ସାଉଥହମ୍ପଟନ: ବିଜୟରୁ ବିଶ୍ବକପ ଅଭିଯାନ ଆରମ୍ଭ କଲା ବିରାଟ ବାହିନୀ । 6 ୱିକଟରେ ବିରାଟ ବାହିନୀ ଦକ୍ଷିଣ ଆଫ୍ରିକାକୁ ମାତ ଦେଇଛି । ବିଶ୍ବକପରେ 1992 ଠାରୁ ଆଜି ପର୍ଯ୍ୟନ୍ତ ଦକ୍ଷିଣ ଆଫ୍ରିକା ବିପକ୍ଷରେ ମାତ୍ର ଗୋଟିଏ ମ୍ୟାଚ ଜିତିଥିବା ଟିମ ଇଣ୍ଡିଆ ବୁଧବାର ଇତିହାସ ରଚିଛି । ରୋହିତ ଶର୍ମାଙ୍କ ଦମଦାର ଶତକ ଏବଂ ବୁମରାଙ୍କ ଜବରଦସ୍ତ ବୋଲିଂ ପାଇଁ ସାଉଥହମ୍ପଟନରେ ଦକ୍ଷିଣ ଆଫ୍ରିକା ଶିକାର କରିଛି ଟିମ୍ ଇଣ୍ଡିଆ ।
ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ଦଳ ଭାରତୀୟ ବୋଲିଂ ଆଟାକକୁ ସାମ୍ନା କରି ପାରିନଥିଲା । 157 ରନରେ 7 ୱିକେଟ ହରାଇଥିଲା ଦକ୍ଷିଣ ଆଫ୍ରିକା । ମୋରିସ ଓ ରାବଡା ଶେଷରେ ପାଳି ସମ୍ଭାଳି ଦକ୍ଷିଣ ଆଫ୍ରିକାକୁ ଏକ ସମ୍ମାନଜନକ ସ୍କୋରରେ ପହଁଞ୍ଚାଇଥିଲେ । 202 ରନ ବିଜୟ ଲକ୍ଷ୍ୟକୁ ପିଛା କରୁଥିବା ଭାରତକୁ ପ୍ରାଥମିକ ଝଟକା ଲାଗିଥିଲା । ଓପନର ଶିଖର ଧୱନ ଶୀଘ୍ର ପାଭିଲିୟନ ଫେରିଥିଲେ । ହିଟ ମ୍ୟାନ ରୋହିତଙ୍କ ବ୍ୟାଟ କିନ୍ତୁ ବୁଧବାର ହିଟ ସାବ୍ୟସ୍ତ ହୋଇଥିଲା । ଅପରାଜିତ ରହି 122ରନର ଦର୍ଶନୀୟ ପାଳି ଖେଳିଥିଲେ ରୋହିତ ଓ ଭାରତକୁ ଚଖାଇଥିଲେ ଚଳିତ ବିଶ୍ବକପର ପ୍ରଥମ ବିଜୟର ସ୍ୱାଦ ।