‘ୱାଘା ବର୍ଡରରେ ଛାତି ପିଟିଥିଲେ, ଏବେ କହିଲେ ଭାରତ ଜିତିବ ବିଶ୍ବକପ’

ଭାରତର ବିଜୟ ପରେ ଜଣେ ଭାରତୀୟ ସାମ୍ବାଦିକା ଟ୍ବିଟରରେ ଟିମ ଇଣ୍ଡିଆକୁ ଶୁଭେଚ୍ଛା ଜଣାଇଥିଲେ । ଏହି ଟ୍ବିଟର ଉତ୍ତର ଦେଇଛନ୍ତି ପାକିସ୍ତାନ ବୋଲର ହାସନ ଅଲ୍ଲୀ । ସେ ଲେଖିଛନ୍ତି ଯେ, ଆପଣଙ୍କ ମନସ୍କାମନା ପୂର୍ଣ୍ଣ ହେବ ।

ଲଣ୍ଡନ: ପାକିସ୍ତାନ କ୍ରିକେଟର ହାସନ ଅଲ୍ଲୀ ଓ୍ବାଘା ବର୍ଡରରେ କିଛି ମାସ ତଳେ ଛାତି ପିଟିଥିଲେ। ଏହାକୁ ନେଇ ହାସନ ମଧ୍ୟ ବେଶ୍ ଚର୍ଚ୍ଚାରେ ଥିଲେ । ତେବେ ବିଶ୍ବକପରେ ଭାରତ ବିପକ୍ଷ ମ୍ୟାଚରେ ହାସନ ଅଲ୍ଲୀ ଭଲ ପ୍ରଦର୍ଶନ କରି ପାରିନଥିଲେ । ବିଶ୍ବକପରେ 4ଟି ମ୍ୟାଚରୁ ହାସନ ଅଲ୍ଲୀ ମାତ୍ର 2ଟି ୱିକେଟ ନେଇପାରିଛନ୍ତି ।

ଫଟୋ ସୌଜନ୍ୟ: ସୋସିଆଲ ମିଡିଆ

ତେବେ ଭାରତ ବିପକ୍ଷ ମ୍ୟାଚରେ ଖରାପ ପ୍ରଦର୍ଶନ ପାଇଁ ହାସନ ଅଲ୍ଲୀଙ୍କୁ ଗାଳି ଦେଇଥିଲେ ପୂର୍ବତନ ପାକିସ୍ତାନ ପେସ ବୋଲର ସୋଏବ ଅକ୍ତର । ଏପରିକି ଭାରତ ଠାରୁ ହାରିବା ପରେ ଖେଳାଳିଙ୍କ ଠାରୁ ନେଇ କ୍ୟାପଟେନ ଓ କୋଚ ସମସ୍ତଙ୍କୁ ପାକିସ୍ତାନୀ ପ୍ରଶଂସକ ଟାର୍ଗେଟ କରୁଛନ୍ତି । ପାକିସ୍ତାନ ପ୍ରଶଂସକ ଭିଡିଓ ଜାରି କରି ନିଜ ଖେଳାଳିଙ୍କୁ ଗାଳି କରିବାରେ ଲାଗିଛନ୍ତି ।

ଏସବୁ ଭିତରେ ଏକ ରୋଚକ କଥା ସାମ୍ନାକୁ ଆସିଛି । ଭାରତର ବିଜୟ ପରେ ଜଣେ ଭାରତୀୟ ସାମ୍ବାଦିକା ଟ୍ବିଟରରେ ଟିମ ଇଣ୍ଡିଆକୁ ଶୁଭେଚ୍ଛା ଜଣାଇଥିଲେ ଏବଂ ଭାରତ ହିଁ ବିଶ୍ବକପ ଜିତିବ ଲେଖିଥିଲେ । ପାକିସ୍ତାନ ବିପକ୍ଷରେ ମ୍ୟାଚ ଜିତି ପ୍ରତି ଭାରତୀୟଙ୍କୁ ଭାରତୀୟ କ୍ରିକେଟ ଦଳ ଗର୍ବିତ କରିଛି ବୋଲି ଲେଖିଥିଲେ ସାମ୍ବାଦିକା ମମତାଜ ଖାନ ।

ଏହି ଟ୍ବିଟର ଉତ୍ତର ଦେଇଛନ୍ତି ପାକିସ୍ତାନ ବୋଲର ହାସନ ଅଲ୍ଲୀ । ସେ ଲେଖିଛନ୍ତି ଯେ, ଆପଣଙ୍କ ମନସ୍କାମନା ପୂର୍ଣ୍ଣ ହେବ । ତେବେ କିଛି ସମୟ ପରେ ହାସଲ ଅଲ୍ଲୀ ଏହି ଟ୍ବିଟକୁ ଡିଲିଟ କରିଦେଇଥିଲେ ।

ବ୍ୟୁରୋ ରିପୋର୍ଟ, ଇଟିଭି ଭାରତ