ମୁମ୍ବାଇ: ଅନେକ ଦିନର ଅପେକ୍ଷା ପରେ ସୋମବାର ଘୋଷିତ ହୋଇଛି ଭାରତର ବିଶ୍ୱକପ୍ ଦଳ। 15 ଜଣିଆ ଟିମ ଘୋଷଣା କରିଛି ବିସିସିଆଇ ଚୟନ କମିଟି । ଯୁବ ଏବଂ ଏକାଧିକ ଅଲରାଉଣ୍ଡରଙ୍କୁ ନେଇ ଏକ ବାଲାନ୍ସ (ସନ୍ତୁଳିତ) ଟିମ୍ ବଶ୍ବକପ ପାଇଁ ବଛାଯାଇଥିବା ବିସିସିଆଇ ପ୍ରକାଶ କରିଛି । ଏପଟେ ବିଶ୍ୱକପ ଟିମରେ ଚାନ୍ସ ପାଇ ଅନେକ ଖେଳାଳି ଖୁସି ଥିବା ବେଳେ ଚାନ୍ସ ପାଇନଥିବା ଖେଳାଳିଙ୍କ ଆଶା ମଉଳି ଯାଇଛି।
ଦଳରେ ସ୍ଥାନ ପାଇବା ନେଇ ସବୁଠାରୁ ଅଧିକ ଆଶାବାଦୀ ବୋଧହୁଏ ଋଷଭ ପନ୍ତ ଥିଲେ । ତେବେ ପନ୍ତଙ୍କୁ ବିସିସିଆଇ ଦେଇନାହିଁ ଇଂଲଣ୍ଡ ପାଇଁ ଟିକେଟ। ପନ୍ଥଙ୍କ ସ୍ଥାନରେ ଦ୍ୱିତୀୟ ୱିକେଟ କିପର ଭାବେ ଦିନେଶ କାର୍ତ୍ତୀକ ସ୍ଥାନ ପାଇଛନ୍ତି । ସେପଟେ ଅନେକ ଥର ଚାରି ନମ୍ବର ସ୍ଥାନରେ ଅମ୍ବାତି ରାଇଡୁ ଖେଳିବା ନେଇ ଚର୍ଚ୍ଚା ହେଉଥିଲା କିନ୍ତୁ ଦଳ ଘୋଷଣା ପରେ ଚତୁର୍ଥ ସ୍ଥାନରେ ବିଜୟ ଶଙ୍କରଙ୍କ ଖେଳିବା ନିଶ୍ଚିତ ହୋଇଛି।
ଦଳ ଘୋଷଣା ପରେ ନିଜର ପ୍ରତିକ୍ରିୟା ରଖିଛନ୍ତି ଚୟନ କମିଟି ମୁଖ୍ୟ ଏମଏସକେ ପ୍ରସାଦ। ପନ୍ଥଙ୍କୁ ବାଦ ଦେବା ନେଇ ଏମଏସକେ କହିଛନ୍ତି ଯେ, ଚୟନ ସମୟରେ ଆମେ ପନ୍ତ ଓ କାର୍ତ୍ତୀକ ଉଭୟଙ୍କ ନାଁ ଆଲୋଚନା କରିଥିଲୁ । ଯିଏ ଧୋନିଙ୍କ ଅନୁପସ୍ଥିରେ ଖେଳିବେ। ତେବେ ଗୁରୁତ୍ତ୍ୱପୂର୍ଣ୍ଣ ମ୍ୟାଚରେ ୱିକେଟ କିପିଂ ମଧ୍ୟ ଖୁବ ଜରୁରୀ। ତେଣୁ ଆମେ ଦିନେଶଙ୍କୁ ବାଛିଲୁ । କାରଣ ପନ୍ତଙ୍କ ୱିକେଟ କିପିଂ କୌଶଳ ସେତେଟା ପରିପକ୍ୱ ନୁହେଁ।