ବିରାଟଙ୍କ ଟ୍ବିଟ ସାଜିଲା 2020ର ସବୁଠୁ ପସନ୍ଦିତ ଟ୍ବିଟ

ଚଳିତ ବର୍ଷ ଅଗଷ୍ଟ ମାସରେ ବିରାଟ ଏବଂ ଅନୁଷ୍କା ଟ୍ବିଟ ମାଧ୍ୟମରେ ଜଣାଇଥିଲେ ଯେ ସେମାନେ ପ୍ରଥମ ପିତାମାତା ହେବାକୁ ଯାଉଛନ୍ତି । ତାଙ୍କର ସେହି ଟ୍ବିଟ 2020ର ସବୁଠାରୁ ପସନ୍ଦିତ ଟ୍ବିଟ ସାଜିଛି ।

ମୁମ୍ବାଇ: ବଲିଉଡ ଓ କ୍ରିକେଟ ଜଗତର ସବୁଠୁ ପପୁଲାର କପଲ ବିରାଟ କୋହଲି ଓ ଅନୁଷ୍କା ଶର୍ମା ପ୍ରଥମଥର ବାପା-ମା' ହେବାକୁ ଯାଉଛନ୍ତି । ଯାହାକୁ ନେଇ ଦୁଇଜଣଙ୍କ ଖୁସି ନକହିଲେ ସରେ । ସେପଟେ ଫ୍ୟାନ୍ସ ମଧ୍ୟ କପଲଙ୍କ ଖୁସିରେ ଖୁସି ନଜର ଆସୁଛନ୍ତି । ଗତ ଅଗଷ୍ଟରେ ବିରାଟ ଓ ଅନୁଷ୍କା ଗର୍ଭବତୀ କଥା ସମସ୍ତଙ୍କୁ ଜଣାଇଥିଲେ । ଆଉ ସେହି ଟ୍ବିଟ ବର୍ତ୍ତମାନ ଚର୍ଚ୍ଚାରେ ।

କଥାଟି ହେଲା ଯେ ଟ୍ବିଟର ଇଣ୍ଡିଆ ଘୋଷଣା କରିଛି ବିରାଟଙ୍କ ଗର୍ଭବତୀ ସୂଚନା ଦେବା ଟ୍ବିଟ 2020ରେ ସବୁଠୁ ଅଧିକ ପସନ୍ଦ କରାଯାଇଥିବା ଟ୍ବିଟ ମଧ୍ୟରେ ଅନ୍ୟତମ । ଉଭୟଙ୍କ ପ୍ରଶଂସକ ସେହି ଟ୍ବିଟକୁ ବହୁତ ପସନ୍ଦ କରିଛନ୍ତି । ବିରାଟ ଏବଂ ଅନୁଷ୍କାଙ୍କ ସେହି ଫଟୋ ମଧ୍ୟ ଖୁବ୍ ଭାଇରାଲ ହୋଇଥିଲା ।

ଏହାର ସୂଚନା ଦେଇ ଟ୍ବିଟର ଇଣ୍ଡିଆ ବିରାଟଙ୍କ ଟ୍ବିଟକୁ ଏକ କ୍ୟାପସନ ସହ ସେୟାର କରିଛି । ଯେଉଁଥିରେ ଲେଖାଯାଇଛି, ‘2020ର ସବୁଠୁ ଅଧିକ ପସନ୍ଦ କରାଯାଇଥିବା ଟ୍ବିଟ ।’

ପ୍ରକାଶ ଥାଉକି ବିରାଟ ପତ୍ନୀ ଅନୁଷ୍କାଙ୍କ ସହ ଅଗଷ୍ଟ 27ରେ ଏକ ଫଟୋ ପୋଷ୍ଟ କରି ବାପା ହେବାକୁ ଯାଉଥିବା ଖୁସି ସମସ୍ତଙ୍କ ସହ ସେୟାର କରିଛନ୍ତି । ଫଟୋରେ ଅନୁଷ୍କାଙ୍କ ବ୍ଲାକ ଆଉଟଫିଟ୍ ପିନ୍ଧିଥିବା ବେଳେ ବିରାଟ ତାଙ୍କ ପଛରେ ହ୍ବାଇଟ ଟି-ସର୍ଟ ପିନ୍ଧି ଠିଆ ହୋଇଥିବାର ନଜର ଆସିଥିଲେ । ସେହିପରି ସେ କ୍ୟାପସନରେ ଲେଖିଥିଲେ, ‘ଏବେ ଆମେ ତିନିଜଣ ହେବାକୁ ଯାଉଛୁ । 2021 ଜାନୁଆରେ ଘରକୁ ଆସିବେ ନୂଆ ଅତିଥି ।’