ନୂଆଦିଲ୍ଲୀ:ଆଉ କିଛି ଦିନର ଅପେକ୍ଷା । ଫଟାଫଟ କ୍ରିକେଟ ଲିଗ ଇଣ୍ଡିଆନ ପ୍ରିମିୟର ଲିଗ ପାଇଁ ବିଗୁଲ ବାଜି ସାରିଛି । ଆସନ୍ତା 23 ତାରିଖରେ କେରଳ କୋଚିରେ ମିନି ନିଲାମୀ ଅନୁଷ୍ଠିତ ହେବ । ଏଥିରେ କ୍ରିସ ଗେଲଙ୍କ ସମେତ ଏହି ଖେଳାଳି ନୂଆ ରୂପରେ ଦେଖିବାକୁ ମିଳିବେ । ଚଳିତ ଆଇପିଏଲ ମିନି ନିଲାମୀରେ ମୋଟ 405 ଖେଳାଳି ସର୍ଟଲିଷ୍ଟ ହୋଇଛନ୍ତି । ମିନି ଅକ୍ସନରେ କ୍ରିସ ଗେଲ, ସୁରେଶ ରୈନା ଏବଂ ଏଭି ଡିଭିଲିୟସଙ୍କ ଭଳି ଦମଦାର ଖେଳାଳିଙ୍କୁ ଦେଖିବାକୁ ମିଳିବ । ଟି-20 କ୍ରିକେଟର ଏହି ମହାନ ଖେଳାଳିଙ୍କ ମଧ୍ୟରେ ସୁରେଶ ରୈନା, କ୍ରିସ ଗେଲ ଓ ଡିଭିଲିୟର୍ସ ଏଥର ନିଲାମୀରେ ସାମିଲ ନାହାନ୍ତି ସତ ହେଲେ ଏଥିରେ ଗୁରୁତ୍ବପୂର୍ଣ୍ଣ ଭୂମିକାରେ ନଜର ଆସିବେ ।
ଏହି ଷ୍ଟାର ଖେଳାଳିଙ୍କ ସମେତ ବହୁ କିମ୍ବଦନ୍ତୀ ଖେଳାଳି ଯେପରି ଅନିଲ କୁମ୍ବଲେ, ରବୀନ ଉଥପ୍ପା, ଆରପି ସିଂହ, ଇୟୋନ ମୋର୍ଗାନ 2023 ଆଇପିଏଲ ପାଇଁ କୋଚିରେ ଆୟୋଜିତ ହେବାକୁ ଥିବା ମିନି ନିଲାମୀ ପ୍ରକ୍ରିୟାରେ ଏକ୍ସପର୍ଟ ପ୍ୟାନେଲରେ ନଜର ଆସିବେ । ଭାରତର ପୂର୍ବତନ ଖେଳାଳି ଏବଂ ବାମହାତୀ ବ୍ୟାଟର ସୁରେଶ ରୈନା, ଉତ୍ତରପ୍ରଦେଶର ଆରପି ସିଂହଙ୍କ ସହ ହିନ୍ଦୀ କଭରେଜ ପାଇଁ ସାମିଲ ହେବେ । ୟୁନିଭର୍ସ ବସ ନାମରେ ପରିଚିତ କ୍ରିସ ଗେଲ, ଡିଭିଲିୟର୍ସ, ମୋର୍ଗାନ, ଉଥପ୍ପା ଏବଂ ଅନୀଲ କୁମ୍ବଲେ ଇଂରାଜୀ କଭରେଜ ପାଇଁ ଭାଗ ନେବେ । ଆଇପିଏଲ ମିନି ନିଲାମୀରେ ଭାରତରେ 6 ଭାଷା ଇଂରାଜୀ, ହିନ୍ଦୀ, ତାମିଲ, ତେଲୁଗୁ, ବଙ୍ଗାଳୀ ଏବଂ ମାଲାୟାଲମ ଭାଷାରେ ଜିଓ ସିନେମାରେ ପ୍ରସାରିତ ହେବ । ଆସନ୍ତା ଡିସେମ୍ବର 23 ତାରିଖରେ ଭାରତୀୟ ସମୟ ଅପରାହ୍ନ 2ଟା30ରେ ଆରମ୍ଭ ହେବ ।