ଭୁବନେଶ୍ବର: ବହୁତ ପ୍ରତିକୂଳ ପରିସ୍ଥିତିର ସାମ୍ନା କରିବା ପରେ ନୂଆ ରୂପରେ ଓଡ଼ିଆ ଚଳଚ୍ଚିତ୍ର ଜଗତକୁ ଫେରିଛନ୍ତି ହାସ୍ୟ କଳାକାର ପପୁ ପମପମ। ଏଥର କ୍ୟାମେରା ସାମ୍ନାରେ ନ ଆସି କ୍ୟାମେରା ପଛରେ ନଜର ଆସିବେ ପପୁ। ଏଥର ସେ କାହାଣୀ, ଚିତ୍ରନାଟ୍ୟ, ସଙ୍ଗୀତ ଓ ନିର୍ଦ୍ଦେଶନାର ଭାର ସମ୍ଭାଳୁଥିବାର ନଜର ଆସିବେ । ସେ ଖୁବ୍ ଶୀଘ୍ର ପ୍ରେମ କାହାଣୀ ନେଇ ଦର୍ଶକଙ୍କ ନିକଟକୁ ଫେରୁଛନ୍ତି।
ଖୁବଶୀଘ୍ର ପରଦା ଉପରକୁ ଆସିବାକୁ ଥିବା 'ଚିରକୁଟ' ଚଳଚ୍ଚିତ୍ରର ସଙ୍ଗୀତ ଉନ୍ମୋଚନ ଉତ୍ସବରେ ପପୁ କହିଛନ୍ତି ଯେ ବିନା ଅଶ୍ଳୀଳ, ଦ୍ଵିଭାଷୀ ଅବା ନକଲ ନ କରି ସମ୍ପୂର୍ଣ୍ଣ ଓଡ଼ିଆ ମୌଳିକତାକୁ ପ୍ରାଧାନ୍ୟ ଦେଇ ଏଥିରେ 6ଟି ଗୀତ ସ୍ଥାନିତ କରାଯାଇଛି।
ଯେଉଁଥିରେ କ୍ଲାସିକାଲ, କୱାଲି ସହିତ ଢଗଢମାଳିକୁ ନେଇ ମଧ୍ୟ ଗୀତ ପ୍ରସ୍ତୁତ କରାଯାଇଛି । ସେହିପରି ଆଇଟମ ସଙ୍ଗକୁ ଲକ୍ଷ କରି ଓଡ଼ିଆ କାନ୍ଦଣା ଗୀତ ଆଧାରରେ ଏକ ଗୀତ 'କିଏ ଘଷି ଦେବ ସୋରିଷ ତେଲ' ମଧ୍ୟ ପ୍ରସ୍ତୁତ କରାଯାଇଛି । ଡ଼ଃ ଦୀପକ ଜେନା, ସୁରେଶ ପଣ୍ଡା ଓ ସୁମିତ ଜେନାଙ୍କ ଦ୍ବାରା ଲିଖିତ ଗୀତ ଗୁଡିକୁ ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀମାନେ ଯଥା ଦେବାଶିଷ ପତି, ବିଷ୍ଣୁ ମୋହନ କବି, ଅନ୍ତରା ଚକ୍ରବର୍ତ୍ତୀ, ସ୍ବୟମ ପାଢ଼ୀ, ଅସୀମା ପଣ୍ଡାଙ୍କ ସମେତ ନିଜେ ପପୁ ମଧ୍ୟ କଣ୍ଠ ଦାନ କରିଛନ୍ତି।
ଅକ୍ଷୟ ପରିଜାଙ୍କ ପ୍ରଯୋଜନାରେ ନିର୍ମିତ ହେଉଥିବା ଏହି ଚଳଚ୍ଚିତ୍ରଟି ନୂଆ କଳାକାରଙ୍କୁ ନେଇ ପ୍ରସ୍ତୁତ ହେଉଛି । ଯାହାକି ଆସନ୍ତା ଏପ୍ରିଲ ମାସ 14 ତାରିଖ ଅର୍ଥାତ ଓଡ଼ିଆ ନୂଆବର୍ଷରେ ମୁକ୍ତିଲାଭ କରିବ ବୋଲି ଜଣାପଡିଛି । ତେବେ ମୃତ୍ୟୁ ସହିତ ସଂଗ୍ରାମ କରୁଥିବାବେଳେ ଅଗଣିତ ପ୍ରଶଂସକଙ୍କ ଭଲପାଇବା ଯୋଗୁ ପୁନର୍ଜନ୍ମ ଲାଭ କରିଥିବା ପପୁ ସମସ୍ତଙ୍କୁ ନିଜର କୃତଜ୍ଞତା ଜଣାଇବା ଉଦ୍ଦେଶ୍ୟରେ ଫିଲ୍ମ ରିଲିଜର ପ୍ରଥମ ଶୋକୁ ଦର୍ଶକଙ୍କ ପାଇଁ ଉତ୍ସର୍ଗ କରିଛନ୍ତି । ସାରା ଓଡ଼ିଶାରେ ଯେଉଁଠି ବି ଏହି ଚଳଚ୍ଚିତ୍ର ରିଲିଜ ହେବ, ସେହି ପ୍ରଥମ ଶୋକୁ ଦର୍ଶକମାନେ ବିନା ପଇସାରେ ଯାଇ ଦେଖିପାରିବେ ବୋଲି ପ୍ରଯୋଜନା ସଂସ୍ଥା ତରଫରୁ କୁହାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
