ଇଂଲଣ୍ଡ: ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଟିମ ଇଣ୍ଡିଆ ଓପନର ଶିଖର ଧୱନଙ୍କ ବୁଢ଼ା ଆଙ୍ଗୁଳିରେ ଆଘାତ ଲାଗିଥିଲା । ବର୍ତ୍ତମାନ ସେ ଗୋଟିଏ ସପ୍ତାହ ପାଇଁ ନିରୀକ୍ଷଣରେ ରହିବେ । ଟିମ ମ୍ୟାନେଜମେଣ୍ଟ ମଧ୍ୟ ତାଙ୍କ ବିକଳ୍ପ ନେଇ କୌଣସି ସୂଚନା ଦେଇ ନାହିଁ । ଧୱନଙ୍କ ଆଘାତ ନେଇ ଶେଷ ରିପୋର୍ଟ ଆସିବା ପରେ ଏ ନେଇ ଚିନ୍ତା କରିବ ମ୍ୟାନେଜମେଣ୍ଟ ।
ଫଟୋ ସୌଜନ୍ୟ: ସୋସିଆଲ ମିଡିଆ/ଟ୍ବିଟର @BCCI ଧୱନଙ୍କୁ ସମ୍ପୂର୍ଣ୍ଣ ସୁସ୍ଥ ହୋଇ ଟିମରେ ଯୋଗଦେବା ପାଇଁ ଏକ ସୁଯୋଗ ଦବା ପାଇଁ ସ୍ତିର କରିଛି ମ୍ୟାନେଜମେଣ୍ଟ । ସେହି ସମୟ ମଧ୍ୟରେ ଯଦି ଧୱନଙ୍କ ଆଘାତ ସମସ୍ୟାରେ ସୁଧାର ପରିଲକ୍ଷତି ହୁଏ ତେବେ ସମ୍ପୂର୍ଣ୍ଣ ସୁସ୍ଥ ହେବା ପରେ ସେ ଟିମରେ ଖେଳିବା ଜାରି ରଖିବେ । ନଚେତ ଋଷଭ ପନ୍ତ ଯାଇ ଧୱନଙ୍କ ସ୍ଥାନରେ ଖେଳି ପାରନ୍ତି ।
ଗୁରୁବାର ଭାରତ ନ୍ୟୁଜିଲାଣ୍ଡ ବିପକ୍ଷରେ ମ୍ୟାଚ ଖେଳାଯିବ । ଜୁନ 16ରେ ମଧ୍ୟ ପାକିସ୍ତାନ ବିପକ୍ଷ ମ୍ୟାଚ । ତେବେ ପାକିସ୍ତାନ ବିପକ୍ଷ ହାଇଭୋଲଟେଜ ମ୍ୟାଚରୁ ଧଓ୍ବନ ବିରତ ରହିବେ । ଯଦି ସେ ଫିଟ ହୋଇଯାଆନ୍ତି ତେବେ 22 ଜୁନରେ ଆଫଗାନିସ୍ଥାନ ବିପକ୍ଷ ମ୍ୟାଚ ଖେଳିବେ ।
ତେବେ ଧୱନଙ୍କ ଆହତ ହେବା ପନ୍ତଙ୍କ ପାଇଁ ବିଶ୍ବକପରେ ଯୋଗ ଦେବା ନେଇ ନୂତନ ଆଶା ସଞ୍ଚାର କରିଛି । ବିଶ୍ବକପ ପାଇଁ ଟିମ ଚୟନ ସମୟରେ ଦିନେଶ କାର୍ତ୍ତୀକ 21 ବର୍ଷୀୟ ଏହି ଯୁବ ଖେଳାଳିଙ୍କୁ ପଛରେ ପକାଇ ବିଶ୍ବକପ ପାଇଁ ନିଜ ସ୍ଥାନ ପକ୍କା କରିଥିଲେ । ଏବେ କିନ୍ତୁ ସେ ପ୍ରସ୍ତୁତ ହୋଇ ରହିଛନ୍ତି ଯେକୌଣସି ମୁହୂର୍ତ୍ତରେ ତାଙ୍କୁ ଇଂଲଣ୍ଡ ଯିବାକୁ ପଡିପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
