ଅହମ୍ମଦାବାଦ: ବିଶ୍ବକପ୍ ୨୦୨୩ରେ ରବିବାର ହେବ ଫାଇନାଲ୍ ଫାଇଟ୍ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମ୍ରେ ମୁହାଁମୁହିଁ ହେବେ ଦୁଇ ପୁରୁଣା ପ୍ରତିଦ୍ବନ୍ଦ୍ବୀ ଭାରତ ଓ ଅଷ୍ଟ୍ରେଲିଆ । କ୍ରିକେଟ୍ ଦୁନିଆକୁ ମିଳିବ ନୂଆ ଚମ୍ପିଆନ୍ । ତେବେ ଚଳିତ ବିଶ୍ବକପ୍ରେ ଅନେକ ଐତିହାସିକ ରେକର୍ଡ ଭାଙ୍ଗିଛି । ଅନେକ ନୂଆ ନୂଆ କୀର୍ତ୍ତିମାନ କରିଛନ୍ତି ବିଭିନ୍ନ ଦଳର ଖେଳାଳି । ଏହି ବଡ଼ ପ୍ରତିଯୋଗିତାରେ ପ୍ଲେୟର ଅଫ୍ ଦି ଟୁର୍ଣ୍ଣାମେଣ୍ଟ ରେସ୍ରେ ଅଛନ୍ତି ବିଭିନ୍ନ ଦେଶର ୯ ଜଣ କ୍ରିକେଟର । ଆଉ ସେମାନଙ୍କ ମଧ୍ୟରେ ୪ ଭାରତୀୟ ଖେଳାଳି ମଧ୍ୟ ରହିଛନ୍ତି । ଏହି ରେସ୍ରେ ସବୁଠାରୁ ଆଗରେ ରହିଛନ୍ତି ଭାରତୀୟ ଖେଳାଳି । ଏହି ବଡ଼ ପୁରସ୍କାର ପାଇଁ ଆଇସିସି ଆରମ୍ଭ କରିଛି ଭୋଟିଂ । ଆପଣ ମଧ୍ୟ ଏଥିରେ ଭୋଟ ଦେଇ ନିଜ ପ୍ରିୟ ଖେଳାଳିଙ୍କୁ ସପୋର୍ଟ କରିପାରିବେ । ଦେଖନ୍ତୁ ରେସ୍ରେ କିଏ ଅଛନ୍ତି ।
ବିରାଟ କୋହଲି: ବିଶ୍ବକପ୍ ୨୦୨୩ରେ ନିଜର ସର୍ବଶ୍ରେଷ୍ଠ ଫର୍ମରେ ଅଛନ୍ତି ଭାରତୀୟ ଦଳର ଷ୍ଟାର ବ୍ୟାଟର ବିରାଟ କୋହଲି । ଗୋଟିଏ ପରେ ଗୋଟିଏ ରେକର୍ଡ ଭାଙ୍ଗିବା ପରେ ମାଷ୍ଟର ବ୍ଲାଷ୍ଟର ସଚିନ୍ ତେନ୍ଦୁଲକରଙ୍କ ୪୯ ଦିନିକିଆ ଶତକ ରେକର୍ଡ ଭାଙ୍ଗି ଆଉ ଗୋଟିଏ ପାଦ ଆଗରେ ରହିଛନ୍ତି କିଙ୍ଗ୍ କୋହଲି । ବର୍ତ୍ତମାନ ଯାଏଁ ୧୦ଟି ମ୍ୟାଚ୍ ଖେଳି ସେ ୭୧୧ ରନ୍ ସଂଗ୍ରହ କରିସାରିଛନ୍ତି । ଏଥିରେ ୫ଟି ଅର୍ଦ୍ଧଶତକ ଏବଂ ୩ଟି ଶତକ ରହିଛି । ସେମିଫାଇନାଲ୍ରେ ନ୍ୟୁଜିଲାଣ୍ଡ ବିପକ୍ଷରେ ୧୧୭ ତାଙ୍କର ସର୍ବାଧିକ ବ୍ୟକ୍ତିଗତ ସ୍କୋର ରହିଛି ।
ଏହା ମଧ୍ୟ ପଢ଼ନ୍ତୁ...ବିଶ୍ବକପ୍ ୨୦୨୩: ଭାଙ୍ଗିଲା ସଚିନ୍ଙ୍କ ରେକର୍ଡ, ଦିନିକିଆରେ କୋହଲିଙ୍କ ୫୦ତମ ଶତକ
ରୋହିତ ଶର୍ମା: ଭାରତୀୟ ଦଳର ଅଧିନାୟକ ରୋହିତ ଶର୍ମା ମଧ୍ୟ ପୂରା ଟୁର୍ଣ୍ଣାମେଣ୍ଟରେ ଜବରଦସ୍ତ ଫର୍ମରେ ଅଛନ୍ତି । ଚଳିତ ବିଶ୍ବକପ୍ ପାୱାର ପ୍ଲେ'ରେ ସବୁଠାରୁ ଅଧିକ ଷ୍ଟ୍ରାଇକ୍ ରେଟ୍ରେ ରନ୍ ସଂଗ୍ରହ କରୁଥିବା ବ୍ୟାଟରଙ୍କ ତାଲିକାରେ ଶୀର୍ଷରେ ରହିଛନ୍ତି ହିଟ୍ମ୍ୟାନ୍ । ବର୍ତ୍ତମାନ ଯାଏଁ ୧୦ଟି ମ୍ୟାଚ୍ରୁ ରୋହିତ ୫୫୦ ରନ୍ ସଂଗ୍ରହ କରିଛନ୍ତି । ଏଥିରେ ଗୋଟିଏ ଶତକ ଏବଂ ୩ଟି ଅର୍ଦ୍ଧଶତକ ସାମିଲ ରହିଛି । ଆଫଗାନିସ୍ତାନ ବିପକ୍ଷରେ ସେ ଖେଳିଥିବା ୧୩୧ ରନ୍ର ଧୂଆଧାର ସ୍କୋର ତାଙ୍କର ବ୍ୟକ୍ତିଗତ ସର୍ବାଧିକ ସ୍କୋର ରହିଛି ।
ଏହା ମଧ୍ୟ ପଢ଼ନ୍ତୁ...ବିଶ୍ବକପରେ ରୋହିତଙ୍କ ଚମକ; ପ୍ରଥମ 10 ଓଭରରେ କରନ୍ତି ବିସ୍ଫୋରକ ବ୍ୟାଟିଂ
ମହମ୍ମଦ ଶାମି: ବିଶ୍ବକପ୍ ୨୦୨୩ର ପ୍ରଥମ ୪ ମ୍ୟାଚ୍ରେ ଖେଳିବାକୁ ସୁଯୋଗ ପାଇନଥିଲେ ମହମ୍ମଦ ସାମି । କିନ୍ତୁ ହାର୍ଦ୍ଦିକ ପାଣ୍ଡ୍ୟା ଆହତ ହୋଇ ଦଳରୁ ବାଦ ପଡ଼ିବା ପରେ ଟୁର୍ଣ୍ଣାମେଣ୍ଟ ଅଧାରେ ଦଳକୁ ଆସି ସମସ୍ତଙ୍କ ହୃହୟ ଜିତିଛନ୍ତି ଏହି ଭାରତୀୟ ସ୍ପିଡ୍ଷ୍ଟାର । ବର୍ତ୍ତମାନ ଯାଏଁ ୨୦୨୩ ବିଶ୍ବକପ୍ରେ କେବଳ ୬ଟି ମ୍ୟାଚ୍ ଖେଳି ସର୍ବାଧିକ ୱିକେଟ୍ ହାସଲକାରୀ ହୋଇଛନ୍ତି ଶାମି । ଏପର୍ଯ୍ୟନ୍ତ ସେ ୨୩ଟି ୱିକେଟ୍ ନେଇଛନ୍ତି । ସର୍ବଶ୍ରେଷ୍ଠ ପ୍ରଦର୍ଶନ ଭାବେ ସେ ନ୍ୟୁଜିଲାଣ୍ଡ ବିପକ୍ଷ ସେମି ଫାଇଟ୍ରେ ୫୭ ରନ୍ ଦେଇ ୭ଟି ୱିକେଟ୍ ନେଇଥିଲେ ।
ଏହା ମଧ୍ୟ ପଢ଼ନ୍ତୁ...ଅଷ୍ଟ୍ରେଲିଆକୁ ଶାମି ଭୟ, ଫାଇନାଲ ମ୍ୟାଚ ପୂର୍ବରୁ ଏମିତି କହିଲେ ପାଟ କମିନ୍
ଯଶପ୍ରୀତ୍ ବୁମ୍ରା: ବିଶ୍ବକପ୍ ୨୦୨୩ରେ ଭାରତର ଅନ୍ୟତମ ସ୍ପିଡ୍ଷ୍ଟାର ଯଶପ୍ରୀତ୍ ବୁମ୍ରା ମଧ୍ୟ ଭଲ ଫର୍ମରେ ରହିଛନ୍ତି । ତାଙ୍କ ବୋଲିଂରେ ଭାରତୀୟ ଟିମ୍କୁ ପାୱାର ପ୍ଲେରେ ବେଶ୍ ଫାଇଦା ମିଳୁଛି । ବର୍ତ୍ତମାନ ଯାଏଁ ବୁମ୍ରା ୧୦ଟି ମ୍ୟାଚ୍ ଖେଳିଥିବାବେଳେ ୧୮ଟି ୱିକେଟ୍ ନେଇଛନ୍ତି । ଚଳିତ ବିଶ୍ବକପ୍ରେ ବୁମ୍ରା ସର୍ବଶ୍ରେଷ୍ଠ ପ୍ରଦର୍ଶନ ଭାବେ ୩୯ ରନ୍ ଦେଇ ୪ଟି ୱିକେଟ୍ ନେଇଛନ୍ତି ।