ହାଇଦ୍ରାବାଦ: ଅନେକ ସମସ୍ୟା ଦେଇ ଏବେ ଗତି କରୁଛି ପାକିସ୍ତାନ କ୍ରିକେଟ ଦଳ । ଇଂଲଣ୍ଡ ଗସ୍ତ ପୂର୍ବରୁ ଦଳର 10 ଖେଳାଳି କୋରୋନା ଆକ୍ରାନ୍ତ ଭାବେ ଚିହ୍ନଟ ହୋଇଥିଲେ । ଆଉ ଏବେ ଦଳ ଇଂଲଣ୍ଡ ପହଞ୍ଚିବା ପରେ ଦଳୀୟ ଜର୍ସି ପାଇଁ ମିଳୁନାହିଁ ପ୍ରାୟୋଜକ(ସ୍ପୋନ୍ସର) । ଏହା ଏକ ଲଜ୍ଜାଜନକ ବିଷୟ ପାଲଟିଛି ।
ଉଲ୍ଲେଖଥାଉ କି, ପାକିସ୍ତାନ କ୍ରିକେଟ ଦଳର ଅଫିସିଆଲ୍ସ ସ୍ପୋନ୍ସର ଥିବା ମୃଦୁ ପାନୀୟ ପେପ୍ସିର ଚୁକ୍ତି ଗତ ମାସରେ ଶେଷ ହୋଇସାରିଛି । ତେଣୁ ବର୍ତ୍ତମାନ ଦଳ ଜର୍ସି ତଥା ଟ୍ରେନିଂ କିଟ୍ ଉପରେ ଲାଗିବା ପାଇଁ କୌଣସି ସ୍ପୋନ୍ସର ନାହିଁ । ଅନ୍ୟପଟେ ପେପସୀ ତାର ଚୁକ୍ତିକୁ ଚଳିତ କ୍ରିକେଟ ଋତୁ ପାଇଁ ପୁନର୍ବାର ରଖିବାକୁ ଚାହୁଁ ନାହିଁ । ଯାହା ଏବେ ପାକିସ୍ତାନ କ୍ରିକେଟ ବୋର୍ଡ (ପିସିବି) ପାଇଁ ମୁଣ୍ଡ ବିନ୍ଧା କାରଣ ପଲଟିଛି ।
ଦଳର ମୁଖ୍ୟ ପ୍ରଶିକ୍ଷକ ମିସବାହ-ଉଲ-ହକ ପାକିସ୍ତାନର ପ୍ରଶିକ୍ଷଣ ଅଧିବେଶନରେ ପୂର୍ବ ପ୍ରୟୋଜକ ଲୋଗୋ ଲାଗିଥିବା ଏକ ପୁରୁଣା ସ୍ବେଟର ପିନ୍ଧିଥିବାର ନଜର ଆସିଥିଲେ । ସେହିପରି ବର୍ତ୍ତମାନ ପାକିସ୍ତାନର କ୍ରିକେଟ କିଟ୍ରେ କେବଳ ପିସିବିର ଲୋଗ ରହିଛି । ଏହା ଛଡା ଅନ୍ୟ କୌଣସି ଘରୋଇ ସଂସ୍ଥା ଦଳର କିଟ୍କୁ ପ୍ରାୟୋଜିତ କରୁନାହିଁ । ତେବେ କିଛି ଦିନ ତଳେ ହୋଇଥିବା ବିଡିଂ ପ୍ରକ୍ରିୟାରେ କେବଳ ଗୋଟିଏ କମ୍ପାନୀ ପ୍ରାୟୋଜକ ପାଇଁ ଆଗ୍ରହ ପ୍ରକାଶ କରିଥିଲା । ମାତ୍ର ଆଶ୍ଚର୍ଯ୍ୟଜନକ ଭାବେ, ବିଡିଂ ପ୍ରକ୍ରିୟାରେ ଉକ୍ତ କମ୍ପାନୀ ପୂର୍ବ ଚୁକ୍ତି ତୁଳନାରେ ମାତ୍ର 30 ପ୍ରତିଶତ ମୂଲ୍ୟ ଦେବାକୁ ରାଜି ହୋଇଥିଲା । ତେବେ ପ୍ରାୟୋଜକମାନଙ୍କ ଅଭାବକୁ ନେଇ ପିସିବି ଚିନ୍ତିତ ଥିବାବେଳେ ବୋର୍ଡର ମାର୍କେଟିଂ ବିଭାଗ ଏହି କୋରୋନା ମହାମାରୀକୁ ପ୍ରାଥମିକ କାରଣ ବୋଲି କହିଛି ।