ନୂଆଦିଲ୍ଲୀ:ଇସ୍ରାଏଲ-ହମାସ ମଧ୍ୟରେ ଯୁଦ୍ଧ ଜାରି ରହିଥିବା ବେଳେ ଶନିବାର ଦିନ ପାଲେଷ୍ଟାଇନ ପ୍ରଧାନମନ୍ତ୍ରୀ ମହମ୍ମଦ ଶତୟେହଙ୍କ ସହ କଥା ହୋଇଛନ୍ତି ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର । ଟେଲିଫୋନ ଯୋଗେ ଦୁହିଁଙ୍କ ମଧ୍ୟରେ ଗାଜା ଓ ଓ୍ୱେଷ୍ଟ ବ୍ୟାଙ୍କର ସ୍ଥିତି ନେଇ ବାର୍ତ୍ତାଳାପ ହୋଇଛି । ତେବେ ଇସ୍ରାଏଲ- ହମାସ ମଧ୍ୟରେ ଯୁଦ୍ଧରେ ସାଧାରଣ ଜନତାଙ୍କ ଜୀବନ ଦୁର୍ବିସହ ହୋଇପଡିଛି । ଏନେଇ ଚିନ୍ତାପ୍ରକଟ କରିବା ସହ ପାଲେଷ୍ଟାଇନ ସହିତ ଭାରତର ସମ୍ପର୍କକୁ ପୁଣିଥରେ ଦୋହରାଇଛନ୍ତି ଏସ୍. ଜୟଶଙ୍କର । ଦୁଇ ନେତା ଯୋଗାଯୋଗରେ ରହିବା ପାଇଁ ସହମତି ପ୍ରକାଶ କରିଛନ୍ତି ।
ଏହାମଧ୍ୟ ପଢନ୍ତୁ.. ଗାଜାରେ ଅସ୍ତ୍ରବିରତି ପାଇଁ ପ୍ରସ୍ତାବ; ଭିଟୋ ପ୍ରୟୋଗ କଲା ଆମେରିକା
ଇସ୍ରାଏଲ ଓ ହମାସ ମଧ୍ୟରେ ଗତ 2 ମାସ ହେଲା ଭୟଙ୍କର ଯୁଦ୍ଧ ଜାରି ରହିଛି । ଯୁଦ୍ଧରେ ଏବେ ସୁଦ୍ଧା 16 ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ହଜାର ହଜାର ଆହତ ହୋଇଛନ୍ତି । ତେବେ ଅକ୍ଟୋବର 7 ତାରିଖରେ ସକାଳ ସମୟରେ ହମାସ ଗାଜା ଷ୍ଟ୍ରିପରୁ ଇସ୍ରାଇଲ ଉପରକୁ ପାଖାପାଖି 5 ହଜାର ରକେଟ ମାଡ କରିଥିଲା । ଏହାର ପ୍ରତିଜବାବରେ ରକ୍ତମୁଖା ହୋଇପଡିଛି ଇସ୍ରାଏଲ । ଯାହାଫଳରେ 2 ମାସ ହେଲା 2 ଦେଶ ମଧ୍ୟରେ ଘମାଘୋଟ ଯୁଦ୍ଧ ଜାରି ରହିଛି । ଏହାମଧ୍ୟରେ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ପାଲେଷ୍ଟାଇନ ପ୍ରଧାନମନ୍ତ୍ରୀଙ୍କ ସହ ଏ ସମ୍ବନ୍ଧରେ ଆଲୋଚନା କରିଛନ୍ତି ।