ନୂଆଦିଲ୍ଲୀ: ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ଯା ମାମଲା ସହ ଜଡିତ ମନି ଲଣ୍ଡରିଂ ମାମଲାର ତଦନ୍ତ ସଂପର୍କରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସୁଶାନ୍ତଙ୍କ ଭଉଣୀ ପ୍ରିୟଙ୍କାଙ୍କ ବୟାନ ରେକର୍ଡ କରିଛନ୍ତି । ଏହାପୂର୍ବରୁ ଇଡି ସୁଶାନ୍ତଙ୍କ ପିତା କେ.କେ ସିଂଙ୍କ ବୟାନ ରେକର୍ଡ କରିଥିଲେ ।
ପୁଅର ବ୍ୟାଙ୍କ ଆକାଉଣ୍ଟରୁ ଆର୍ଥିକ କାରବାର ସମ୍ପର୍କରେ ସୁଶାନ୍ତଙ୍କ ପିତାଙ୍କୁ ଇଡି ପଚରାଉଚରା କରିଥିଲା ।
ମନି ଲଣ୍ଡରିଂ ମାମଲାରେ ସୁଶାନ୍ତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀ, ରିୟାଙ୍କ ଭାଇ ଶୋଭିକ୍, ପିତା ଇନ୍ଦ୍ରଜିତ୍, ସୁଶାନ୍ତଙ୍କ ସିଏ ସନ୍ଦୀପ ଶ୍ରୀଧର, ସୁଶାନ୍ତଙ୍କ ପୂର୍ବତନ ମ୍ୟାନେଜର ତଥା ରିୟାଙ୍କ ମ୍ୟାନେଜର ଶ୍ରୁତି ମୋଦୀ, ରିୟାଙ୍କ ସିଏ ରିତେଶ ଶାହା, ସୁଶାନ୍ତଙ୍କ ଫ୍ଲାଟମେଟ ସିଦ୍ଧାର୍ଥ ପିଠାନିଙ୍କୁ ପଚରାଉଚରା କରାଯାଇଛି ।
ସୁଶାନ୍ତଙ୍କ ମୃତ୍ୟୁ ଘଟଣାର ତଦନ୍ତ ପାଇଁ ସିବିଆଇ ଟିମ୍ ମୁମ୍ବାଇରେ ଅଛନ୍ତି । ଏହି ସମୟରେ ରିୟା ଏବଂ ଚଳଚ୍ଚିତ୍ର ନିର୍ମାତା ମହେଶ ଭଟ୍ଟଙ୍କ ହ୍ବାଟସ୍ ଅପ୍ ଚାଟ୍ ଲିକ୍ ହୋଇଛି । ଚାଟ୍ ଲିକ୍ ହେବା ପରେ ମହେଶ ଭଟ୍ଟଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି ।