ମୁମ୍ବାଇ: ଅଭିନେତ୍ରୀ କଙ୍ଗନା ରଣାୱତ କିଛି ଦିନରୁ ଲାଇମଲାଇଟରେ ଅଛନ୍ତି । ନିଜ ବିବାଦୀୟ ବୟାନ ପାଇଁ ଜଣାଶୁଣା କଙ୍ଗନାଙ୍କ ବିରୋଧରେ ଶନିବାର ଏକ ଅପରାଧିକ ମାମଲା ରୁଜୁ ହୋଇଛି । ସେ ବାନ୍ଦ୍ରା କୋର୍ଟ ବିରୋଧରେ ଆପତ୍ତିଜନକ ଟ୍ବିଟ କରିଥିବାରୁ ଏହି ମାମଲା ଦାୟର କରାଯାଇଛି । ହେଲେ କଙ୍ଗନା କେଉଁ ଚୁପ୍ ବସିବା ଝିଅ । ଏହି ଖବର ସାମ୍ନାକୁ ଆସିବା ମାତ୍ରେ ସେ ପୁଣିଥରେ ବଲିଉଡର ମିଷ୍ଟର ପରଫେକ୍ସନିଷ୍ଟ ଆମୀର ଖାନଙ୍କୁ ଟାର୍ଗେଟ କରିଛନ୍ତି ।
କଥାଟି ହେଲା ଯେ କିଛି ଦିନ ମଧ୍ୟରେ କଙ୍ଗନାଙ୍କ ବିରୋଧରେ ତୃତୀୟ ଥର ମାମଲା ରୁଜୁ ହୋଇଛି । ଯାହାକୁ ନେଇ ବର୍ତ୍ତମାନ ସେ ଚିନ୍ତିତ । ଏହାକୁ ଆଧାର କରି ସେ ଆମୀରଙ୍କୁ ସୋସିଆଲ ମିଡିଆରେ ପ୍ରଶ୍ନ ପଚାରିଛନ୍ତି ।
ଆଉ ଟ୍ବିଟରରେ ଲେଖିଛନ୍ତି, ‘ଯେମିତି ରାଣୀ ଲକ୍ଷ୍ମୀବାଇଙ୍କ ଦୁର୍ଗ ଭଙ୍ଗାଯାଇଥିଲା ସେମିତି ମୋ ଘରକୁ ଭଙ୍ଗାଯାଇଛି । ଯେପରି ବିଦ୍ରୋହ ପାଇଁ ସାୱରକରଙ୍କୁ ଜେଲରେ ରଖାଗଲା, ମତେ ମଧ୍ୟ ଜେଲ ପଠାଇବାକୁ ପୁରା ଚେଷ୍ଟା ଚାଲିଛି । ଅସହିଷ୍ଣୁତା ଗ୍ୟାଙ୍ଗକୁ କେହି ଯାଇ ପଚାରନ୍ତୁ କେତେ କଷ୍ଟ ସହିଛନ୍ତି ସେମାନେ ଏହି ଅସହିଷ୍ଣୁତା ଦେଶରେ।’ ଟ୍ବିଟରେ ଆମୀରଙ୍କ ନାଁ କିନ୍ତୁ ନେଇନାହାଁନ୍ତି କିନ୍ତୁ ତାଙ୍କୁ ଟ୍ୟାଗ୍ କରିଛନ୍ତି।
ପ୍ରକାଶ ଥାଉକି ବାରମ୍ବାର ଟ୍ବିଟ କରି କଙ୍ଗନା ନିଜ କ୍ରୋଧ ପ୍ରକାଶ କରିବାରେ ଲାଗିଛନ୍ତି । ଏହି ଟ୍ବିଟ ମଧ୍ୟରେ ଏକ ଟ୍ବିଟରେ କହିଛନ୍ତି, ‘କ୍ୟାଣ୍ଡେଲ ମାର୍ଚ ଗ୍ୟାଙ୍ଗ । ଆୱାର୍ଡ ଫେରାଉଥିବା ଗ୍ୟାଙ୍ଗ ଦେଖି ଫାସିବାଦର ବିରୋଧ କରୁଥିବା କ୍ରାନ୍ତିକାରୀଙ୍କ ସହ କଣ କଣ ହେଉଛି । ତୁମ ଭଳି ନୁହେଁ । କାରଣ ତୁମକୁ କେହି ପଚାରୁନାହାଁନ୍ତି। ମତେ ଦେଖ, ମୋ ଜୀବନର ଉଦ୍ଦେଶ୍ୟ ମହାରାଷ୍ଟ୍ରର ଫାସିବାଦ ସରକାର ବିରୋଧରେ ଲଢିବା । ତୁମ ସମସ୍ତଙ୍କ ଭଳି ଫାଲତୁ କାମ କରିବା ନୁହେଁ ।’
