ଦୁବାଇ: ଚଳିତ ଏସିଆ କପ୍ ମ୍ୟାଚରେ ଆଜି (ବୁଧବାର) ଚତୁର୍ଥ ମ୍ୟାଚ ଖେଳାଯିବ । ଭାରତ ଓ ହଂକଂ ପରସ୍ପରକୁ ଭେଟିବେ । ପ୍ରଥମ ମ୍ୟାଚରେ ପାକିସ୍ତାନକୁ ହରାଇ ଭାରତ ଦୃଢ ମନୋବଳରେ ରହିଛି । ଆଜିର ମ୍ୟାଚ ଜିତି ବିଜୟ ଧାରା ଜାରି ରଖିବାକୁ ଲକ୍ଷ୍ୟ ରଖିଛି ଟିମ ଇଣ୍ଡିଆ । ପ୍ରଥମ ମ୍ୟାଚ ଜିତିବା ପରେ ଭାରତୀୟ ଦଳର ନଜର ଏବେ ସୁପର ଫୋର ରାଉଣ୍ଡ ଉପରେ ରହିଛି । ହଂକଂକୁ ହରାଇବା ସହ ଲିଗ୍ ପର୍ଯ୍ୟାୟରେ ଅପରାଜେୟ ରହି ପରବର୍ତ୍ତୀ ରାଉଣ୍ଡରେ ପ୍ରବେଶ କରିବାକୁ ଭାରତ ଯୋଜନା କରିଛି । ଅନ୍ୟପଟେ ଏସିଆ କପକୁ ଯୋଗ୍ୟତା ଅର୍ଜନ କରିଥିବା ହଂକଂ ଏକ ଶକ୍ତିଶାଳୀ ଦଳ ବିପକ୍ଷରେ ଶ୍ରେଷ୍ଠ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛନ୍ତି । ଦଳ ବିଜୟରୁ ଅଭିଯାନ ଆରମ୍ଭ କରିବାକୁ ଯୋଜନା କରିଛି ।
ତେବେ ହଂକଂକୁ ହାଲୁକା ଭାବେ ନ ନେଇ ଶ୍ରେଷ୍ଠ ଏକାଦଶକୁ ନେଇ ଗ୍ରାଉଣ୍ଡକୁ ଓହ୍ଲାଇବ ରୋହିତ ବାହିନୀ । ପାକିସ୍ତାନ ବିପକ୍ଷରେ ଦୁର୍ବଳ ହୋଇଥିବା ଲୋକେଶ ରାହୁଲ ହଂକଂ ବିପକ୍ଷରେ ଫର୍ମକୁ ଫେରିବେ ବୋଲି ଆଶା କରାଯାଉଛି । ରାହୁଲ ନିଶ୍ଚୟ ଆଜି ଭଲ ପ୍ରଦର୍ଶନ କରିବାକୁ ପ୍ରୟାସ କରିବେ । ମଧ୍ୟ ଭାଗରେ ଋଷବ ପନ୍ତଙ୍କୁ ସୁଯୋଗ ଦେବାକୁ ଦଳ ଚିନ୍ତା କରୁଛି । ପାକିସ୍ତାନ ବିପକ୍ଷରେ ହାର୍ଦ୍ଦିକ ପାଣ୍ଡ୍ୟାଙ୍କ ଅଲରାଉଣ୍ଡ ପ୍ରଦର୍ଶନ ବିଜୟରେ ପ୍ରମୁଖ ଭୂମିକା ତୁଲାଇଥିଲା । ହଂକଂ ବିପକ୍ଷରେ ମଧ୍ୟ ପାଣ୍ଡ୍ୟାଙ୍କ ପ୍ରଦର୍ଶନ ଉପରେ ନଜର ରହିବ । ଭାରତର ବୋଲିଂ ବିଭାଗରେ ପରିବର୍ତ୍ତନ ଆଶା କରାଯାଉଛି । ଭେଟେରାନ ରବି ଚନ୍ଦ୍ରନ ଅଶ୍ବିନୀ କିମ୍ବା ରବି ବିଷ୍ଣୋଇଙ୍କୁ ଏକାଦଶରେ ସ୍ଥାନ ମିଳିପାରେ ।