ମୁମ୍ବାଇ: ବଲିଉଡରେ ସ୍ଥାନଟିଏ ତିଆରି କରିବା ଲାଗି ଅନେକ ନବାଗତ ସଙ୍ଘର୍ଷ କରିଥାନ୍ତି । ମାୟା ନଗରୀ ମୁମ୍ବାଇରେ ଲାଗିଥାଏ ଆଶାୟୀଙ୍କ ଭିଡ । କିନ୍ତୁ କାମ ନମିଳିଲେ କିଛି ଫେରିଯାଆନ୍ତି ତ କିଛି ଅଲଗା ବ୍ୟବସାୟରେ ଲାଗିଯାଆନ୍ତି । ଆଉ କିଛି ନିରାଶ ହୋଇ ଜୀବନ ହାରିଦିଅନ୍ତି । ସେହିପରି ଏକ ଘଟଣା ନିକଟରେ ଘଟିଛି ।
ମୁମ୍ବାଇର ଲୋଖଣ୍ଡୱାଲା ଅଞ୍ଚଳରେ ଥିବା ନିଜ ଘର ଛାତ ଉପରୁ ଡେଇଁ ମୃତ୍ୟୁକୁ ଆପଣାଇଛନ୍ତି ଜଣେ ନବାଗତ ଅଭିନେତ୍ରୀ । ଶୁକ୍ରବାର ଏହି ଘଟଣାର ସୂଚନା ମିଳିଥିଲା । ୱାଶିୱାରା ପୋଲିସ ଦ୍ବାରା ବର୍ତ୍ତମାନ ଏହି ମାମଲାର ତଦନ୍ତ ଜୋରସୋରରେ ଚାଲିଛି । ଘଟଣାକୁ ନେଇ ଅଧିକା ସୂଚନା ଦେଇନାହିଁ ପୋଲିସ ।
ମୃତକଙ୍କ ପରିଚୟ ପର୍ଲ ପଞ୍ଜାବୀ ରୂପେ କରାଯାଇଛି । ଯିଏ ମାତ୍ର 20 ବର୍ଷର ଥିଲେ । ପ୍ରକାଶ ଥାଉକି ପର୍ଲ ଗୁରୁବାର ରାତିରେ ଘର ଛାତ ଉପରୁ ଡେଇଁ ଆତ୍ମହତ୍ୟା କରିଥିଲେ । ଏହାପରେ ତାଙ୍କୁ କୋକିଲାବେନ ମେଡିକାଲରେ ମୃତ୍ୟୁ ଘୋଷଣା କରାଯାଇଥିଲା ।
ମଡେଲିଂ କରିବା ସହ ପର୍ଲ କିଛି ସମୟରୁ ବଲିଉଡରେ ବ୍ରେକ ପାଇବା ପାଇଁ ସଂଘର୍ଷ କରିଆସୁଥିଲେ । କିନ୍ତୁ ଭାଗ୍ୟ ସାଥ ଦେଇନଥିଲା । ଯାହାଦ୍ବାରା ସେ ମାନସିକ ସ୍ତରରେ ଦୁର୍ବଳ ହୋଇଯାଇଥିଲା ।
ଏପରିକି ସେ ଡିପ୍ରେସନର ଶିକାର ହୋଇଥିବା ସୂଚନା ରହିଥିଲା । ସେ ପ୍ରାୟତଃ ନିଜ ମାଆଙ୍କ ସହ ଝଗଡା କରୁଥିବାର ଅଭିଯୋଗ ମଧ୍ୟ ନୋଟ କରିଛି ପୋଲିସ । ଫଳରେ ସେ ଆତ୍ମହତ୍ୟା ଭଳି ଚରମ ପଦକ୍ଷେପ ଆପଣାଇଥିବା ସୂଚନା ମିଳିଛି ।