ହାଇଦ୍ରାବାଦ: ଆଜି ସିନେ ଜଗତକୁ ସ୍ତବ୍ଧ କରି ଆରପାରିକୁ ଚାଲିଯାଇଛନ୍ତି କନ୍ନଡ ଆକ୍ଟର ପୁନିତ ରାଜକୁମାର । ମାତ୍ର ୪୭ ବର୍ଷ ବୟସରେ ତାଙ୍କର ହୃଦଘାତରେ ଘଟିଛି ମୃତ୍ୟୁ । ଏତେ ଫିଟ ଥାଇ ମଧ୍ୟ ଏପରି ହଠାତ ତାଙ୍କର ମୃତ୍ୟୁ ପରେ ରାଜନେତାଙ୍କଠୁ ଆରମ୍ଭ କରି ଅନେକ କଳାକାର ଶୋକ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ମୋଦିଙ୍କ ଠୁ ଆରମ୍ଭ କରି କର୍ଣ୍ଣାଟକ ମୁଖ୍ୟମନ୍ତ୍ରୀ, ଅଭିନେତା ମହେଶ ବାବୁ ପ୍ରମୁଖ ଶୋକବ୍ୟକ୍ତ କରିଛନ୍ତି । ସେପଟେ ପୁନିତଙ୍କ ଅନ୍ତିମ ସଂସ୍କାର ରାଷ୍ଟ୍ରୀୟ ମର୍ଯାଦାରେ ସମ୍ପନ୍ନ ହେବ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ବସଭରାଜ ବୋମାଇ ।
ପ୍ରଧାନମନ୍ତ୍ରୀ ଟ୍ବିଟ କରି ଲେଖିଛନ୍ତି ଯେ ପୁନିତ ଜଣେ ପ୍ରତିଭାବାନ ଅଭିନେତା ଥିଲେ । ତାଙ୍କର କାମ ପ୍ରତି ଥିବା ଭଲପାଇବା ଓ ନିଷ୍ଠାକୁ ଆଗାମୀ ଯୁବପିଢି ମନେ ପକାଇବେ ବୋଲି କହିଛନ୍ତି ମୋଦି । ଏହାସହିତ ତାଙ୍କ ପରିବାରକୁ ସମବେଦନା ଜଣାଇଛନ୍ତି । ସେପଟେ ବସଭରାଜ ବୋମାଇ ମଧ୍ୟ ଅଭିନେତାଙ୍କ ନିଷ୍ଠାକୁ ମନେ ପକାଇବା ସହିତ ତାଙ୍କ ଅମର ଆତ୍ମାର ସଦଗତି କାମନା କରିଛନ୍ତି । ପୂର୍ବତନ କର୍ଣ୍ଣାଟକ ମୁଖ୍ୟମନ୍ତ୍ରୀ ବି. ଏସ ୟେଦୁରପ୍ପା ମଧ୍ୟ ଟ୍ବିଟ କରି ନିଜର ଶୋକ ପ୍ରକାଶ କରିଛନ୍ତି ।