ପୁଣେ: ଭାରତରେ ଜାରି ରହିଥିବା ଆଇସିସି ଦିନିକିଆ ବିଶ୍ବକପ୍ ୨୦୨୩ରେ ଶ୍ରୀଲଙ୍କାକୁ ପୁଣି ଲାଗିଛି ଝଟ୍କା । ଦଳର ଇନ୍-ଫର୍ମ ଦ୍ରୁତ ବୋଲର ଲାହିରୁ କୁମାରା ଚଳିତ ବିଶ୍ବକପ୍ର ଅବଶିଷ୍ଟ ମ୍ୟାଚ୍ରୁ ବାଦ ପଡ଼ିଛନ୍ତି । ବାମ ଜଙ୍ଘ ମାଂସପେଶୀରେ ଆଘାତ କାରଣରୁ ସେ ବିଶ୍ବକପ୍ରୁ ବାହାର ହୋଇଛନ୍ତି । ସୋମବାର ପୁଣେରେ ଆଫଗାନିସ୍ତାନ ବିପକ୍ଷ ଗୁରୁତ୍ବପୂର୍ଣ୍ଣ ମ୍ୟାଚ୍ ପୂର୍ବରୁ ଅଭ୍ୟାସ ସମୟରେ ଲାହିରୁ କୁମାରାଙ୍କ ବାମ ଜଙ୍ଘରେ ଆଘାତ ଲାଗିଛି ଏବଂ ତାଙ୍କ ସ୍ଥାନରେ ଶ୍ରୀଲଙ୍କାର ଅନ୍ୟତମ ଦ୍ରୁତ ବୋଲର ଦୁଷ୍ମନ୍ତ ଚମିରାଙ୍କୁ ଦଳରେ ସାମିଲ କରାଯାଇଛି । ଶ୍ରୀଲଙ୍କା ଦଳରେ ଚମିରାଙ୍କୁ ସାମିଲ କରିବା ନେଇ ଇଭେଣ୍ଟ ଟେକ୍ନିକାଲ କମିଟି ମଞ୍ଜୁର କରିଛନ୍ତି ।
ଚମିରା ୪୪ଟି ଦିନିକିଆ ମ୍ୟାଚ୍ ଖେଳିଛନ୍ତି । ଶ୍ରୀଲଙ୍କା ପାଇଁ ୧୦୦ରୁ ଅଧିକ ମ୍ୟାଚ୍ ଖେଳିବା ସହିତ ତାଙ୍କର ବ୍ୟାପକ ଅଭିଜ୍ଞତା ରହିଛି । ହେଲେ ଲାହିରୁ କୁମାରାଙ୍କ ଅନୁପସ୍ଥିତିକୁ ଦଳ ବିଶେଷ ଭାବେ ଅନୁଭବ କରିବ । କାରଣ ଗତ ଗୁରୁବାର ବେଙ୍ଗାଲୁରୁରେ ଇଂଲଣ୍ଡ ବିପକ୍ଷ ମ୍ୟାଚ୍ରେ ଦଳକୁ ଜିତାଇବାରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ ଲାହିରୁ କୁମାରା । ସେହି ମ୍ୟାଚ୍ରେ କେବଳ ୩୫ ରନ୍ ବ୍ୟୟରେ ସେ ୩ଟି ବହୁମୂଲ୍ୟ ୱିକଟ୍ ହାସଲ କରି ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ ।