ଆବୁଧାବି: ସୁପରସନଡେରେ 2ଟି ଧମାକାଦାର ମ୍ୟାଚ ଦେଖିବାକୁ ମିଳିଥିଲା । ରବିବାରର ଡବଲହେଡର 2ୟ ମ୍ୟାଚରେ ରାଜସ୍ଥାନ ଡିଫେଣ୍ଡିଂ ଚମ୍ପିଆନ ମୁମ୍ବାଇ ଇଣ୍ଡିଆନ୍ସକୁ 8 ଓ୍ବିକେଟରେ ମାତ୍ ଦେଇଛି । ତେବେ ଦମଦାର ଇଂନିସ ଖେଳିଥିବା ବେନ ଷ୍ଟୋକ୍ସଙ୍କୁ ମିଳିଛି ମ୍ୟାନ ଅଫ୍ ଦି ମ୍ୟାଚ । ଷ୍ଟୋକ୍ସ 60 ବଲ୍ରେ 107*ରନ୍ର ଇଂନିସ ଖେଳିଛନ୍ତି ।
ଏହି ବିଜୟ ପରେ ରାଜସ୍ଥାନର ପ୍ଲେଅଫ୍ରେ ସ୍ଥାନ ବଜାୟ ରଖିବାର ଆଶା ଆହୁରି ମଜବୁତ ହୋଇଛି । ଏବେ ବାକି 2ଟି ମ୍ୟାଚରେ ଦଳକୁ ବିଜୟର ଆବଶ୍ୟକତା ରହିଛି ।
ଟସ୍ ଜିତି ପ୍ରଥମେ ମୁମ୍ବାଇ ବ୍ୟାଟିଂ ନିଷ୍ପତ୍ତି ନେଇଥିଲା । ଦଳ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା ସର୍ବାଧିକ 60* ରନ୍ କରିଥିବାବେଳେ ସୂର୍ଯ୍ୟକୁମାର 40, ଇଶାନ କିଷାନ 37, ସୌରଭ ତିଓ୍ବାରୀ 34ରନ, ଡଡି କକ୍ 6, ପୋଲାର୍ଡ 6 ଓ କୃଣାଲ ପାଣ୍ଡ୍ୟା 3ରନ୍ ସଂଗ୍ରହ କରିଥିଲେ । ତେବେ ନିର୍ଦ୍ଧାରିତ ଓଭରରେ 5ଓ୍ବିକେଟ ହରାଇ 195ରନ୍ ରହିଥିଲା ।