ଦୁବାଇ: ଆଇପିଏଲ 2020ରେ ଦିଲ୍ଲୀ କ୍ୟାପିଟାଲ୍ସ ପାଇଁ ଖେଳୁଥିବା ଭାରତୀୟ ଓପନର ଶିଖର ଧୱନ କହିଛନ୍ତି ଯେ ସେ କୋଭିଡ-19 ଦ୍ବାରା ସଂକ୍ରମିତ ହୋଇଗଲେ ମଧ୍ୟ ମାରାତ୍ମକ ଭାଇରସ ସହ ମୁକାବିଲା କରିପାରିବେ । ତାଙ୍କ ଶରୀର ଉପରେ ତାଙ୍କର ଖୁବ ବିଶ୍ବାସ ଅଛି ବୋଲି କହିଛନ୍ତି ଧୱନ । ମହାମାରୀ ଯୋଗୁଁ ସେ କେବେ କ୍ରିକେଟକୁ ଫେରିପାରିବେ ନାହିଁ ବୋଲି ଭୟ କରିଛନ୍ତି କି ବୋଲି ଏକ ପ୍ରଶ୍ନର ଉତ୍ତରରେ ଧୱନ କହିଛନ୍ତି: “ମୋର ଶରୀର ଉପରେ ମୋର ସମ୍ପୂର୍ଣ୍ଣ ବିଶ୍ବାସ ଅଛି, ଖେଳିବା ବିଷୟରେ କେବେ ବି ଭୟଭୀତ ନଥିଲି। ମୁଁ ଜାଣେ ମୁଁ ଯଦି ଏହି ରୋଗରେ ସଂକ୍ରମିତ ବି ହୁଏ ମୁଁ ଏହାର ମୁକାବିଲା କରିପାରିବି।”
ବାମହାତୀ ବ୍ୟାଟ୍ସମ୍ୟାନ ଏହା ମଧ୍ୟ କହିଛନ୍ତି ଯେ ସମସ୍ତ ଖେଳାଳି ବିସିସିଆଇ ଏବଂ ସମ୍ପୃକ୍ତ ଫ୍ରାଞ୍ଚାଇଜ ଦ୍ବାରା ନିର୍ଦ୍ଦେଶିତ ନିର୍ଦ୍ଦେଶାବଳୀକୁ କଡାକଡି ପାଳନ କରୁଛନ୍ତି। ଧୱନ କହିଛନ୍ତି ଯେ, ‘‘ଆମେ ନିଶ୍ଚିତ ଭାବରେ ସୁରକ୍ଷା ନିର୍ଦ୍ଦେଶାବଳୀ ଅନୁସରଣ କରୁଛୁ । ଏହାସହ ପ୍ରାୟ 8-9 ଥର କୋଭିଡ ପରୀକ୍ଷା ଦେଇଛୁ।’’