ନୂଆଦିଲ୍ଲୀ: ଆଜି ୩୩ ବର୍ଷରେ ପାଦ ଥାପିଛନ୍ତି ଭାରତୀୟ ଷ୍ଟାର ସ୍ପିନର୍ ୟୁଜବେନ୍ଦ୍ର ଚହଲ । ବହୁ ଦିନରୁ ଭାରତ ପାଇଁ ସୀମିତ ଓଭର କ୍ରିକେଟରେ ଜଣେ ପ୍ରଭାବୀ ସ୍ପିନର ଭାବେ ପରିଚୟ ଲାଭ କରିଛନ୍ତି ଚହଲ । ଚମତ୍କାର ବୋଲିଂ ବ୍ୟତୀତ ଚହଲ ପଡ଼ିଆ ଭିତରେ ଓ ବାହେରେ ଭିନ୍ନ ଅନ୍ଦାଜରେ ଥଟ୍ଟାମଜା କରୁଥିବା ମଧ୍ୟ ଦେଖିବାକୁ ମିଳେ । ଏହି ଷ୍ଟାର ସ୍ପିନର ଜୁନ୍ ୨୦୧୬ରେ ଭାରତ ପକ୍ଷରୁ ଡେବ୍ୟୁ କରିଥିଲେ । ଟି୨୦ ଅନ୍ତର୍ଜାତୀୟ ମ୍ୟାଚ୍ରେ ପ୍ରଥମ ଖେଳାଳୀ ଭାବେ ଭାରତ ପାଇଁ ୫ ୱିକେଟ୍ ନେଇ ଇତିହାସ ରଚିଥିଲେ ଚହଲ ।
୨୩ ଜୁଲାଇ ୧୯୯୦ରେ ହରିୟାଣାର ଜିନ୍ଦ୍ରେ ଜନ୍ମଗ୍ରହଣ କରିଥିଲେ ୟୁଜି ଚହଲ । ନଭେମ୍ବର ୨୦୦୯ରେ ସେ କ୍ରିକେଟ୍ରେ ନିଜର ଫାଷ୍ଟ୍କ୍ଲାସ କ୍ୟାରିଅର୍ ଆରମ୍ଭ କରିଥିଲେ । ଦୀର୍ଘଦିନର ଅପେକ୍ଷା ପରେ ସେ ଭାରତୀୟ ଦଳରେ ଅନ୍ତର୍ଜାତୀୟ କ୍ରିକେଟ ପାଇଁ ସୁଯୋଗ ପାଇଥିଲେ । ଟି୨୦ ଅନ୍ତର୍ଜାତୀୟରେ ଭାରତ ପାଇଁ ଚହଲ ଚମତ୍କାର ପ୍ରଦର୍ଶନ କରି ଫର୍ମରେ ରହିଥିଲେ । ପୁରୁଷ ଟି-୨୦ ଭାରତ ପାଇଁ ଦ୍ରୁତତମ ୫୦ ୱିକେଟ୍ ନେଇଥିବା ଖେଳାଳୀମାନଙ୍କ ତାଲିକାରେ ନିଜ ନାଁ ସାମିଲ କରିଛନ୍ତି ଚହଲ ।
ଅନ୍ତର୍ଜାତୀୟ କ୍ରିକେଟ ବ୍ୟତୀତ ଚହଲ ଆଇପିଏଲରେ ମଧ୍ୟ ଜଣେ ପ୍ରଭାବୀ ବୋଲର ସାବ୍ୟସ୍ତ ହୋଇଛନ୍ତି । ସେ ଏହି ଟୁର୍ଣ୍ଣାମେଣ୍ଟରେ ସବୁଠାରୁ ଅଧିକ ୱିକେଟ ନେଇଥିବା ବୋଲର । ବର୍ତ୍ତମାନ ସେ ଆଇପିଏଲରେ ରାଜସ୍ଥାନ ରୟାଲ୍ସ ଦଳରେ ରହିଛନ୍ତି । ବର୍ତ୍ତମାନ ପର୍ଯ୍ୟନ୍ତ ସେ ୧୪୫ ଆଇପିଏଲ୍ ମ୍ୟାଚ୍ ଖେଳିଥିବା ବେଳେ ୨୧.୬୮ ହାରରେ ୧୮୭ ୱିକେଟ ନେଇସାରିଛନ୍ତି । ଏଥିରେ ତାଙ୍କର ଇକୋନୋମି ରେଟ୍ ରହିଛି ୭.୬୭ । ଚହଲଙ୍କ ପରେ ଏହି ତାଲିକାରେ ଦ୍ବିତୀୟରେ ରହିଥିବା ୱେଷ୍ଟଇଣ୍ଡିଜ୍ର ଡ୍ବେନ୍ ବ୍ରାଭୋ ଏବେ ୧୮୩ ୱିକେଟ ସହ ଆଇପିଏଲରୁ ବିଦାୟ ନେଇ ସାରିଛନ୍ତି ।