ମୁମ୍ବାଇ: ସେହି ବିଶ୍ବକପ ସୁପର ଫାଇଟ । ସେହି ସମାନ ଦଳ । ସେଦିନ ଥିଲା 2019 ଆଜି 2023 । କ୍ରିକେଟ ମହାକୁମ୍ଭ ବିଶ୍ବକପ 2023ର ଆଜି ପ୍ରଥମ ସେମିଫାଇନାଲ ମ୍ୟାଚ ଖେଳାଯିବ । ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ମୁମ୍ବାଇର ଐତିହାସିକ ୱାଙ୍ଖଡେ ଷ୍ଟାଡିୟମରେ ଏହି ହାଇଭୋଲ୍ଟେଜ ମ୍ୟାଚ ଖେଳାଯିବ । ଚଳିତ ସଂସ୍କରଣରେ ଫୁଲ ଫର୍ମରେ ଥିବା ଭାରତ ଲିଗ ମ୍ୟାଚରେ ଅପରାଜେୟ ରହିଛି । 9ରୁ 9 ମ୍ୟାଚ କ୍ଲିନ ସୁପଇ କରିଛି ଟିମ୍ ଇଣ୍ଡିଆ । ଆଜି ୱାଙ୍ଖଡେରେ ଅପରାଜେୟ ଭାରତ ବନାମ ନ୍ୟୁଜିଲାଣ୍ଡ ମଧ୍ୟରେ ଏକ କଡ୍ଡା ସେମି ମୁକାବିଲା ଦେଖିବାକୁ ମିଳିବ । 2019ର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି ରୋହିତ ସେନା ।
2019 ବିଶ୍ବକପ ସେମିଫାଇନାଲ ପରାଜୟର ପ୍ରତିଶୋଧ ଲକ୍ଷ୍ୟରେ ରହିଛି ଭାରତ । ଓଲ୍ଡ ଟ୍ରାଫୋର୍ଡର ପ୍ରତିଶୋଧ ୱାଙ୍ଖଡେରେ ନେବ ମ୍ୟାନ ଇନ୍ ବ୍ଲ୍ୟୁ । ଭାରତର ବ୍ୟାଟିଂ ବନାମ କିୱି ଦଳର ବୋଲିଂ ମଧ୍ୟରେ କଡ୍ଡା ଟକ୍କର ହେବ । ସେପଟେ ଲିଗ ମ୍ୟାଚରେ ଭାରତଠୁ ପରାସ୍ତ ହୋଇଥିବା ନ୍ୟୁଜିଲାଣ୍ଡ ୱାଙ୍ଖଡେରେ ଭାରତକୁ ପରାସ୍ତ କରିବାକୁ ପ୍ରୟାସ କରିବ ।
ଭାରତ ବନାମ ନ୍ୟୁଜିଲାଣ୍ଡ:2 ଥର ବିଶ୍ବ ବିଜୟୀ ଭାରତ ଓ କ୍ରମାଗତ 2 ଥର ରନର୍ସ ଅପ୍ ନ୍ୟୁଜିଲାଣ୍ଡ ମଧ୍ୟରେ ଆଜି ପ୍ରଥମ ସେମିଫାଇନାଲ ମ୍ୟାଚ ଖେଳାଯିବ । ଚଳିତ ବିଶ୍ବକପ ଲିଗ ମ୍ୟାଚରେ ଅପରାଜେୟ ରହିଛି ଭାରତ । ଅଷ୍ଟ୍ରେଲିଆ, ପାକିସ୍ତାନ, ଦକ୍ଷିଣ ଆଫ୍ରିକା କେହି ବି ଭାରତର ବିଜୟଧାରାରେ ବ୍ରେକ ଲାଗାଇ ପାରିନାହାନ୍ତି । ଆଜି ଦଳ ନ୍ୟୁଜିଲାଣ୍ଡ ବିପକ୍ଷରେ ସେମି ଫାଇନାଲ ମ୍ୟାଚ ଖେଳିବ । ଏବେ ବି 140 କୋଟି ଭାରତୀୟ 2019 ବିଶ୍ବକପ ସେମି ଫାଇନାଲ ପରାଜୟ ଭୁଲିନାହିଁ । ଆଜି ଓଲ୍ଡ ଟ୍ରାଫୋର୍ଡର ପ୍ରତିଶୋଧ ୱାଙ୍ଖଡେରେ ନେବା ଲକ୍ଷ୍ୟରେ ରହିଛି ରୋହିତ ସେନା । ଧର୍ମଶାଳାରେ ଲିଗ ପର୍ଯ୍ୟାୟରେ ନ୍ୟୁଜିଲାଣ୍ଡକୁ ଧୂଳି ଚଟାଇଥିଲା ଭାରତ । ଆଜି ମଧ୍ୟ କିୱି ଦଳକୁ ମାତ ଦେବାକୁ ପ୍ରୟାସ କରିବ ରୋହିତ ଆଣ୍ଡ କୋ ।
ପୂର୍ବ ଅପେକ୍ଷା ଭାରତ ଦଳ ଏଥର ଯଥେଷ୍ଟ ସନ୍ତୁଳିତ ରହିଛି । ଉଭୟ ବିଭାଗରେ ଦଳର ପ୍ରଦର୍ଶନ ଭଲ ରହିଛି । ରୋହିତ, ଶୁଭମନ, କୋହଲି କେଏଲ ରାହୁଲ, ଶ୍ରେୟାସ ଆୟର ଫୁଲ ଫର୍ମରେ ରହିଛନ୍ତି । ଲିଗ ପର୍ଯ୍ୟାୟରେ ଲାଗାତାର 3ଟି ମ୍ୟାଚରେ ଭଲ ପ୍ରଦର୍ଶନ କରିଥିଲେ ଆୟର । ନେଦରଲାଣ୍ଡସ ବିପକ୍ଷରେ ରାହୁଲ ଓ ଆୟର ଦମଦାର ଶତକ ହାସଲ କରିଥିଲେ ଆଜି ମଧ୍ୟ ଉଭୟଙ୍କ ନିକଟରୁ ଭଲ ପ୍ରଦର୍ଶନ ଆଶା କରାଯାଉଛି । ସେହିପରି ଭାରତର ବୋଲିଂ ବିଭାଗ ଯଥେଷ୍ଟ ଶକ୍ତିଶଳୀ ଅଛି । ସାମି, ସିରାଜ, ବୁମରା, ଜାଡେଜା ଆଜି କିୱି ଦଳ ପାଇଁ ଘାତକ ସାବ୍ୟସ୍ତ ହେବେ ବୋଲି ଅନୁମାନ କରାଯାଉଛି ।
ଅନ୍ୟପଟେ ବିଶ୍ବକପରେ ଅଣ୍ଡରଡଗ ଆଖ୍ୟା ପାଇଥିବା ନ୍ୟୁଜିଲାଣ୍ଡ ଦଳ ସେମି ଫାଇନାଲରେ ବାଜି ମାରିବାକୁ ଲକ୍ଷ୍ୟ ରଖିଛି । ଅଧିକ ରିସ୍କ ନେଇ ଖେଳ ପ୍ରଦର୍ଶନ କରିବାକୁ ପ୍ରୟାସ କରିବ କିୱି ଦଳ । ଲିଗ ପର୍ଯ୍ୟାୟରେ ନ୍ୟୁଜିଲାଣ୍ଡ 9ଟି ମ୍ୟାଚରୁ 5ଟି ଜିତି 10 ପଏଣ୍ଟ ହାସଲ କରିଥିଲା । ଚତୁର୍ଥ ଦଳ ଭାରେ ସେମି ଫାଇନାଲରେ ପ୍ରବେଶ କରିଥିଲା । ଦଳରେ ଭାରତୀୟ ବଂଶୋଦ୍ଭବ ଓପନର ରାଚିନ ରବିନ୍ଦ୍ର ଫୁଲ ଫର୍ମରେ ରହିଛନ୍ତି । ସେହିପରି ଡେଭନ କନୱେ, ଟମ ଲାଥମ, ଡାରିଲ ମିଚେଲଙ୍କ ପାଖରେ ଦ୍ରୁତ ରନ ସଂଗ୍ରହ କରିବା କ୍ଷମତା ରହିଛି । ବୋଲିଂରେ ଟ୍ରେମ୍ଟ ବୋଲ୍ଡ, ମିଚେଲ ସାଣ୍ଟନର ଓ ଲକି ଫର୍ଗୁସନ ପ୍ରଭାବଶାଳୀ ସାବ୍ୟସ୍ତ ହୋଇପାରନ୍ତି ।