ଶାରଜାହ: ଚଳିତ ଲିଗ୍ର 28ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ବିଶାଳ ବିଜୟ । କୋଲକାତା ନାଇଟ ରାଇଡର୍ସକୁ 82ରନ୍ରେ ମାତ୍ ଦେଇ 5ମ ବିଜୟ ହାସଲ କରିଛି ବିରାଟଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର । ଏହି ବିଜୟ ପରେ ପଏଣ୍ଟ ଟେବୁଲରେ 10 ପଏଣ୍ଟ ସହ 3ୟସ୍ଥାନରେ ରହିଛି ଆରସିବି ।
ତେବେ ଏହି ମ୍ୟାଚରେ 73*ରନ୍ର ବିସ୍ଫୋରକ ଇଂନିସ ଖେଳିଥିବା ଏବି ଡି ଭିଲିୟର୍ସଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ମିଳିଛି ।
ସୋମବାର ଶାରଜାହ ଷ୍ଟାଡିୟମରେ 28ତମ ମ୍ୟାଚ ଖେଳାଯାଇଥିଲା । ଏହି ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା । ଆରସିବି ନିର୍ଦ୍ଧାରିତ 20 ଓଭରରେ 2 ୱିକେଟ ହରାଇ 194 ରନ ସଂଗ୍ରହ କରିଥିଲା । ବାଙ୍ଗାଲୋର ପକ୍ଷରୁ ଏବି ଡି ଭିଲିୟର୍ସଙ୍କ ଠାରୁ ପ୍ରତୀକ୍ଷିତ ଦର୍ଶନୀୟ ଇଂନିସ ଦେଖିବାକୁ ମିଳିଛି । ଧୂଆଁଧାର ବ୍ୟାଟିଂ ପାଇଁ ଜଣାଶୁଣା ଏବି, 33 ବଲରୁ 5 ଚୌକା ଓ 6 ଛକା ସହାୟତାରେ 73 ରନର ଅର୍ଦ୍ଧଶତକୀୟ ଇଂନିସ ଖେଳିଥିଲେ । ଓପନର ଆରୋନ ଫିଞ୍ଚ 37 ବଲରୁ 47 ଓ ଦେବଦତ୍ତ ପାଦିକଲ 32 ରନର ଇଂନିସ ଖେଳିଥିଲେ । କ୍ୟାପଟେନ ବିରାଟ କୋହଲି 28 ବଲରୁ 33 ରନର ଅପରାଜିତ ଇଂନିସ ଖେଳିଛନ୍ତି ।