ହାଇଦ୍ରାବାଦ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଦେଲେ ଗୁଗଲ ସିଇଓ ସୁନ୍ଦର ପିଚାଇ । ଭାରତ ପ୍ରତି ଗୁଗଲର ପ୍ରତିବଦ୍ଧତା ନେଇ ଗତକାଲି(ସୋମବାର) ଉଭୟଙ୍କ ମଧ୍ୟରେ ବୈଠକ ହୋଇଥିବା ବେଳେ ଆଜି ଏକ୍ସରେ ଟ୍ବିଟ କରି ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ଗୁଗଲ ସିଇଓ । ଗୁଗଲ ସିଇଓ ଟ୍ବିଟ କରି କହିଛନ୍ତି, "ସଫଳ ବୈଠକ ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ । ପ୍ରଧାନମନ୍ତ୍ରୀ ଏବଂ ଆମ ଟିମ AI ଟୁଲ୍ ବ୍ୟବହାର କରି ଆମର କାର୍ଯ୍ୟକୁ ବିସ୍ତାର କରୁଛୁ । ସମୟ ଅନୁସାରେ ଆମର ସହଭାଗୀତା ବୃଦ୍ଧି ପାଉଛି ।"
ସୂଚନାଅନୁସାରେ, ସୋମବାର ଦିନ ଗୁଗଲ ସିଇଓ ଏବଂ ପ୍ରଧାନମନ୍ତ୍ରୀଙ୍କ ମଧ୍ୟରେ ଭର୍ଚୁଆଲ ବୈଠକ ହୋଇଥିଲା । ତେବେ ବୈଠକରେ ଉଭୟେ ଭାରତରେ ଇଲେକ୍ଟ୍ରୋନିକ୍ସ ମ୍ୟାନୁଫ୍ୟାକ୍ଚରିଂ ଇକୋସିଷ୍ଟମକୁ ବିସ୍ତାର କରିବା ପାଇଁ ଗୁଗଲର ଯୋଜନା ଉପରେ ଆଲୋଚନା କରିଥିଲେ । ଭାରତରେ କ୍ରୋମବୁକର ନିର୍ମାଣ ପାଇଁ HP ସହିତ ଗୁଗୁଲର ସହଭାଗିତାକୁ ପ୍ରଶଂସା କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ଅନ୍ୟପଟେ ଗୁଗଲରେ 100ରୁ ଅଧିକ ଭାଷାର ଉପଲବ୍ଧତା ନେଇ ମଧ୍ୟ ସୁନ୍ଦର ପିଚାଇଙ୍କୁ ପ୍ରଶଂସା କରିଥିଲେ ପ୍ରଧାନମନ୍ତ୍ରୀ । ଭାରତୀୟ ଭାଷାରେ AI ଉପକରଣ ଉପଲବ୍ଧ କରାଇବାର ପ୍ରୟାସକୁ ମଧ୍ୟ ମୋଦି ପ୍ରୋତ୍ସାହିତ କରିଥିଲେ । ତେବେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି କରାଯାଇଥିବା ବିବୃତ୍ତି ଅନୁସାରେ, ପ୍ରଧାନମନ୍ତ୍ରୀ ଗୁଗଲକୁ ସୁଶାସନ ପାଇଁ AI ଟୁଲ୍ ଉପରେ କାମ କରିବାକୁ ନେଇ ଉତ୍ସାହିତ କରିଛନ୍ତି ।