ବ୍ରିସବେନ: ଶାର୍ଦ୍ଦୁଳ ଠାକୁର ଓ ୱାସିଂଟନ ସୁନ୍ଦରଙ୍କୁ ପ୍ରଶଂସା କରିଛନ୍ତି ଅଷ୍ଟ୍ରେଲୀୟ ଦ୍ରୁତ ବୋଲର ଜସ ହେଜେଲଉଡ । ମିଚେଲ ଷ୍ଟାର୍କ, ହେଜଲଉଡ, କମିନ୍ସ ଓ ନାଥନ ଲାୟନଙ୍କ ପରି ବୋଲରଙ୍କ ଭଳି ବିଶ୍ବର ଅନ୍ୟତମ ଶ୍ରେଷ୍ଠ ବୋଲିଂ ଆକ୍ରମଣକୁ ସକରାତ୍ମକ ରଣନୀତି ସହ ସଫଳ ସାମ୍ନା କରିଥିବା ଦୁଇ ଭାରତୀୟ ଶେଷକ୍ରମ ଖେଳାଳିଙ୍କୁ ସବୁମହଲରୁ ପ୍ରଶଂସା କରାଯାଉଛି । ବ୍ରିସବେନରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ସିରିଜ ନିର୍ଣ୍ଣାୟକ ଟେଷ୍ଟରେ ଲଢୁଆ ପ୍ରଦର୍ଶନ କରିଛି ଭାରତ । ପ୍ରଥମ ଇଂନିସରେ ମାର୍ନସ ଲବୁସାନଙ୍କ ଶତକ ଓ କ୍ୟାପଟେନ ଟିମ ପେନଙ୍କ ଅର୍ଦ୍ଧଶତକ ଭଲରେ 369 ରନର ବିଶାଳ ସ୍କୋର କରିଛି ଘରୋଇ ଦଳ ।
ପରେ ଭାରତ ମଧ୍ୟ ଲଢୁଆ ଜବାବ ସହ 336 ରନ କରିଛି । ତେବେ 186 ରନରେ 6 ପ୍ରମୁଖ ଆଗଧାଡିର ବ୍ୟାଟ୍ସମ୍ୟାନଙ୍କୁ ହରାଇ ସଙ୍କଟରେ ପଡିଥିଲା ଭାରତ । ମାତ୍ର ସ୍ପିନର ୱାସିଂଟନ ସୁନ୍ଦର ଓ ଦ୍ରୁତ ବୋଲର ଶାର୍ଦ୍ଦୁଳ ଠାକୁର 7ମ ୱିକେଟ ଯୋଡିରେ ଅବିଶ୍ବସନୀୟ ରେକର୍ଡ ଶତକୀୟ ଭାଗିଦାରୀ କରିଥିଲେ । ଉଭୟ ସୁନ୍ଦର ଓ ଠାକୁର ପ୍ରାୟ 34 ଓଭର ଅଷ୍ଟ୍ରେଲୀୟ ବୋଲରଙ୍କୁ ୱିକେଟ ଦେଇନଥିଲେ ।