ମୁମ୍ବାଇ: ଏପ୍ରିଲ 29ରେ 17ତମ ଲୋକସଭା ନିର୍ବାଚନରେ ଭୋଟ ନଦେବାରୁ ବି-ଟାଉନର ଖିଲାଡୀ ଅକ୍ଷୟ କୁମାର ସୋସିଆଲ ମିଡିଆରେ ଖୁବ୍ ଟ୍ରୋଲର ଶିକାର ହୋଇଥିଲେ । ଏହାପରେ ସେ ଏକ ବୟାନରେ ନିଜ ନାଗରିକତା ଅଧିକାରକୁ ନେଇ ଉଠୁଥିବା ପ୍ରଶ୍ନ ଉପରେ ଜବାବ ଦେଇଥିବାର ନଜର ଆସିଥିଲେ । ଏକ ଟ୍ବିଟ ଜରିଆରେ ମାନିଥିଲେ କି ସେ କାନାଡାର ନାଗରିକ ବୋଲି ।
ଇତି ମଧ୍ୟରେ 'ରଙ୍ଗ ଦେ ବସନ୍ତି' ଫିଲ୍ମର ଅଭିନେତା ସିଦ୍ଧାର୍ଥ ପ୍ରଧାନମନ୍ତ୍ରୀ ମୋଦିଙ୍କ ଅଣ-ରାଜନୈତିକ ସାକ୍ଷାତକାର ଅକ୍ଷୟ ନେଇଥିବାରୁ ତାଙ୍କୁ ଟାର୍ଗେଟ କରିଛନ୍ତି ।
ପିଏମ ମୋଦିଙ୍କ ଅଣ-ରାଜନୈତିକ ସାକ୍ଷାତକାର ନେଇଥିବାରୁ ପୂର୍ବରୁ ଅକ୍ଷୟ ଚର୍ଚ୍ଚାରେ ଥିଲେ । ଯେଉଁଥିରେ ଅକ୍ଷୟ ପିଏମଙ୍କୁ ଆମ୍ବ ପସନ୍ଦ କି ନାହିଁ, ଆମ୍ବ ଚୋପା ଛଡାଇ ଖାଆନ୍ତି କିମ୍ବା କାଟିକି ଖାଆନ୍ତି ଏପରି ପ୍ରଶ୍ନ ପଚାରିଥିଲେ । ଏହାର ମଜାକ ଉଡାଇ ସିଦ୍ଧାର୍ଥ କହିଛନ୍ତି ସେ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ସାକ୍ଷାତକାର ନେବାକୁ ଚାହୁଁଛନ୍ତି ଏବଂ ତାଙ୍କ କାମ କରିବା ଓ ଶୋଇବା ଶୈଳୀ ଉପରେ ପ୍ରଶ୍ନ କରିବାକୁ ଚାହୁଁଛନ୍ତି ।
ସେ ଶୁକ୍ରବାର ଟ୍ବିଟ କରି ଲେଖିଥିଲେ, "ହାଲୋ ଡୋନାଲ୍ଡ ଟ୍ରମ୍ପ, ଆପଣ ଖୁବ୍ ଶୀଘ୍ର ପୁଣି ଚୟନ ହେବେ, କଣ ମୁଁ ଆପଣଙ୍କ ଏକ ସାକ୍ଷାତକାର ନେଇପାରିବି କି ? ମୋ ପାଖରେ ବହୁତ ପ୍ରଶ୍ନ ଅଛି । ଯେମିତି କି ଆପଣ ଫଳ କେମିତି ଖାଉଛନ୍ତି, ଆପଣ କିପରି ଶୋଉଛନ୍ତି, କାମ କରିବାର ଅଭ୍ୟାସ ଆପଣଙ୍କର କିପରି? ଏହାସହ ଆପଣଙ୍କ ଭଲ ବ୍ୟକ୍ତିତ୍ବ ବିଷୟରେ ମଧ୍ୟ ଅନେକ ପ୍ରଶ୍ନ ମୋ ପାଖରେ ଅଛି ।"
ସିଦ୍ଧାର୍ଥ ଆହୁରି କହିଛନ୍ତି କି, ତାଙ୍କ ପାଖରେ ଭାରତୀୟ ପାସପୋର୍ଟ ଅଛି, ଦୟା କରି ସିଧାସଳଖ ତାଙ୍କୁ ମେସେଜ କରନ୍ତୁ । ସିଦ୍ଧାର୍ଥ କିନ୍ତୁ ଟ୍ବିଟରେ କେଉଁଠାରେ ମଧ୍ୟ ଅକ୍ଷୟଙ୍କ ନାମ ନେଇନାହାଁନ୍ତି । ତଥାପି ୟୁଜର୍ସ ବୁଝିସାରିଛନ୍ତି ଯେ, ସେ ଅକ୍ଷୟଙ୍କୁ ହିଁ ଟାର୍ଗେଟ କରିଛନ୍ତି ।
