ନୂଆଦିଲ୍ଲୀ: ବିଶ୍ବକପରେ ଭାରତ ବିପକ୍ଷରେ ପରାଜୟ ପରେ ଯେମିତି ନିଆଁ ଲାଗିଯାଇଛି ପାକିସ୍ତାନୀ ଫ୍ୟାନ୍ସଙ୍କ ମନରେ । ପାକିସ୍ତାନର ସମସ୍ତ ପରାଜୟ ତାଙ୍କୁ ଯେତିକି ଦୁଃଖ ଦେଇନଥିଲା, ଭାରତ ଠାରୁ ପରାଜୟ ପାକ୍ ଫ୍ୟାନ୍ସଙ୍କୁ ଅଧିକ ହତାସ ଓ ନିରାଶ କରିଛି । ତେବେ ଏହି ପରାଜୟ ପରେ ରାଗରେ ନିଆଁବାଣ ହୋଇ ଜଣେ ପାକିସ୍ତାନୀ କ୍ରିକେଟ ଫ୍ୟାନ ପାକିସ୍ତାନ କ୍ରିକେଟ ଟିମ ସହ ଚୟନ କମିଟିକୁ ବ୍ୟାନ କରିବା ପାଇଁ ଲାହୋରସ୍ଥିତ ଗୁରଜନୱାଲା ସିଭିଲ କୋର୍ଟରେ ଏକ ପିଟିସନ ଦାଏର କରିଛନ୍ତି ।
ଭାରତଠୁ ହାରିବା ପରେ ପାକିସ୍ତାନ ଖେଳାଳିଙ୍କୁ କଡା ସମାଲୋଚନାର ଶିକାର ହେବାକୁ ପଡିଛି । ରବିବାର ମଞ୍ଚେଷ୍ଟର ଠାରେ ଭାରତ ଠାରୁ 89 ରନରେ ହାରିବା ପରେ ପୂର୍ବତନ ଖେଳାଳି ମାନେ ମଧ୍ୟ ଖୁବ ସମାଲୋଚନା କରିଛନ୍ତି ପାକିସ୍ତାନ ଟିମକୁ । 5 ଟି ମ୍ୟାଚରୁ 3 ପଏଣ୍ଟ ପାଇ ପଏଣ୍ଟ ଟେବୁଲରେ ନବମ ସ୍ଥାନରେ ରହିଛି ପାକ ।
ପିଟିସନ ଦାଖଲ କରିଥିବା ବ୍ୟକ୍ତି ଯାହାଙ୍କ ନାଁ ଜଣା ପଡିନାହିଁ । ବର୍ତ୍ତମାନ ବିଶ୍ବକପ ଖେଳୁଥିବା ଟିମକୁ ବ୍ୟାନ କରିବା ସହ ଇଞ୍ଜାମାମ-ଉଲ-ହକଙ୍କ ନେତୃତ୍ୱାଧିନ ଚୟନ କମିଟିକୁ ମଧ୍ୟ ବ୍ୟାନ କରିବା ପାଇଁ ଅପିଲ କରିଛନ୍ତି । ପାକିସ୍ତାନର ଏକ ଗଣମାଧ୍ୟମ ସାମା(SAMAA) ଏହି ସୂଚନା ଦେଇଛି । ପିଟିସନକୁ ଆଧାର କରି ଗୁରଜନ ସିଭିଲ କୋର୍ଟ ବିଚାରପତି ପାକିସ୍ତାନ କ୍ରିକେଟ ବୋର୍ଡର କାର୍ଯ୍ୟକର୍ତ୍ତାଙ୍କୁ ସମନ ଜାରି କରିଥିବା ଜଣାପଡିଛି ।