ନୂଆଦିଲ୍ଲୀ:ଭାରତୀୟ ଖେଳାଳିଙ୍କ ମୁହଁରେ ପାକିସ୍ତାନ ଖେଳାଳିଙ୍କ ପ୍ରଶଂସା । ପାକିସ୍ତାନ କ୍ରିକେଟ ଟିମ୍ର ଅଧିନାୟକ ବାବର ଆଜମଙ୍କୁ ପ୍ରଶଂସା କଲେ ଭାରତୀୟ କ୍ରିକେଟର ବିରାଟ କୋହଲି । କ୍ରିକେଟର ସବୁ ଫର୍ମାଟରେ ବାବରଙ୍କ ପ୍ରଦର୍ଶନ ବେଶ ପ୍ରଶଂସ ଯୋଗ୍ୟ । ସମସ୍ତ ଫର୍ମାଟରେ ସେ ବିଶ୍ବର ଜଣେ ଭଲ ବ୍ୟାଟ୍ସମ୍ୟାନ ବୋଲି କହିଛନ୍ତି ବିରାହ କୋହଲି । ଏକ ସ୍ପୋର୍ଟ୍ସ ଚ୍ୟାନେଲରେ ଏହି ପ୍ରତିକ୍ରିୟା ଦେଇଛନ୍ତି ବିରାଟ ।
କୋହଲି ପାକିସ୍ତାନର କ୍ରିକେଟ ଟିମ୍ର ଷ୍ଟାର୍ ବ୍ୟାଟର ବାବର ଆଜମଙ୍କ ପ୍ରଶଂସା କରିବା ସହ ତାଙ୍କ ସହ ହୋଇଥିବା ପ୍ରଥମ ସାକ୍ଷାତକୁ ମଧ୍ୟ ମନେ ପକାଇଥିଲେ । କୋହଲି କହିଥିଲେ, "2019 ମସିହାରେ ମାଞ୍ଚେଷ୍ଟରରେ ଆୟୋଜିତ ହୋଇଥିବା ଦିନିକିଆ ବିଶ୍ବକପ ପରେ ବାବରଙ୍କ ସହ ମୋର ପ୍ରଥମ ସାକ୍ଷାତ ହୋଇଥିଲା। ଅଣ୍ଡର-19 ବିଶ୍ୱକପ ପରଠାରୁ ମୁଁ ଇମାଦ ୱାସିମଙ୍କୁ ଜାଣିଛି । ବାବର ମୋ ସହ କଥା ବାର୍ତ୍ତା ହେବାକୁ ଇଚ୍ଛା ପ୍ରକାଶ କରୁଥିବା ଇମାଦ ମୋତେ କହିଥିଲେ । ପରେ ବାବର ଆଉ ମୁଁ ଏକାଠି ବସି ଖେଳ ବିଷୟରେ କଥା ହୋଇଥିଲୁ । ସାକ୍ଷାତକାରର ପ୍ରଥମ ଦିନରୁ ହିଁ ସେ ମୋତେ ବହୁତ ସମ୍ମାନ କରନ୍ତି । ତାହା ଆଜି ପର୍ଯ୍ୟନ୍ତ ମଧ୍ୟ ପରିବର୍ତ୍ତନ ହୋଇନାହିଁ । ସେ ଯାହାବି ହେଉନା କାହିଁକି, ସେ କ୍ରିକେଟର ସବୁ ଫର୍ମାଟରେ ବିଶ୍ବର ଜଣେ ଶ୍ରେଷ୍ଠ ବ୍ୟାଟ୍ସମ୍ୟାନ। ଏହା ସତ ମଧ୍ୟ ।"