ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ଜିତି ବିଜୟରୁ ବିଶ୍ବକପ୍ ୨୦୨୩ ଅଭିଯାନ ଆରମ୍ଭ କରିଛି ଭାରତ । ପରବର୍ତ୍ତୀ ମ୍ୟାଚ୍ ୧୧ ଅକ୍ଟୋବର(ବୁଧବାର) ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଆଫଗାନିସ୍ତାନ ବିପକ୍ଷରେ ଖେଳିବ ଟିମ୍ ଇଣ୍ଡିଆ । ଏଥିପାଇଁ ଅଭ୍ୟାସ ଜାରି ରହିଥିବାବେଳେ ପୁଣିଥରେ କିଙ୍ଗ୍ କୋହଲିଙ୍କ ଦମଦାର ପ୍ରଦର୍ଶନ ଦେଖିବାକୁ ଅପେକ୍ଷା କରିଛନ୍ତି ପ୍ରଶଂସକ । ଏହି ଗ୍ରାଉଣ୍ଡ କୋହଲିଙ୍କ ପାଇଁ ବେଶ ପରିଚିତ । କାରଣ ସେ ନିଜ କ୍ରିକେଟ୍ କ୍ୟାରିୟର ଆରମ୍ଭ କରିବା ଦିନଠାରୁ ଏଠାରେ ଖେଳିଛନ୍ତି । ତେଣୁ ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ର ହିରୋ କୋହଲିଙ୍କୁ ଏଥର ନିଜ ହୋମଗ୍ରାଉଣ୍ଡରେ ନିଜ ଶ୍ରେଷ୍ଠ ପ୍ରଦର୍ଶନ ଦେଖାଇବାକୁ ମିଳିବ ସୁଯୋଗ ।
ଅରୁଣ ଜେଟଲୀ ଷ୍ଟାଡିୟମରେ ରହିଛି ଏହି ରେକର୍ଡ: ବିଶ୍ବକପ୍ ୨୦୨୩ରେ ଭାରତର ପ୍ରଥମ ମ୍ୟାଚ୍ରେ ବିରାଟ କୋହଲି ଅଷ୍ଟ୍ରେଲିଆ ବିପକ୍ଷରେ କଠିନ ପରିସ୍ଥିତିରେ ସାବଧାନତାର ସହ ବ୍ୟାଟିଂ କରିଥିଲେ ଏବଂ ୮୫ ରନର ଚମତ୍କାର ଇନିଂସ ଖେଳି ନିଜ ଦଳକୁ ବିଜୟ ଆଡକୁ ନେଇଥିଲେ । ଏବେ ପୁଣିଥରେ ପ୍ରଶଂସକମାନେ କୋହଲିଙ୍କଠାରୁ ନିଜ ଘରୋଇ ଗ୍ରାଉଣ୍ଡରେ ଭଲ ପ୍ରଦର୍ଶନ ପାଇଁ ଆଶା ରଖିଛନ୍ତି । ପୂର୍ବରୁ ମଧ୍ୟ ଅରୁଣ ଜେଟଲୀ ଷ୍ଟାଡିୟମରେ ଦେଶ ପାଇଁ ଖେଳୁଥିବାବେଳେ କୋହଲି ଚମତ୍କାର ପ୍ରଦର୍ଶନ କରିଛନ୍ତି । ୨୦୦୯ରୁ ୨୦୧୯ ମଧ୍ୟରେ ଅରୁଣ ଜେଟଲୀ ଷ୍ଟାଡିୟମରେ ବିରାଟ ଦିନିକିଆ ଫର୍ମାଟରେ ୭ଟି ମ୍ୟାଚରେ ୬ଟି ଇନିଂସ ଖେଳି ୨୨୨ ରନ୍ ସଂଗ୍ରହ କରିଛନ୍ତି । ବିରାଟ କୋହଲି ମଧ୍ୟ ଏହି ଗ୍ରାଉଣ୍ଡରେ ଗୋଟିଏ ଶତକ ଓ ଗୋଟିଏ ଅର୍ଦ୍ଧଶତକ ହାସଲ କରିଛନ୍ତି । ନିଜ ଘରୋଇ ଗ୍ରାଉଣ୍ଡରେ ବିରାଟଙ୍କ ସର୍ବାଧିକ ସ୍କୋର ରହିଛି ଅପରାଜିତ ୧୨୨ ରନ୍ । ଏହି ଗ୍ରାଉଣ୍ଡରେ କୋହଲିଙ୍କ ହାରାହାରି ସ୍କୋର ୪୪.୪୦ ଥିବାବେଳେ ତାଙ୍କର ଷ୍ଟ୍ରାଇକ୍ ରେଟ୍ ୮୧.୫୧ ରହିଛି । ଏହା ସହିତ ବିରାଟ ହେଉଛନ୍ତି ଏହି ଗ୍ରାଉଣ୍ଡରେ ସର୍ବାଧିକ ରନ୍ ସ୍କୋର କରିଥିବା ପଞ୍ଚମ ବ୍ୟାଟର ।