ମୁମ୍ବାଇ: ଦୁଇଦିନ ପୂର୍ବରୁ ଆୟୁଷ୍ମାନ ଖୁରାନାଙ୍କ ଅପକମିଂ ଫିଲ୍ମ ‘ବାଲା’ ଟ୍ରେଲର ଏବଂ ନୂଆ ରିଲିଜ ତାରିଖ ସାମ୍ନାକୁ ଆସିବା ପରେ ବଲିଉଡରେ ଚହଳ ସୃଷ୍ଟି ହୋଇଛି । ‘ବାଲା’ ମେକର୍ସଙ୍କ ଏହି ନିଷ୍ପତ୍ତି ପରେ ବହୁ ପ୍ରତୀକ୍ଷିତ ରୋମାଣ୍ଟିକ ଡ୍ରାମା ଫିଲ୍ମ ‘ମରଜାୱାଂ’ ର ତୃତୀୟ ଥର ରିଲିଜ ତାରିଖ ପରିବର୍ତ୍ତନ କରାଯାଇଛି।
କଥାଟି ହେଲା ପୂର୍ବରୁ ‘ବାଲା’ର ରିଲିଜ ତାରିଖ ନଭେମ୍ବର 22 ରଖାଯାଇଥିଲା । ଅନ୍ୟପଟେ ଏହି ଥିମ ଉପରେ ନିର୍ମାଣ ହୋଇଥିବା ସନି ସିଂହଙ୍କ ‘ଉଜଡା ଚମନ’ର ଜବରଦସ୍ତ ଟ୍ରେଲର ଠିକ୍ ସମୟରେ ରିଲିଜ ହୋଇଥିଲା। ଟ୍ରେଲର ଲୋକପ୍ରିୟତା ଦେଖି ‘ବାଲା’ ମେକର୍ସ ଫିଲ୍ମର ରିଲିଜ ଡେଟ ନଭେମ୍ବର 7 କରି ଦେଇଛନ୍ତି।
‘ବାଲା’ ଓ ‘ଉଡଜା ଚମନ’ର ରିଲିଜ ଲଢେଇରେ ସବୁଠାକୁ ଅଧିକ ପ୍ରଭାବିତ ହୋଇଛି ସିଦ୍ଧାର୍ଥ ମଲହୋତ୍ରାଙ୍କ ଅଭିନୀତ ଫିଲ୍ମ ‘ମରଜାୱାଂ’ । ଏହି ଫିଲ୍ମଟି ପ୍ରଥମେ ନଭେମ୍ବର 22ରେ ରିଲିଜ ହୋଇଥାନ୍ତା । ତେବେ ‘ବାଲା’ ପାଇଁ, ଏହାର ମେକର୍ସ ନଭେମ୍ବର 8କୁ ରିଲିଜ ତାରିଖ କରି ଦେଇଥିଲେ। ଏବେ କିନ୍ତୁ ‘ମରଜାୱାଂ’ ମେକର୍ସଙ୍କୁ ପୁଣିଥରେ ହଟହଟା ହେବାକୁ ପଡୁଛି । ନଭେମ୍ବର 7, 8ରେ ‘ବାଲା’ ଓ ‘ଉଜଡା ଚମନ’ ରିଲିଜ ହେବାକୁ ଯାଉଥିବା ବେଳେ ‘ମରଜାୱାଂ’ର ରିଲିଜ ଡେଟ ଏବେ ତୃତୀୟ ଥର ପରିବର୍ତ୍ତନ କରି ମେକର୍ସ ନଭେମ୍ବର 15 କରିଛନ୍ତି।
ଏହାର ସୂଚନା ଦର୍ଶକଙ୍କୁ ଫିଲ୍ମ କ୍ରିଟିକ ଓ ଟ୍ରେଡ ଆନାଲିଷ୍ଟ ତରଣ ଆଦର୍ଶ ଟ୍ବିଟରରେ ଦେଇଛନ୍ତି । ଏବେ ଦେଖିବା ବାକି ରହିଲା ନଭେମ୍ବରରେ ହେବାକୁ ଯାଉଥିବାର ବକ୍ସ ଅଫିସ ଲଢେଇରେ କିଏ ବାଜିମାତ କରୁଛି, କେଶ ଝଡୁଥିବା ସମସ୍ୟାରେ ଚିନ୍ତିତ ଥିବା ଦୁଇ ଯୁବକ ନା ପ୍ରେମରେ ଜୀବନ ଦେବାରୁ ପ୍ରସ୍ତୁତ ଥିବା ଜଣେ ଦିୱାନା।
