ରାବତ: ଆଫ୍ରିକୀୟ ଦେଶ ମରକ୍କୋରେ ଶକ୍ତିଶାଳୀ ଭୂକମ୍ପ ଝଟ୍କା । ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା 6.8 ରେକର୍ଡ କରାଯାଇଛି । ଭୂମିକମ୍ପରେ 632 ଜଣଙ୍କର ମୃତ୍ୟୁ ହୋଇଥିବା ବେଳେ 300ରୁ ଉର୍ଦ୍ଧ୍ବ ଆହତ ହୋଇଛନ୍ତି । ସମୟ ଗଡିବା ସାଙ୍ଗକୁ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ହେବାରେ ଲାଗିଛି । ଭୂମିକମ୍ପରେ ବଡ଼ ବଡ଼ କୋଠା ଭୁଶୁଡ଼ି ପଡିଛି । ଅନେକ ଲୋକ ଏବେବି ଭଙ୍ଗା କୋଠା ତଳେ ଚାପି ହୋଇ ରହିଛନ୍ତି । ମୃତ୍ୟୁ ସଂଖ୍ୟା ଆଗକୁ ବଢିବା ଆଶଙ୍କା ରହିଛି ।
ଭୂକମ୍ପର ଗଭୀରତା 18.5 କିଲୋମିଟର ରେକର୍ଡ କରାଯାଇଛି । ଭାରତୀୟ ସମୟ ଭୋର 3ଟା 41 ମିନିଟ ସମୟରେ ଭୂକମ୍ପ ଝଟକା ଅନୂଭୁତ ହୋଇଥିଲା । ଏହାପରେ ଭୟରେ ସମସ୍ତ ଘରୁ ବାହାରି ଦୌଡିବାକୁ ଲାଗିଲେ । ଭୂକମ୍ପର କେନ୍ଦ୍ରସ୍ଥଳ ପ୍ରମୁଖ ଅର୍ଥନୈତିକ କେନ୍ଦ୍ର ପଶ୍ଚିମ ମାର୍କେଶର 70 କିଲୋମିଟର ଦୂରରେ ଅବସ୍ଥିତ । ଭୂକମ୍ପର ଅକ୍ଷାଂଶ 31.110 ଏବଂ ଦ୍ରାଘିମା 8.440 ରହିଛି । ଏନେଇ ୟୁନାଇଟେଡ ଷ୍ଟେଟ୍ସ ଜେଗ୍ରୋଫିକାଲ ସର୍ଭେ ତରଫରୁ ସୂଚନା ପ୍ରଦାନ କରାଯାଇଛି ।
ଏହା ମଧ୍ୟ ପଢନ୍ତୁ-ତୁର୍କୀରେ ଭୂକମ୍ପ ତାଣ୍ଡବ: ପୁଣି ଥରିଲା 2 ପ୍ରଦେଶ, 5.5 ତୀବ୍ରତା
ଦୁଃଖ ପ୍ରକାଶ କଲେ ମୋଦି: ମରକ୍କୋରେ ଭୂକମ୍ପ ଖବର ଜାଣିବା ପରେ ଦୁଃଖ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏକ୍ସରେ ଟ୍ବିଟ କରି ମୋଦି କହିଛନ୍ତି ଯେ, ମରକ୍କୋରେ ଭୂକମ୍ପ ହେବା ପରେ ଶତାଧିକ ଲୋକଙ୍କର ମୃତ୍ୟୁ ହୋଇଛି । ଏହା ଅତ୍ୟନ୍ତ ଯନ୍ତ୍ରଣାଦାୟକ। ଏହି ଦୁଃଖଦ ସମୟରେ ମୁଁ ମରକ୍କୋ ଲୋକଙ୍କ ସହ ଅଛି । ଯେଉଁମାନେ ନିଜର ପ୍ରିୟଜନଙ୍କୁ ହରାଇଛନ୍ତି ସେମାନଙ୍କୁ ମୋର ସମବେଦନା ଓ ଆହତଙ୍କ ଆଶୁଆରୋଗ୍ୟ ମୁଁ କାମନା କରୁଛି । ଏଦି ବିପଦ ସମୟରେ ଭାରତ ମରକ୍କୋକୁ ସମସ୍ତ ପ୍ରକାର ସହାୟତା ଯୋଗାଇବାକୁ ପ୍ରସ୍ତୁତ ଅଛି । ଭୂକମ୍ପର ଛାତିଥରା ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭୂକମ୍ପ ଝଟକା ପରେ ବଡ ବଡ କୋଠା ସବୁ ଭୁଶୁଡି ପଡିଛି । ଜୀବନ ବଞ୍ଚାଇବା ପାଇଁ ଲୋକ ମାନେ ଏଣେତେଣେ ଦୌଡୁଥିବା ଦେଖିବାକୁ ମିଳିଛି । ଆହତ ଲୋକଙ୍କୁ ବର୍ତ୍ତମାନ ହସ୍ପିଟାଲରେ ଭର୍ତ୍ତି କରାଯାଉଛି ।
ଗତ ଫେବୃଆରୀ ମାସରେ ତୁର୍କୀ ଓ ସିରିୟାରେ ଶକ୍ତିଶାଳୀ ଭୂକମ୍ପ ହୋଇଥିଲା। ବଡବଡ ଅଟ୍ଟାଳିକା ମାନ ଭୁଶୁଡି ପଡିବାରୁ ହଜାର ହଜାର ଲୋକ ଚାପି ହୋଇଯାଇଥିଲେ। ପ୍ରାୟ 50 ହଜାରରୁ ଉର୍ଦ୍ଧ୍ବ ଲୋକଙ୍କ ମୃତ୍ୟୁ ହୋଇଥିବା ବେଳେ ହଜାର ହଜାର ଲୋକ ଆହତ ହୋଇଥିଲେ। ଫେବୃଆରୀ 6 ତାରିଖରେ ତୁର୍କୀର ଦକ୍ଷିଣ ପ୍ରଦେଶର କାହରାମନମାରସରେ 7.7 ମ୍ୟାଗ୍ନିଚ୍ୟୁଡର ଭୂକମ୍ପ ଅନୁଭୂତ ହୋଇଥିଲା । ତୁର୍କୀର ମୋଟ 10ଟି ପ୍ରଦେଶ ଭୂକମ୍ପରେ ଗମ୍ଭୀର ଭାବେ ପ୍ରଭାବିତ ହୋଇଥିଲା । ଗୋଟିଏ ପଟେ ଉଦ୍ଧାର କାର୍ଯ୍ୟ ଆରମ୍ଭ ହୋଇସାରିଥିବା ବେଳେ ବାରମ୍ବାର ଭୂକମ୍ପ ଅନୁଭୂତ ହେବା ସ୍ଥିତିକୁ ସଙ୍ଗୀନ କରିଛି ।
