ଆଖି ବୁଜିଲେ ‘ଉରି: ଦି ସର୍ଜିକାଲ ଷ୍ଟ୍ରାଇକର’ ଏହି ଅଭିନେତା

ଅଭିନେତା ନଭତେଜ ହୁଣ୍ଡଲଙ୍କ ମୃତ୍ୟୁ ଘଟିଛି । ମୃତ୍ୟୁର କାରଣ ଏଯାବତ ଜଣାପଡିନାହିଁ । ତାଙ୍କ ମୃତ୍ୟୁରେ ପରିବାରରେ ଶୋକର ଛାୟା ଖେଳିଯାଇଛି ।

ମୁମ୍ବାଇ: ନିକଟରେ ରିଲିଜ ହୋଇଥିବା ବହୁ ଚର୍ଚ୍ଚିତ ଫିଲ୍ମ 'ଉରି: ଦ ସର୍ଜିକାଲ ଷ୍ଟ୍ରାଇକ'ରେ ଗୃହମନ୍ତ୍ରୀ ଭୂମିକାରେ ନଜର ଆସିଥିବା ଅଭିନେତା ନଭତେଜ ହୁଣ୍ଡଲଙ୍କ ମୃତ୍ୟୁ ଘଟିଛି । ଏଯାବତ ତାଙ୍କ ମୃତ୍ୟୁର ଅସଲ କାରଣ ସାମ୍ନାକୁ ଆସିନାହିଁ । କିନ୍ତୁ CINTAA (ସିନେ ଆଣ୍ଟ ଟିଭି ଆର୍ଟିଷ୍ଟ ଆସୋସିଏଶନ) ତାଙ୍କ ମୃତ୍ୟୁର ସୂଚନା ଦର୍ଶକଙ୍କୁ ଦେଇଛନ୍ତି ।

CINTAA ଟ୍ବିଟରରେ ତାଙ୍କ ମୃତ୍ୟୁ ଖବର ଜଣାଇ ଲେଖିଛି, "ନଭତେଜ ହୁଣ୍ଡଲଙ୍କ ମୃତ୍ୟୁରେ ସମସ୍ତେ ଶୋକରେ ଅଛନ୍ତି । ତାଙ୍କ ଆତ୍ମାକୁ ଶାନ୍ତି ମିଳୁ ।" ଏହାପରେ ଅଭିନେତାଙ୍କ ଅନ୍ତିମ ସଂସ୍କାରର ସୂଚନା ଦିଆଯାଇଛି ।

ପ୍ରକାଶ ଥାଉକି ନଭତେଜଙ୍କ ପରିବାରରେ ତାଙ୍କ ପତ୍ନୀ ଓ ଦୁଇ ସନ୍ତାନ ଅଛନ୍ତି । ତାଙ୍କ ଝିଅ ଅବନ୍ତିକା, ଷ୍ଟାରପ୍ଲସର ପପୁଲରା ଶୋ 'ୟେ ମୋହାବ୍ବତେଂ'ରେ ଅଭିନୟ କରୁଛନ୍ତି ।

'ଉରି' ଫିଲ୍ମ ବ୍ୟତୀତ ନଭତେଜ ଅନେକ ଫିଲ୍ମରେ କାମ କରିସାରିଛନ୍ତି । ସେ ଫିଲ୍ମ 'ଖଳନାୟକ', 'ତେରେ ମେରେ ସପନେ', 'ଦ ୱିସ୍ପରର୍ସ' ଭଳି ଫିଲ୍ମରେ ଶାନଦାର ଅଭିନୟ କରିଥିଲେ ।