'ସାମାଜିକ ଦୂରତ୍ବ ରକ୍ଷା କର କିନ୍ତୁ ଆକ୍ରାନ୍ତଙ୍କୁ ସମାଜରୁ ବହିଷ୍କୃତ କରନି'

ସାମାଜିକ ଦୂରତ୍ବ ଅବଲମ୍ବନ କରନ୍ତୁ କିନ୍ତୁ କୋରୋନା ପଜିଟିଭଙ୍କୁ ସମାଜରୁ ବହିଷ୍କାର କରନ୍ତୁ ନାହିଁ । ସେମାନେ ଯେପରି ଲଜ୍ୟା ଅନୁଭବ ନକରନ୍ତି ସେଥିପ୍ରତି ସମସ୍ତେ ଧ୍ୟାନ ଦେବା ଉଚିତ୍‌ ।

ମୁମ୍ବାଇ: କୋରୋନାକୁ ନେଇ ଚିନ୍ତିତ ସାରା ବିଶ୍ବ । ଏହି ସମୟରେ ଭାରତରେ ଲକ୍‌ ଡାଉନ୍‌ ଜାରି ହୋଇଛି । ତେବେ କୋରୋନା ସଂକ୍ରମିତ ହେଉଥିବା ବ୍ୟକ୍ତିଙ୍କ ସହ କିପରି ବ୍ୟବହାର କରିବା ଦରକାର ଏନେଇ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ଏକ ଭିଡିଓ ମାଧ୍ୟମରେ ସମସ୍ତଙ୍କୁ ସଚେତନ କରାଇଛନ୍ତି ।

ସଚିନ ତାଙ୍କର ଟ୍ବିଟରରେ ଏକ ଭିଡିଓ ପୋଷ୍ଟ କରିଛନ୍ତି । ସେ କହିଛନ୍ତି ଯେ, ଏକ ସମାଜର ସଚେତନତା ନାଗରିକ ଭାବେ ଆମର ଦାୟିତ୍ବ ହେଲା ପଜିଟିଭ ବ୍ୟକ୍ତିଙ୍କୁ ସ୍ନେହ ଦେବା ଓ ସେମାନେ ଯେପରି ଲଜ୍ୟା ଅନୁଭବ ନକରନ୍ତି ସେଥି ପ୍ରତି ଧ୍ୟାନ ଦେବା ଉଚିତ୍‌ । ସତର୍କତା ଅବଲମ୍ବନ କରନ୍ତୁ । ସାମାଜିକ ଦୂରତ୍ବ ଅବଲମ୍ବନ କରନ୍ତୁ କିନ୍ତୁ ସେମାନଙ୍କୁ ସମାଜରୁ ବହିଷ୍କାର କରନ୍ତୁ ନାହିଁ । ସମସ୍ତଙ୍କ ସହଯୋଗ ମାଧ୍ୟମରେ କୋରୋନା ଲଢେଇରେ ଆମେ ଜିତି ପାରିବା ।

ଭାରତରେ କୋରୋନା ସଂକ୍ରମିତଙ୍କ ସଂଖ୍ୟା 700 ଟପିଥିବାବେଳେ ମୃତକଙ୍କ ସଂଖ୍ୟା 19ରେ ପହଞ୍ଚିଲାଣି ।