ଇସଲାମାବାଦ: ‘ତାଲିବାନର ପ୍ରଧାନମନ୍ତ୍ରୀ ହୁଅନ୍ତୁ ଶାହିଦ ଆଫ୍ରିଦି’ ଏଭଳି କିଛି କହି ପାକିସ୍ତାନର ପୂର୍ବତନ କ୍ରିକେଟରଙ୍କୁ ଟାର୍ଗେଟ କରିଛନ୍ତି ସୋସିଆଲ ମିଡିଆ ୟୁଜର । ସବୁବେବେଳେ ନିଜ ମନ୍ତବ୍ୟ ପାଇଁ ଚର୍ଚ୍ଚାରେ ରହି ଆସୁଥିବା ଶାହିଦ ଆଫ୍ରିଦି ପୁନଃ ତାଲିବାନକୁ ନେଇ ଏକ ବିବାଦୀୟ ମନ୍ତବ୍ୟ ଦେଇଛନ୍ତି । ଆଫଗାନିସ୍ତାନରେ ତାଲିବାନ କବଜାକୁ ସକରାତ୍ମକ ବୋଲି କହିଛନ୍ତି ଶାହିଦ । କାରଣ ତାଲିବାନ ମହିଳାଙ୍କୁ କାମ କରିବାକୁ ଅନୁମତି ଦେଉଛନ୍ତି ଓ କ୍ରିକେଟକୁ ଭଲ ପାଉଛନ୍ତି । ଏହା ତାଙ୍କ ସକରାତ୍ମକ ଚିନ୍ତାଧାରାକୁ ପରିସ୍ଫୁଟିତ କରୁଛି ।
ଏଭଳି ମନ୍ତବ୍ୟ ଦେଉଥିବା ନେଇ ଆଫ୍ରିଦିଙ୍କ ଭିଡିଓ ଭାଇରାଲ ହେବାପରେ ସୋସିଆଲ ମିଡିଆରେ ତାଙ୍କୁ ଟ୍ରୋଲ ହେବାକୁ ପଡ଼ିଛି । ସୋମବାର ପାକିସ୍ତାନ ପ୍ରିମିୟର ଲିଗର କ୍ୱେଟା ଗ୍ଲାଡିଏଟର୍ସ ପକ୍ଷରୁ ଖେଳିବାକୁ କରାଚୀ ପହଞ୍ଚିଥିଲେ ଆଫ୍ରିଦି । ଏହି ସମୟରେ ଏକ ପ୍ରଶ୍ନର ଉତ୍ତରରେ ଏଭଳି ଦାୟିତ୍ବହୀନ ମନ୍ତବ୍ୟ ଦେଇଥିଲେ ଆଫ୍ରିଦି । ଏହାକୁ ନେଇ ସୋସିଆଲ ମିଡିଆରେ ଟ୍ରୋଲ ହେବାରେ ଲାଗିଛନ୍ତି ଆଫ୍ରିଦି । ଜଣେ ୟୁଜର ଟ୍ବିଟ୍ କରି କହିଛନ୍ତି ଯେ, "ତାଲିବାନର ସକରାତ୍ମକ ଚିନ୍ତାଧାରା ନେଇ ଆସିଛି । ସେମାନେ ମହିଳାଙ୍କୁ କାମ କରିବାକୁ ଅନୁମତି ଦେଉଛନ୍ତି । ସେମାନେ କ୍ରିକେଟକୁ ମଧ୍ୟ ଭଲ ପାଉଛନ୍ତି ବୋଲି କହୁଛନ୍ତି ଆଫ୍ରିଦି । ମୋ ହିସାବରେ ଆଫ୍ରିଦିଙ୍କୁ ତାଲିବାନର ପ୍ରଧାନମନ୍ତ୍ରୀ ହେବା ଦରକାର ।"