ସୁଶାନ୍ତଙ୍କ ସହ କାମ କରିଥିବା ଷ୍ଟାର୍ସଙ୍କ ବୟାନ ରେକର୍ଡ କରିବ ବିହାର ପୋଲିସ

ସୁଶାନ୍ତଙ୍କ ମାମଲାରେ ସାମ୍ନାକୁ ଆସିଲା ନୂଆ ଖବର । ବିହାର ପୋଲିସ ତାଙ୍କ ସହ କାମ କରିଥିବା ସବୁ କଳାକାରଙ୍କୁ ପଚରାଉଚରା କରିବାକୁ ଯାଉଛି।

ମୁମ୍ବାଇ: ସୁଶାନ୍ତ ସିଂ ରାଜପୁତ ମାତ୍ର 34 ବର୍ଷ ବୟସରେ ଆତ୍ମହତ୍ୟା କରି ସମସ୍ତଙ୍କୁ ଚକିତ କରିଦେଇଥିଲେ । ଆଜି ଦେଶର ସବୁଠୁ ବଡ ପ୍ରସଙ୍ଗ ସାଜିଛି ତାଙ୍କ ମୃତ୍ୟୁ । ପରିବାରଠୁ ନେଇ ଫ୍ୟାନ୍ସଙ୍କ ପାଇଁ ତାଙ୍କ ଆତ୍ମହତ୍ୟା ରହସ୍ୟମୟ ହୋଇ ରହିଛି । ସେପଟେ ମୁମ୍ବାଇ ପୋଲିସ ସହ ମିଶି ବିହାର ପୋଲିସ ତଦନ୍ତ ଆରମ୍ଭ କରିଦେଇଛି । ଇତିମଧ୍ୟରେ ଶୁଣିବାକୁ ମିଳୁଛି ଯେ ସୁଶାନ୍ତଙ୍କ ସହ କାମ କରିସାରିଥିବା ସବୁ କଳାକାରଙ୍କୁ ପଚରାଉଚରା କରିବ ବିହାର ପୋଲିସ ।

ଏକ ଟ୍ବିଟ ଦ୍ବାରା ଏହାର ସୂଚନା ଦିଆଯାଇଛି । ଅନ୍ୟପଟେ ସୁଶାନ୍ତଙ୍କ ମାମଲାରେ ଅନେକ ସେଲିବ୍ରିଟି ସୋସିଆଲ ମିଡିଆରେ ସିବିଆଇ ଯାଞ୍ଚ ଦାବି କରିବାରେ ଲାଗିଛନ୍ତି । ଖାଲି ସେଲିବ୍ରିଟି ନୁହେଁ ଅନେକ ରାଜନେତା ମଧ୍ୟ ସିବିଆଇ ଯାଞ୍ଚ ଦାବି କରିଛନ୍ତି । ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ଏହି ମାମଲାରେ ସିବିଆଇ ଯାଞ୍ଚ ପାଇଁ କହିଛନ୍ତି ।

ପ୍ରକାଶ ଥାଉକି ଏଯାବତ ମୁମ୍ବାଇ ପୋଲିସ ସୁଶାନ୍ତଙ୍କ ସହ ସମ୍ପୃକ୍ତ ଥିବା 40ରୁ ଅଧିକଙ୍କ ବୟାନ ରେକର୍ଡ କରିସାରିଲାଣି । ଏହି କ୍ରମରେ ସାମିଲ ଅଛନ୍ତି, ନିର୍ମାତା ସଞ୍ଜୟ ଲୀଲା ଭଂସାଲୀ, ଆଦିତ୍ୟ ଚୋପ୍ରା, ମହେଶ ଭଟ୍ଟ, ଶେଖର କପୁର, ରିଆ ଭଳି ସେଲିବ୍ରିଟି।