ୱାସିଂଟନ: ସବୁଠୁ ଶକ୍ତିଶାଳୀ ରାଷ୍ଟ୍ର ଆମେରିକା । ସମଗ୍ର ବିଶ୍ବରେ ଆମେରିକାର ଦବଦବା ରହିଛି । ତେବେ ଜାଣନ୍ତି କି, ଏହି ଶକ୍ତିଶାଳୀ ରାଷ୍ଟ୍ରର ରାଷ୍ଟ୍ରପତି ଏବଂ ଉପରାଷ୍ଟ୍ରପତିଙ୍କ ଆୟ କେତେ ଏବଂ ସେମାନେ କେତେ ଟିକସ ଦିଅନ୍ତି ? ରାଷ୍ଟ୍ରପତି ବାଇଡେନ ହ୍ବାଇଟ ହାଉସରୁ ଦ୍ବିତୀୟ ଥର ପାଇଁ ନିଜର ଆୟକର ରିଟର୍ଣ୍ଣ ସଂକ୍ରାନ୍ତୀୟ ରିପୋର୍ଟ ସାର୍ବଜନୀନ କରିଛନ୍ତି । ସୂଚନା ଅନୁଯାୟୀ, ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ ତାଙ୍କ ପତ୍ନୀ ଜିଲ୍(Jill) ହ୍ବାଇଟ ହାଉସରେ ନିଜର ପ୍ରଥମ ବର୍ଷର କାର୍ଯ୍ୟକାଳରେ 610,702 ଡଲାର(ଭାରତୀୟ ମୁଦ୍ରାରେ 4.66 କୋଟି) ଆୟ କରିଛନ୍ତି ଏବଂ 150,439 ଡଲାର(1.14 କୋଟି ଟଙ୍କା) ଟିକସ ଦେଇଛନ୍ତି । ୨୦୨୧ ବର୍ଷର 24.6% ଟିକସ ହାରରେ ରାଷ୍ଟ୍ରପତି ଏହି ଟିକସ ପଇଠ କରିଛନ୍ତି, ଯାହା ସମସ୍ତ ଆମେରିକୀୟଙ୍କ ଟିକସ ହାର ଠାରୁ ହାରାହାରି 14% ଅଧିକ ।
ପ୍ରଥମ ବର୍ଷ କାର୍ଯ୍ୟକାଳ ମଧ୍ୟରେ ବାଇଡେନଙ୍କ ମୋଟ ଆୟ ତାଙ୍କ ୨୦୨୦ ରିଟର୍ଣ୍ଣ ସହ ପ୍ରାୟ ସମାନ ଥିଲା । ସେତେବେଳେ ବାଇଡେନ ରାଷ୍ଟ୍ରପତି ଦୌଡରେ ଥିଲେ ଏବଂ 607,336 ଡଲାର ଅର୍ଥ ଅର୍ଜନ କରିଥିଲେ । ସେହି ସମୟରେ ସେ 25.9% ସଙ୍ଘୀୟ ଆୟକର ହାରରେ ଟିକସ ଦେଇଥିଲେ । ଏହାପୂର୍ବରୁ ଆମେରିକା ରାଷ୍ଟ୍ରପତି ଥିବା ଡୋନାଲ୍ଡ ଟ୍ରମ୍ପ ନିଜ କାର୍ଯ୍ୟକାଳ ସମୟରେ ଆୟକର ରିଟର୍ଣ୍ଣ ଜନିତ ସୂଚନା ସାର୍ବଜନୀନ କରିବାକୁ ସ୍ପଷ୍ଟ ମନା କରିଦେଇଥିଲେ । ହେଲେ ବାଇଡେନ ଦ୍ବିତୀୟ ଥର ପାଇଁ ନିଜ ଆୟ ଓ ଟିକସ ସମ୍ପର୍କରେ ସୂଚନା ଦେଇଛନ୍ତି । ୨୦୧୯ ଆୟ ତୁଳନାରେ ଚଳିତ ବର୍ଷ ଏବଂ ଗତ ଦୁଇବର୍ଷ ବାଇଡେନଙ୍କ ଆୟ ହ୍ରାସ ପାଇଛି । ୨୦୧୯ ସମୟରେ ବିଭିନ୍ନ ସୂତ୍ରରୁ ସେ ୧ ମିଲିୟନ ରୋଜଗାର କରିଥିଲେ ।