କେପ ଟାଉନ: ଇଣ୍ଡିଆନ ପ୍ରିମିୟର ଲିଗ(ଆଇପିଏଲ)ର 14ତମ ସଂସ୍କରଣରୁ ଓହରିଲେ ଦକ୍ଷିଣ ଆଫ୍ରିକା ଦ୍ରୁତ ବୋଲର ଡେନ ଷ୍ଟେନ୍ । ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆରସିବି) ପକ୍ଷରୁ ଖେଳୁଥିଲେ ଷ୍ଟେନ । ଶନିବାର ଆଇପିଏଲ 2021 ଖେଳିବେ ନାହିଁ ବୋଲି ଘୋଷଣା କରିଛନ୍ତି ଷ୍ଟେନ ।
ତେବେ କ୍ରିକେଟରୁ ସନ୍ୟାସ ଖବରକୁ ଖଣ୍ଡନ କରିବା ସହ କିଛି ସମୟ ପାଇଁ କ୍ରିକେଟରୁ ବିରତି ନେଉଥିବା କହିଛନ୍ତି ଷ୍ଟେନ । ସେହିପରି ଆରସିବି ପକ୍ଷରୁ କିମ୍ବା ଅନ୍ୟ କୌଣସି ଫ୍ରାଞ୍ଚାଇଜ ପକ୍ଷରୁ ଖେଳିବେ ନାହିଁ ବୋଲି ଘୋଷଣା କରିଛନ୍ତି । ଆରସିବିକୁ ଧନ୍ୟବାଦ ଦେବାସହ ଅବସର ନେଉନଥିବା ସ୍ପଷ୍ଟ କରିଛନ୍ତି ।
ନିଜ ଦେଶର ସର୍ବକାଳୀନ 439 ୱିକେଟ ସହ ରେଡ୍ ବଲ କ୍ରିକେଟରୁ ଗତ ବର୍ଷ ସନ୍ୟାସ ନେଇସାରିଛନ୍ତି ଷ୍ଟେନ । ସଦ୍ୟ ଘୋଷିତ ଦଶନ୍ଧିର ଶ୍ରେଷ୍ଠ ଆଇସିସି ଟେଷ୍ଟ ଟିମରେ ତାଙ୍କର ନାମ ରହିଛି ।