ହାଇଦ୍ରାବାଦ: ଆଜି ଦକ୍ଷିଣ ଆଫ୍ରିକା ସହିତ ଦ୍ବିତୀୟ ଟି୨୦ ମ୍ୟାଚ ଖେଳୁଛି ଭାରତ । ଟସ୍ ଜିତି ଦକ୍ଷିଣ ଆଫ୍ରିକା ଅଧିନାୟକ ତେମ୍ବା ବାଭୁମା ପ୍ରଥମେ ବୋଲିଂ ନିଷ୍ପତ୍ତି ନେଇଛନ୍ତି । ଯାହା ଫଳରେ ପ୍ରଥମେ ବ୍ୟାଟିଂ କରିବ ଭାରତ ।
ଏହି ଦ୍ବିତୀୟ ଟି୨୦ ମ୍ୟାଚ୍ ଗୌହ୍ବାଟିରେ ଖେଳାଯାଉଛି । ଆଜିର ମ୍ୟାଚ ପାଇଁ ଭାରତୀୟ ଦଳରେ କୌଣସି ପରିବର୍ତ୍ତନ କରାଯାଇନାହିଁ । ପ୍ରଥମ ଟି୨୦ ଚୂଡାନ୍ତ ଏକାଦଶରେ ଯେଉଁମାନେ ଚୟନ ହୋଇଥିଲେ ସେମାନେ ଦ୍ବିତୀୟ ଟି୨୦ ମଧ୍ୟ ଖେଳୁଛନ୍ତି । ଭାରତ ଏହି ତିନି ଟିକିଆ ଟି୨୦ ସିରିଜରେ ୧-୦ରେ ଆଗୁଆ ରହିଛି । ତେବେ ଆଜିର ମ୍ୟାଚରେ ଭାରତ ତାର ବିଜୟ ଧାରା ବଜାୟ ରଖିବା ସହିତ ସିରିଜ ହାତେଇବାକୁ ଚେଷ୍ଟା କରିବ । ସେପଟେ ଏହି ସିରିଜରେ ଦ୍ବିତୀୟ ଟି୨୦ ମ୍ୟାଚ ଜିତି ସିରିଜ ବିଜୟ ଆଶା ଉଜ୍ଜିବିତ ରଖିବାକୁ ଦକ୍ଷିଣ ଆଫ୍ରିକା ପ୍ରୟାସ କରିବ । ପ୍ରଥମ ଟି୨୦ରେ ଭାରତ ୮ ୱିକେଟରେ ଦକ୍ଷିଣ ଆଫ୍ରିକାକୁ ପରାସ୍ତ କରିଥିଲା । ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ଦକ୍ଷିଣ ଆଫ୍ରିକା ୯ ରନରେ ୫ ୱିକେଟ ହରାଇଥିଲା । ସେପରେ ସୂର୍ଯ୍ୟକୁମାର ଯାଦବ ଏବଂ ଲୋକେଶ ରାହୁଲଙ୍କ ଦମଦାର ଅର୍ଦ୍ଧଶତକ ବଳରେ ଭାରତ ମ୍ୟାଚ ବିଜୟୀ ହୋଇଥିଲା ।