ମେକ୍ସିକୋ ସିଟି:ପୁଣି ଭୟଙ୍କର ସଡକ ଦୁର୍ଘଟଣା । ଘାଟି ତଳକୁ ଖସିପଡିଲା ଯାତ୍ରୀବାହୀ ବସ୍ । ଆଖି ପିଛୁଳାକେ ଚାଲିଗଲା ୨୭ ଜୀବନ । ବୁଧବାର ମେକ୍ସିକୋର ଦକ୍ଷିଣ ରାଜ୍ୟ ଓକ୍ସାକାରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି । ଗୋଟିଏ ଯାତ୍ରୀବାହୀ ବସ୍ ପାହାଡିଆ ରାସ୍ତାରେ ଯାଉଥିବା ବେଳେ ତଳକୁ ଖସି ପଡିବାରୁ ଅତିକମରେ ୨୭ ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୧୩ ଜଣ ମହିଳା ଏବଂ ୧୩ ଜଣ ପୁରୁଷଙ୍କ ସମେତ ଜଣେ ବର୍ଷକର ଛୁଆ ରହିଛି । ଦୁର୍ଘଟଣାରେ ୧୭ ଜଣ ଗୁରୁତର ଆହତ ହୋଇଛନ୍ତି । ସେମାନଙ୍କୁ ନିକଟସ୍ଥ ବିଭିନ୍ନ ହସ୍ପିଟାଲଗୁଡିକରେ ଭର୍ତ୍ତି କରାଯାଇଛି । ତେବେ ଆଗକୁ ମୃତ୍ୟୁସଂଖ୍ୟା ବଢିବାର ଆଶଙ୍କା କରାଯାଉଛି ।
ସୂଚନା ମୁତାବକ, ବସ୍ରେ ୪୦ରୁ ଅଧିକ ଯାତ୍ରୀ ଥିଲେ । ଗତକାଲି ବସ୍ ମେକ୍ସିକୋ ସିଟିରୁ ୟୋସୋନ୍ଦୁଆ ଅଭିମୁଖେ ଯାଉଥିଲା । ବାଟରେ ମାଗଦାଲେନା ପେନାସ୍କୋ ସହର ନିକଟରେ ଦୁର୍ଘଟଣା ଘଟିଛି । ବସ୍ ଏକ ପାହାଡିଆ ରାସ୍ତା ଦେଇ ଗତି କରୁଥିବା ବେଳେ ଭାରାସାମ୍ୟ ହରାଇ ଘାଟି ତଳକୁ ଖସି ପଡିଥିଲା । ଏନେଇ ଓକ୍ସାକା ଗଭର୍ଣ୍ଣର ଟ୍ବିଟ୍ ଯୋଗେ ସୂଚନା ଦେଇଛନ୍ତି । ଖବର ପାଇ ଉଦ୍ଧାରକାରୀ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ । ସ୍ଥାନୀୟ ଲୋକେ, ସିଟି କାଉନ୍ସିଲ କର୍ମଚାରୀ ଏବଂ ଘରୋଇ ଆମ୍ବୁଲାନ୍ସ ଉଦ୍ଧାର କାର୍ଯ୍ୟରେ ସହାୟତା କରିଥିଲେ ।