେ ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜି ପାଇଁ ଖେଳୁଛନ୍ତି ଯଶ୍ବସୀ ଜୈସୱାଲ । ଆଇପିଏଲର 1000ତମ ମ୍ୟାଚରେ ଯୁବ ବ୍ୟାଟର ଯଶ୍ବସୀ ଜୈସୱାଲ ଜବରଦସ୍ତ ବ୍ୟାଟିଂ କରିଥିଲେ । ଚଳିତ ଆଇପିଏଲ ସିଜିନରେ ରାଜସ୍ଥାନ ମୁମ୍ବାଇ ମୁକାବିଲାରେ ଯଶ୍ବସୀ ଶତକ ହାସଲ କରିଥିଲେ । 62 ବଲରେ ବିସ୍ଫୋରକ 124 ରନ ସଂଗ୍ରହ କରିଥିଲେ ଜୈସୱାଲ । ୱାଙ୍ଖେଡେ ଦେଖିଲା ଯଶ୍ବସୀଙ୍କ ଧୂଆଁଧାର ବ୍ୟାଟିଂ । ରାଜସ୍ଥାନ ମୁମ୍ବାଇ ବିପକ୍ଷ ଉକ୍ତ ମ୍ୟାଚ ହାରିଛି ସତ ମାତ୍ର ଏବେ ଯଶ୍ବସୀ ଜୈସୱାଲ ଚର୍ଚ୍ଚାରେ ରହିଛନ୍ତି । 2001 ଡିସେମ୍ବର 28 ତାରିଖରେ ଉତ୍ତରପ୍ରଦେଶରେ ଜନ୍ମଗ୍ରହଣ କରିଥିଲେ ଯଶ୍ବସୀ । କ୍ରିକେଟର ହେବା ସ୍ବପ୍ନ ନେଇ ମୁମ୍ବାଇ ଆସିଥିଲେ ଯଶ୍ବସୀ । ମୁମ୍ବାଇରେ ରହି ସେ ରାସ୍ତାକଡରେ ଗୁପ୍ଚୁପ୍ ବିକ୍ରି କରିଥିଲେ । ସେହି ମୁମ୍ବାଇ ୱାଙ୍ଖଡେରେ ନିଜ ଦକ୍ଷତାର ପ୍ରମାଣ ଦେଇ 62 ବଲରେ ବିସ୍ଫୋରକ 124ରନ କରିଥିଲେ । ଏହାପରେ ତାଙ୍କ ପାଖରେ ଅରେଞ୍ଜ କ୍ୟାପ ରହିଥିଲା । ମୋଟ 9ଟି ମ୍ୟାଚ ଖେଳି ସେ 428ରନ କରିଛନ୍ତି । ସେଥିରେ ଗୋଟିଏ ଶତକ ଓ 3ଟି ଅର୍ଦ୍ଧଶତକ ହାସଲ କରିଛନ୍ତି ।