ନୂଆଦିଲ୍ଲୀ : ମାର୍ଚ୍ଚ 12 ରେ ସାଉଥ ସୁପରଷ୍ଟାର ଆକ୍କିନେନି ନାଗାର୍ଜୁନଙ୍କ ଆଗାମୀ ଆକ୍ସନ୍ ଥ୍ରୀଲର ଫିଲ୍ମ 'ୱାଇଲ୍ଡ ଡଗ୍'ର ଟ୍ରେଲର ରିଲିଜ ହୋଇଯାଇଛି। ଟ୍ରେଲରରେ ନାଗାର୍ଜୁନଙ୍କ ଧମାକାଦାର ଆକ୍ସନ ଦେଖିବାକୁ ମିଳିଛି । ଟ୍ରେଲର ପରେ ଏବେ ପ୍ରଶଂସକମାନେ ଫିଲ୍ମ ଦେଖିବାକୁ ବହୁତ ଉତ୍ସାହିତ ଅଛନ୍ତି ।
ଏହି ଆକ୍ସନ୍ ଥ୍ରୀଲର ଫିଲ୍ମରେ ନାଗାର୍ଜୁନ ଏନଆଇଏର ଅଫିସର ବିଜୟ ବର୍ମାଙ୍କ ଭୂମିକାରେ ନଜର ଆସିଛନ୍ତି। ଏଥିସହିତ ବଲିଉଡ ଅଭିନେତ୍ରୀ ଦିଆ ମିର୍ଜା ତାଙ୍କ ପତ୍ନୀ ଭୂମିକାରେ ନଜର ଆସିବେ।
ସୂଚନା ଅନୁଯାୟୀ, ହାଇଦ୍ରାବାଦରେ ଆତଙ୍କବାଦୀ ଆକ୍ରମଣ ଘଟଣା ଉପରେ ଆଧାରିତ ଏହି ଫିଲ୍ମ।
ଏହି ଟ୍ରେଲରକୁ ଚିରଞ୍ଜୀବୀ କୋନିଡେଲା ତାଙ୍କ ଅଫିସିଆଲ ଟ୍ବିଟରରେ ସେୟାର କରିଛନ୍ତି। ଟ୍ରେଲରକୁ ସେୟାର କରି ସେ ଲେଖିଛନ୍ତି, 'ୱାଇଲ୍ଡ ଡଗ' ।
ଏହି ସିନେମାର ନିର୍ଦ୍ଦେଶନା ଦେଇଛନ୍ତି ଅହିଶୋର ଶଲୋମନ। ଏହି ଚଳଚ୍ଚିତ୍ରରେ ନାଗାର୍ଜୁନ, ଦିଆଙ୍କ ବ୍ୟତୀତ ସାୟାମି ଖେର, ଅଲି ରଜା, ଅତୁଲ କୁଲକର୍ଣ୍ଣି ଭଳି କଳାକାରମାନେ ଅଭିନୟ କରିଛନ୍ତି। ଏହି ଫିଲ୍ମ ଏପ୍ରିଲ ୨ ରେ ପ୍ରେକ୍ଷାଳୟରେ ମୁକ୍ତିଲାଭ କରିବ।
ପ୍ରକାଶ ଥାଉ ଯେ, ନାଗାର୍ଜୁନଙ୍କୁ ବଲିଉଡ ଅଭିନେତା ରଣବୀର କପୁର ଏବଂ ଆଲିଆ ଭଟ୍ଟଙ୍କ ସହ ଫିଲ୍ମ 'ବ୍ରହ୍ମାସ୍ତ୍ର'ରେ ମଧ୍ୟ ଦେଖିବାକୁ ମିଳିବ। ନିକଟରେ ସେ 'ବ୍ରହ୍ମାସ୍ତ୍ର'ର ସୁଟିଂ ଶେଷ କରିଛନ୍ତି।