ଦୁବାଇ: ବିରାଟ କୋହଲି ଓ ପତ୍ନୀ ଅନୁଷ୍କା ଶର୍ମାଙ୍କୁ ନେଇ ବିବାଦୀୟ ମତ ରଖି ଚର୍ଚ୍ଚାରେ କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କର । ଗାଭାସ୍କରଙ୍କ ଟିପ୍ପଣୀ ପରେ ଅନୁଷ୍କା ଏହାକୁ ସ୍ବାଦହୀନ(ଡିସଟେଷ୍ଟଫୁଲ) କହିବା ସହ, ବିସ୍ତୃତ ଉତ୍ତର ରଖିଛନ୍ତି ।
ଚଳିତ ଆଇପିଏଲରେ କୋହଲିଙ୍କ ଟିମ ଆରସିବି, କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷ ମ୍ୟାଚରେ ଶୋଚନୀୟ ପରାଜୟ ଭୋଗିଥିଲା । ମ୍ୟାଚରେ କୋହଲିଙ୍କ ପ୍ରଦର୍ଶନ ମଧ୍ୟ ନୈରାଶାଜନକ ରହିଥିଲା ।
ଗୁରୁବାର ଖେଳାଯାଇଥିବା ଲୋକେଶ ରାହୁଲଙ୍କ ପଞ୍ଜାବ ଟିମ ବିପକ୍ଷ ମ୍ୟାଚରେ କୋହଲି ଦୁଇଟି ଗୁରୁତ୍ବପୂର୍ଣ୍ଣ କ୍ୟାଚ ହାତଛଡା କରିଥିଲେ । ମ୍ୟାଚର 17 ତମ ଓଭରରେ ପଞ୍ଜାବ କ୍ୟାପଟେନ କେଏଲ ରାହୁଲ 83 ରନରେ ଥିବାବେଳେ ଗୋଟିଏ କ୍ୟାଚ ଓ ଅନ୍ୟଟି 18ତମ ଓଭରରେ 89 ରନରେ ବ୍ୟାଟିଂ କରୁଥିବାବେଳେ କୋହଲି ହାତଛଡା କରିଥିଲେ । ଏହାପରେ ରାହୁଲ 69 ବଲରୁ 132 ରନର ରେକର୍ଡ ଶତକୀୟ ଇଂନିସ ଖେଳିଥିଲେ । ଏହି ସ୍କୋର ଆଇପିଏଲ ଟୁର୍ଣ୍ଣାମେଣ୍ଟ ଇତିହାସରେ ଭାରତୀୟ ଖେଳାଳି ଭାବେ ସର୍ବାଧିକ ବ୍ୟକ୍ତିଗତ ସ୍କୋର । ତେବେ ବିଜୟ ଲକ୍ଷ୍ୟକୁ ପିଛା କରୁଥିବାବେଳେ, ବିଶ୍ବର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ କୋହଲି 5ଟି ବଲରୁ ମାତ୍ର 1 ରନ କରିବାକୁ ସମର୍ଥ ହୋଇଥିଲେ ।