ନୂଆଦିଲ୍ଲୀ: ତାମିଲ ଚଳଚ୍ଚିତ୍ର ଜଗତରେ ଖୁବ୍ ସୁନ୍ଦର ଭାବେ ବାସ୍ତବତାକୁ ପ୍ରସ୍ଫୁଟିତ କରିଥିଲେ ଫିଲ୍ମ ନିର୍ମାତା ତଥା ନିର୍ଦ୍ଦେଶକ ଜେ ମହେନ୍ଦ୍ରନ । କେବଳ ଯେ ଜଣେ ସଫଳ ଫିଲ୍ମ ନିର୍ମାତା ନୁହେଁ ବରଂ ସାଉଥ ସୁପରଷ୍ଟାର ରଜନୀକାନ୍ତଙ୍କୁ ଚଳଚ୍ଚିତ୍ର ଜଗତରେ ନୂଆ ପରିଚୟ ଦେଇଥିବା ବ୍ୟକ୍ତି ଭାବେ ମଧ୍ୟ ସେ ବେଶ୍ ଜଣାଶୁଣା । ଦୀର୍ଘ ଦିନର ଅସୁସ୍ଥତା ଯୋଗୁଁ ସେ ଚେନ୍ନାଇସ୍ଥିତ ଆପୋଲୋ ହସ୍ପିଟାଲରେ ଚିକିତ୍ସିତ ହେଉଥିଲେ । ତେବେ 79 ବର୍ଷ ବୟସରେ ସେ ମଙ୍ଗଳବାର ଶେଷ ନିଶ୍ବାସ ତ୍ୟାଗ କରିଛନ୍ତି ।
ଦୀର୍ଘ ଦିନ ଧରି ସେ ଆପୋଲୋରେ ଚିକିତ୍ସିତ ହେଉଥିବା ବେଳେ ସୋମବାର ରାତିରେ ତାଙ୍କୁ ଘରକୁ ଅଣାଯାଇଥିଲା । ମାତ୍ର ମଙ୍ଗଳବାର ସକାଳେ ସେ ଶେଷ ନିଶ୍ବାସ ତ୍ୟାଗ କରିବା ସହ ତାମିଲ ଚଳଚ୍ଚିତ୍ର ଜଗତରେ ଏକ ଅପୂରଣୀୟ ଶୂନ୍ୟ ସ୍ଥାନ ସୃଷ୍ଟି ହୋଇଛି। ଏହି ଖବର ପ୍ରସାରଣ ହେବା ପରେ ତାମିଲ ଚଳଚ୍ଚିତ୍ର ଜଗତରୁ ଛୁଟିଛି ଶୋକର ସୁଅ ।